Bókastaðir

Fra Moyses er guð vitraðiz honum ok sagði honum fyrir.

Moyses for medr allt sitt folk ok forunøyti af Marath i þann stad sem Helym heitir. vrdu þar fyrir þeim. xii. brunnar. ok. lxx. palmtrea. [scolastica hystoria. Segir Josephus at brunnar þersir höfdu sua litit uatn. at þat hit litla uard bædi leirugt ok saurugt sem þeir fengu medr höndum sinum upp ausit. Af þii sama urdu palmtrein þar miklu lægri enn i odrum stödum er þeirra nattura til. at þeim uard þar uökuskertr til uaxtarins. Exodus. þadan foru þeir aa hinum. xvda. degi til annars manadar fra þi sem þeir gengu ut af Egiptalandi um þa eydimörk sem Syn heitir. huer er liggr millum [þersa stadar Helym sem nu uar fra sagt ok fiallzins Synay.

Ok af þi at þa hafdi upp gengit allr þeirra kostr ok uistir. sem þeir höfdu medr ser brott flutt af Egiptalandi. þa kiǫrdi allr Jsraels suna fiöldi sik i fastafari þar um eydimörkina murrandi ok mauglandi moti þeim badum brœdrum Moysi ok Aaron. sua segiandi. Betr mættim uær medr guðs ualld ok uilia aa Egiptalandi dait hafa. sua sem uǫr saatum yfir sodkötlum. þann tima sem kiöt uar sodit. ok atum sua brauðit i nog sem sealfir uær uilldum. Fyrir hueria skylld lockudut þit ok leiddut oss til þers hegat i eydimörkina. at þit drepit allan þenna maunfolda med hungr ok saara sullt. Eptir þat taladi gud sua til Moysen. Af himninum ofan man ek lata rigna ydr fædzlur. gangi þa allt folkit ut lesandi ser ok samnandi dagliga sua mikit. at huerium sem einum uinniz dag fra degi. til þers at ek proui huart er þetta folk uill eptir minum uilia ok lögmaali framm fara eðr eigi. A hinum setta degi skulu þer tueggia daga kost ok atuinnu saman taka ok ydr til bordz bua. þiat þer skulut hiun. viida. daginn sua um þetta sem allt annat heilagt halida.

Moyses ok Aaron taladu þa til allra iafnsaman Jsraels suna. At apni manut þer uita ok uidrkennaz. at gud drottinn hefir ydr ut leitt ok i brott af Egiptalandi. ok at morni munut þer sealfir hans dyrd mega sea. At aptni man hann ydr gefa kiðt enn at morni braud nogt sem þer uilit sealfir. af þi at hann heyrdi ydart kallz ok kicrur sealfum honum. edr huat erum mit brødr. Ekki er þersi murran edr umlestr görr i gegn okkr utan helldr i gegn sealfum gudi. Moyses taladi þa til Aarons. Seg ollum Jsraels suna fiolda. at hann gangi framm fyrir gud drottins auglit. Nu sem hann gerdi sua. sem honum uar bodit. ok hann taladi fyrir folkinu. uard honum litit til eydimerkrinnar. ok saa at guds dyrd birtiz i skyinu. sua at hann taladi til Moysen sua segiandi. Heyrda ek Jsraels suna kurr ok kiæru. at aptni man ek yðr gefa kiðt at ela. enn um morna munut þer uid braud fædaz ok saddir uerda. uitandi þat at ek er ydarr guð drottinn. Bar þat ok sua til um aptaninn. at sua margr sa fugl sem colurnix beitir. ok uær kollum akrhænu. kom upp af þeirri rauda hafs halfu sem fiordrinn Arabicus er kalladr. þar sem hann fædiz einkannliga. at hann huldi driugum allar herbudirnar. sua at allr Israels lydr matti sua taka hann sem hann uilldi ok hann til lysti. scolastica hystoria. þenna fugl kallar Josephus ortigiam. enn Girkir kalla hann ortogomenam. huera er almenningr kallar af sinni raas curlerum upp i latinu. Eun um morginn eptir kom su dǫgg af himni umuergiss allar þeirra herbudir. sua sem Moyses hafdi bediz fyrir. at hon loddi ok limdiz uid hendrnar. sua sem aa henni uar tekit. Hugdu þeir i fyrstunni sem þeir saa. at hagl eðr béluskur nockur mundi fallit hafa. þiat þat uar upp aa þann haatt huitt ok smakornott uaxit ok uordit sik. Enn sua sem þeir kendu þat sua sætt sem hunang i bergingunni uera. enn sáá at eydimǫrkin uar ǫllum megin af þersu hulit i hia þeim. sua sem af helu edr sniohuitum haglkornum. þa talaðu þeir sin i milli ok toku sua til ordz. Manhu. þat hefir sua mikit at þyda. huat er þetta edr huat hefir þetta at merkia. þiat þeir uissu eigi huat er þeir sáá. þaðan af uar þat sidan kallat manna. er þeir sogðu sua spyriandi manhu. þat sama kollum uær himnamiol edr himnafædu.

