Gera skaltu alltara at færa reykelsi firir af triam sithim. alnar langt ok alnar breitt. at þat se ferskeytt. ok tueggia alna hatt med. iiii. hornum. ok bua skaltu þat med gulle hreinu. suo brandreid sem ueggi ok horn. Gera skaltu ok koronu af gulli vmhuerfis alltarann ok hringa. ii. undir coronunni um sierhueriar sidur hennar. at þar megi staungum i stinga. at hon se aa staungum borin. þær steingr skulu giorðar uera af triam soethim. ok skaltu þær med gulli bua. Alltari skaltu setia firir utan orkina. at ek mæla þar vit þik. þa er Aaron berr reykelsi sætliga ilmanda. þa er hann kueikir lios aa morgin ok aptan. Eigi skulu þeir færa yfir þui reykelsi annarar samsetningar ok eigi forn. Bidia mun Aaron yfir horn alltarans vm sinn aara i blodi þui er fært er yfir ættir ydrar firir synd. Gud mællti þa enn vit Moysea. Gera skaltu uatn (ker) eirligt med knut sinum. at þuo megi menn ser þadan af. þat uatnker skal uera i uitnisbud ok alltara. Af þui uatnkeri skal Aaron ok synir hans þuo hendr sinar ok fætr. þa er þeir ganga inn i vitnisbud til alltara. at þeir færi fornir drottni. at eigi berizt suo at. at þeir (deyi). Laugsamt mun þetta vera ok eilift Aaroni ok sonum hans ok kyni hans.
Gud mællti enn vit Moysen. Se herna. ek kalla af nafni Beseel son Huri sonar Hurr af kyni Judas. ok fyllda ek hann minum anda ok speki skilningar i aullu uerki at smida gull ok silfr eir ok marmara ok gimsteina ok tre. ok ek mun gefa felaga þann er Chobab heitir son Josamek. hann er af kyni Dans. Ok setta ek i biarta þeirra speki allz hagleiks at smida alla hluti þa er ek baud þeim at gera. sattmalsbuud ok uitnisaurk ok skrifunarfiol ok aulker ok alltara ok kertistikur ok heilug klædi. ok alla hluti þa er ek baud þer at gera. Gud gaf Moysi tuær steintabulur. aa þeim hafdi gud ritad med fingri sinum. x. laga bodord þau er hann baud Gydingum.
Þa er Gydingar sau (at) Moyses dualdizt leingi aa fiallinu. þa saumnuduzt þeir saman ok foru aa fund Aarons ok mælltu. Gerr þu oss god þau er firir oss fari. þuiat ver uitum eigi huat af þessum Moysi er ordit er oss leiddi burt af Egiptalandi. Aaron suarar. Taki þier eyrnagull kuenna ydarra sona ok dætra ok færit mer. Lydrinn gerdi sem Aaron baud. Þui baud Aaron at þeir skylldi færa honum eyrnagull sin. at hann uisse at þeir ætludu þar skurgod af at gera. Aaron let þat gull i elld bera. ok ætladi suo at lemia firir þeim skurgods smidina. Enn er gull tok at brenna i afinum. þa snerizt þat i nautz likneski. vaxit sem kalfr enn litt sem eir. En er Gydingar sa þetta undr er uordit var. ok þat uar likneski er ordit var i afinum. þa mællto þeir. þetta gud hefir leitt oss aa brott af Egiptalandi. Ok er Aaron sa at þeir villdi blota kalfinn. þa gerdi hann alltari firir þui gudi. ok let blasa til motz ok mællti. A morgin er hatid drottins. ok dualdi suo blotid. Um morgunin eptir risu Gydingar snemma vpp ok færdu fornir skurgodinu. ok sat lydrinn at at eta ok drecka. ok þa risu þeir vpp at leika. Gud mællti þa vit Moysen. Far þu ok stig nidr af fiallinu. þuiat lydrinn misgerdi. sa er þu leiddir i brutt af Egiptalandi. ok hafa þeir skiott i burt farit af þessi gautu er þu syndir þeim. ok þeir hafa gert sier kalf af malmi ok vegsama nv hann ok færa honum fornir ok mæla suo. þetta gud leiddi oss aa burt af Egiptalandi. Sa ek sagdi drottinn. at lydr þessi er med hordum suira. Lofa þu mer at hefnd min reidizt i gegn Gydinga lyd. enn ek mun gera þik mikinn mann. Moyses bad þa til drottins ok mællti. Heyr þu drottinn. firir