Exodus. Moyses svaradi þeim ok sagdi sua. þetta er su fædzla sem gud drottinn hefir ydr gefit til fædzlu ok uidrliíss. Er þat hans ord ok bodskapr. at huerr sem einn af ollum ydr lesi ok saman taki sér til kostar ok eins dags atuinnu þa mæling sem gomor heitir fyrir huern mann ok eigi meira. þeir gerdu sem gud hafdi bodit þeim. at þeir lásu manna saman um morgininn. fyrir þann skylld at þat brádnaði um miðdegis skeið. ef þat uar þa handlat ok samantekit. Enn þo at annarr tóki ser miklu meira enn annarr minna. þa hafði sa eigi meira sem mikit hafdi samantekit. ok eigi helldr sá minna sem litit hafdi samantekit. utan helldr hofdu allir iafnmikit eptir fylliingu fyrr nefndz kers gomor. sua huerr sem þurfti. Liettliga at þat uar i einn stað nidrlagit. sua sem þat uar samanlesit. ok þaðan fyllt sidan sérhuerium ok fengin þersi mæling. ella hitt at huersu mikit sem einnhuerr hafdi lesit ok uti samantekit. þa fann hann eigi þi meira edr feck þar af. þann tima sem hann kom heim til sealfs sins. enn mælikerit gomor. Vard þat ok miok merkiliga ok taknsamliga. at su mæling nægdiz aullum slétt. [scolastica hystoria. Sua uar þat ok eigi siðr. at þar sem manna brádnaði um middegis skeid af solarhitanum. ef þat uar þa uti handlat ok halldit. þa hardnadi þat cigi sidr uid elldinn. þiat sua biuggu þeir þat [til fædu ser. at i fyrstunni molu þeir þat i sundr sem smæst. knodadu sidan saman semiandi ok bakandi þaleidiss uid elldinn [sem annat brauð. þat hafdi hardla sætan saporem i sealfu sér. Sumum uard þers ilmr ok angi þi likastr sem hunangbakat similiubraud. ðdrum uard þat þi likt i munni sem þat braud sem medr oleo er bakat. Enn med huerium sem einum hafdi þat þann þef mest i munninum ok bergingunni sem sealfum honum likadi bezt ok hann lysti mest.

Exodus. Moyses baud þeim. at ekki u ę tta skylldi eptir ucra til morgins af þi sem þeir hofðu samanlesit adr um daginn. Nockurir af þeim gerdu moti þersum hans bodskap ok uardueittu til morgins þat sem af gekk um kuelldit. Var þat þa þegar allt alrotit ok uall upp af moðkum. Reiddiz Moyses þa folkinu ok ásakadi þa um sina afgord. Las þa huerr sér um morgininn sua mikit sem honum uannz þann dag til kostar ok atuinnu. þiat þat brádnadi sua sem solin skein sem biartaz. Moyses baud þeim. at þeir læsi sér ok tæki tuifalldan kost aa hinum. vita. degi uiku. sua at huerr madr tæki þa. ii. fyrr nefnd mæliker gomor. vynni þa sydi ok matbiöggi alla þa luti sem þeir þyrfti aa laugardaginn at hafa. Sagdi hann þeim sua. at laugardagsins huilld helgadiz af sealfum gudi. þeir gordu sem hann baud. at þeir uardueittu til laugardags morginsins þat sem aa freadaginn leifdiz. funadi þat medr öngu moti ok eigi fannz þar nöckurr madkr i. [scolastica hystoria. Eru þeir þo nokkorer sem segia. at enghen af þeim lese meirr enn eitt meliker helldr a hinum. viida. deghi enn oðrum doghum. hefer saa kostr þa meðr iarteghnum sua fiolgaz ok aukaz. at hann skylldi vinnaz vm. vii. dagha. Hafa þeir þat fyrir seer til sannaar þersa skilnings ok skilrekkiss. sem her er nokkoru sidarr lesit. at fyrir þa grein hefer guð drottinn yðr a hinum. vita. deghi tuifalldar vistir veitt.

Exodus. Enn sem laugardagrinn kom. þa gengu nockurir af Judum ut þers örindiss at lesa saman himnamiolit i moti guds bodskap ok Moysi. ok fundu þa huergi. Taladi gud þa til Moysen. Huersu lengi uilit þer eigi hallda mitt lögmaal ok at geyma minum bodordum

. Seait hedan af ok at geymit. at gud drottinn hefir yðr huilldardaginn gefit. ok fyrir þa grein hefir hann yðr aa hinum. vita. deginum tuifalldar uistir ueitt. Ueri huerr sem einn þa heima at sealfs sins. gangi engi ut af sinum stad ok heimili aa hinum. viida. deginum. ok halldi folkit hatidliga hinn. viida. huern huilldardag. Kalludu Israels synir þersa fædzlu sidan manna. sem fyrr uar sagt. Var þat sniobuitt ok sua uordit sik sem haglkorn. ok flestum uard þers sapor likastr hunangsbakaðu similiubraudi edr setum hueitissalla medr hunang. Moyses taladi þa enn til folksins ok sagdi sua. Gud drottinn bydr. at þer fyllit mælikerit gomor medr himnamiðlinu. til þers at þat uardueitiz ydrum kynkuislum til æuinligs minnis um eptirkomandi ueralldir. huersu hann fæddi ydr i eydimorkinni. þann tima sem þer voru utleiddir af Egiptalandi. Taladi hann þa sua til brædr sins Aarons. Tak þer eitt ker ok lat þar i sua mikit af manna sem mælikerit gomor tekr. hird þat sidan ok uarðueit i guds augliti. sua at þat geymiz um eptirkomandi alldir medr ydrum kynkuislum ok ættmonnum. eptir þi sem gud hefir boðit mer Moysi. Aaron gordi sem honum uar bodit. at hann let þat nidr i eina þa ringia sem af gulli uar gidr. ok hirði þat fyrst i þeirri litlu tialldbud. sem ebreskir menn segia at þeir hafi i fyrstunni haft. i huerri er þeir radfrottuz i sinum uandamalum uid gud drottin. Fæddiz allt Jsraels suna folk medr þersarri himnamiols fæzlu alla þa. xl. aara. sem þeir uoru i uegium i eydmorkinni. þar til er þeir komu til Chanaanslandz herada ok landamæra.

Fra ferð Jsraels suna af eyðimork ok þui er guð talaði við Moyses.