hui reidizt hefnd þin i moti lyd þinum. þeim er þu leiddir aa brutt af Egiptalandi med micille ok styrkri hendi. Bid ek þik drottinn minn. at eigi segi egiptzkir menn. Suikliga leiddi gud þa aa brutt hicdan. at hann drepi þa aa fiollum ok mai þa af iordunni. Bid ek þik drottinn. at huilizt reidi þin ok vertu sefadr yfir illzkur lydssins. Endrminnztv Abrahams. Ysaacs ok Jacobs þræla þinna. þeim suardir þu um sialfan þik ok mælltir. Margfallda mun ek kyn ydart suo sem stiornur himins. ok alla iord. þa er ek sagda fra. mun ek gefa kyni ydru. ok munu þier hana eignazt at eilifu. þa for Moyses af fiallinu ok hafdi i hendi sier. ii. tabulur. þær er drottinn hafdi badu megin ritad sinne hendi ok gerurr. Ok er Josue for ofan firir fiallit med honum þionn hans. þa heyrdu þeir þyss æpanda lyds. Josue mællti þa vit Moysen. Herop er at heyra i herbudirnar. Moyses suaradi. Eigi er þetta herop er ek heyre. helldr er þat raudd syngiandi manna er ek heyre. Ok er Moyses nalgadizt til herbudanna. þa sa hann blotkalfinn ok flocka þeirra manna er þar haufdu bring um slegit. Hann reiddizt þa miog ok kastadi nidr tabulum badum þeim er hann hafdi i hendi. suo hart at þær brotnudu badar i fiallzhlidinne. Hann hliop þa at blotkalfinum ok braut hann allan i sundr ok brendi. suo at hann vard at ausku einne. þeirre ausku sneri hann i uatn ok gaf Gydingum at drecka af þui uatni. Moyses mællti þa vit Aaron. Huat giordi þier lydr sia er þu leiddir yfir hann enn mestu synd. Aaron suaradi. Reidzt eigi þu mier drottinn minn. þa uisser huern veg lydr sia er. at hann er iafnan buinn til illz. þeir mællu vit mik. Ger þu oss skurgod þau er firir oss fari. þuiat ver uitum eigi huat af þessum Moysi er ordit. Ek suarada þeim. Færi þer mer gull ydart. þeir giordu suo at þeir færdu mer gull. ek kastadi þa þui i elld ok snerizt þat i kalfs likneski. Moyses sa þa at lydrinn var naucktr. þuiat Aaron hafdi rænt hann firir tignum skurgodsins ok sett naucktan medal fianda. Moyses stod i hlidi herbudanna ok mællti. Ef nauckur madr er guds her. þa fari sa hingat til min. þa saumnuduzt saman synir Leui ok foru þangat sem Moyses uar. þa mællti hann uit þa. Vopnizt þier nu ok farit fra hlidi til hlids um mitt herbudanna. ok uegit þa menn sem firir ydr uerda. ok uægit aungum manni þeim er firir ydr uerda. eigi brodur eigi uin. eigi naungi. Synir Leui gerdu sem Moyses baud. ok aa þeim degi fiellu. iii. þusundir manna. Moyses mællti þa. Helgudut þer hendr ydrar i dag drottni. huerr yduar sem sonu aa. ok brodur sinum segi at ydr gefizt blezun. Suo segia sumar bækr. at Moyses stauckti uatninu þui er hann hafdi blandat uit ausku blotkalfsins yfir folkit. ok festizt vit þa eina sandr oskunnar. er sakbitnir voru af blotinu. ok hefdi synir Leui þat til marks hucria þeir skylldu vega. er sandr gullzins var festr annathuort i harinu eda skegginu mannanna. A odrum degi eptir þenna atburd mællti Moyses uit lydinn. Misgiordu þer ena mestu synd. þuiat ek mun vpp stiga til drottins. ok uita ef ek mega þiggia af drottni likn firir synd ydra. Moyses bad firir lydnum til drottins ok mællti. Bid ek þik drottinn. þo at lydrinn sia misgiordi vit þik ok giordi sier gud af gulli. at þu firirgefir þeim synd þessa. Enn ef þu giorer eigi þat. þa ma þu mik af þeirri bok er þu skrifadir. Drottinn suaradi honum. Af mun ek ma af minne bok þa er vit mik misgiordu. Enn þu far ok mæl vit lydinn þat sem ek mællta vit þik. Eingill minn mun firir þier fara. enn ek mun uitia þessa synd aa hefndardegi.
Moyses mællti uit drottinn. þu bydr at ek leida lyd þenna. enn þu segir mer eigi. huern þu sendir til þessa uerks þann er sendandi er. Ef ek fann myskunn i þinu augliti. þa syndu mer gautv þina. at ek uita þik ok finna ek myskun firir þinu augliti. Littu lyd þinn ok þiod þessa. Gud mællti vit Moysen. Andlit mitt mun ek lata firir þier fara. ok huild mun ek þier gefa. Moyses mællti. Eigi leidir þu oss ur þessum stad. nema þu sialfr farir firir oss. Eda huersu ma ek eda lydr þinn vita. huort uer haufum fundit myskunn i þinu augliti. nema þu farir med oss. at uier dyrkimzt af aullum lydum þeim er aa iordu ero. Gud mællti þa uit Moysen. Gera mun ek þetta ord er þu mælir. þuiat þu fant myskunn firir mier. ok uissa ek þik sialfan at nafni. Moyses mællti. Syndu mier dyrd þina. Gud mællti. Allt gott mun ek syna. ok miskunna mun ek þier. ok milldr mun ek þeim uera er mer likar uel uit. Enn eigi muntu sia mega andlit mitt. þuiat eingi madr mun mik sia mega suo at hann life. Se herna sagdi drottinn. nær mer er stadr. sa er þu munt standa yfir stein. Ok þa er framm mun fara dyrd min. mun ek sitia uit rauf þa er aa steininum er. ok mun ek hlifa þier med hægri hendi minne. þa er ek fer framm. Ok taka mun ek haund mina. sia muntu bak mitt. enn andlit mitt muntu eigi sia mega.
Giorr þu tuær tabulur af steine þeim er þu attir fyrri. ok mun ek rita aa þeim þau ord sem uoru aa enum fyrrum tabulum. Vertu buinn snemma aa morgin. at þu stigir upp aa fiallit skiott Sinai. Ok standa muntu hia mer yfir buirfil fiallzins. enn eingi madr skal med þer upp stiga aa fiallit. ok eigi skal fenadr fædazt aa fiallinu. Moyses gerdi sem gud baud. hann gerdi. ii. tabulur af steine þuilikar sem hann hafdi fyrr giort. Hann reis upp snemma um morguninn ok for upp aa fiallit. sem gud baud honum. ok hafdi tabulurnar i hendi sier. Ok þa ste drottinn nidr i skyi yfir fiallit. Moyses stod þa hia honum ok kalladi aa nafn drottins ok mællti. Heyrdu drottinn. milldr ok myskunnsamr. styrkr ok þolinmodr. sannr ok fullr mikillar myskunnar. þu er vardueitir miskuan i þusundir. þu er aa brutt færir uorar illzkur ok aa brutt tekr glæpi ok syndir. ok (engi) madr er saklauss vit þik um sialfan sig. þu er gelldr illzku fedra i sonum ok sonarsonum allt i þridiu ætt ok fiordu kynslod. Moyses fiell þa skiott til iardar ok mællti. Ef ek fann myskunn i þinu augliti drottinn. þa bid ek þik at þu farir med oss. þuiat lydr sia er med hordum suira. bid ek at þu færir aa brutt illzkur. ok eignazt þu oss. Drottinn mællti þa. Ek mun sattmal mitt gera med ydr at ollum asiaundum. ok ek mun taka gera. þau er eigi munu fyrr hafa sen uerit aa iordunni þuilik ok med aungum þiodum. at lydr sia uiti. er þu styrir. ogurleik drottins um þat er ek mun gera. Vardueittu alla hluti þa er ek baud þier. Moyses var aa fiallinu med drottni. xl. daga ok. xl. natta. suo at hann át eigi ne drack. Gud ritadi þa aa tabulum tiu laga bodord. suo sem fyrr hafdi hann ritad. Eptir þat ste Moyses af fiallinu Sinay ok bar tabulur þær i hondum sier. ok uoru horn uaxin aa hofdi honum af samuelldi gudligs mals. ok uisse Moyses þat eigi. Ok er Aaron ok synir Israel sau hyrnda aasionu Moysi. þa hrædduzt þeir ok þordu eigi at ganga at Moysi. Moyses kalladi aa þa ok bad þa eigi hrædazt. Ok þa for Aaron til fundar vit Moysen ok hofdingiar Gydinga lyds. Moyses sagdi lydnum þa hluti alla er gud hafdi mællt vit hann aa fiallinu. Lydrinn mællti þa. Alla hluti munu uer gera þa er gud baud. Moyses huldi asionu sina. þa er hann taladi firir folkinu. þuiat Gydingar hrædduzt hans hyrnda aasionu. Enn þa er hann geck til mals uit drottin. þa tok hann af haufdi sier þa hulning er hann taladi vit gud.