Eptir þersar iartegnir foru allir Jsraels synir i brott af fyrr nefndri eydimork Sur medr guds tilskipan. hafandi sinar dualir ok náttstadi eptir skyssins teiknan ok tiluisan. þiat þeir foru iafnan þar eptir ok fylgdu sem hann for fyrir. sem fyrr uar sagt. enn namu þa stadar ok settu sinar herbudir. er hann stóduadiz. Foru nu þar til er þeir komu i Raphadim seliandi þar ok festandi sinar herbudir. Enn fyrir þa sǫk at þar beid engiss kyns uatn folkinu til drykkiar. þa kiǫrdi þat sik fastafari þar um uid Moysen. bidiandi hann gefa ser nockut uatn at drecka. Hann sagdi þeim sua. Til huers deili þer upp aa mik. edr hui freistit þer guds drottins. þeir suaradu. Fyrir hui leiddir þu oss til þers ut af Egiptalandi. at þu dræpir her bædi oss ok börn uár ok þar medr allan uarn fenað af þorsta. Moyses het þa enn ok kallaði til guds drottins sua segiandi. Huat skal ek uidr þetta folk ok mannfiolda gora. Ek hefir her enn litla stund fylgt ok medr þeim farit. ok man hann nu skiott gryta mik uilia. Guð taladi þa til Moysen. Kalla medr þer alla hina fremztu formenn af Jsraels folki ok haf i hendi þer þann sama uönd. sem þu laust medr ána Nilum. ok far fyrir til fiallzins Oreb. man ek þar standa fyrir þer yfir þeim fiallzins [hellum edr steinum. sem þu skallt medr uendinum liosta. ok man þegar þar i mot or þeim sama steini sua mikit uatn framm fliota. at folkit man ual mega drekka. [scolastica hystoria. Oreb er einn partr af fiallinu Synay. aunnur ok i ödrum stad er hellan Oreb. huer er af þi uar kallat sua. at þar uar sa mikilsháttar madr drepinn sem Oreb het. exodus. Moyses gordi sem gud baud honum. ok þegar i stad flaut af þeim sama steini sua mikit uatn. at þeir allir fengu þar af i nog at drekka. Kalladi Moyses þann stad fyrir [þann skylld af þeirra kifan ok kallzi sua sem freistnanar stad. þiat þeir freistadu þar gud drottins sua segiandi. Huart er gud drottinn medr oss edr eigi. Aunnur [er þar sem motmælis uötn eru sidan kölluð. þoat iartegnin ok stormerkit se nockut likt. sem heyraz mun mega.

Fra þui er Josue barðiz við heiðingia. þann tima sem Moyses kom i Raphadim. sömnudu þeir heidnir menn herlidi saman. sem Amalechite uaru kalladir. ok foru medr þii sama herfolki i eydimorkina ok ætladu at beriaz medr Moysen ok hans menn. [scolastica hystoria. Strabus segir at Amalech het son Ysmaels Abrabams sunar. af huerium er Amalechite uaru kalladir enn stundum Ysmaelite. þeir hinir sömu ok allir einir eru ok Sarraceni. þersa segir Josephus hina mestu bardagamenn uerit hafa ok af nalægum þiodum til bardaga moti hinum ebreskum leigda hafa uerit. exodus. Nu sem Moyses spurdi til ufridar þeirra Amalechs manna. þa [valde hann þann einn hinn fremzta ok hinn fræknazta bardagamann af Jsraels [suna ætt. kominn af ætt Effraims Josephs sunar. ineðr fiam uépntum monnum til ferðar ok orrostu moti þeim Amalechitis. þann sem Jesus het ok ǫdru nafni Josue. enn leet mestan luta lydsins viðr herbudernar efter vera at geyma þeim ok ollu þeirra godzi. ok taladi sua til hans. Vel þer menn af uaru lidi til fǫruneytis ok framingǫngu medr þer moti þeim Amalechitis. sem flokk ok ufrid hafa efldan i moti oss. þiat i morgin skulut þer beriaz uid þa. Enn ek man fara upp aa fiallit. þangat sem ek megi uel sia til bardagans. hafandi uǫndinn mer i hendi ok bidiandi gud fulltings. Enn af þi at Josue uar einn raustr madr ok rettlatr. godr ok gudhræddr. þa gerdi hann eptir þi sem Moyses baud. at hann ualdi nokkura menn ekki miok marga til fylgdar ok bardagha medr ser moti þeim hinum heidnum. Enn Moyses kalladi brødr sinn Aaron til ferdar medr ser. ok þann mann annan sem Ur het ok uar bondi Marie systur Moysi. enn þo segir i þeirri bok sem Paralippomenon heitir. at hann uæri son Caleph ok Marie ok fodur fadir smidsins Bethel.

Foru þeir allir samt upp a fiallit. þar sem þat uar i hæra lagi. huadan er þeir mattu ual sea. huersu bardaginn gekk huarum Josue edr hinum heidnum. Ok þegar sem bardaginn tokz ok Moyses hellt upp hǫndunum til himins sua sem bidiandi til guds. þa hopudu heidingiar aa hæl ok flydu. Enn þegar i stad sem hann let þær nidr siga. huersu litla stund sem þat uar at hann hellt þeim eigi upp. þa gekk hinum heidnum betr. Nu af þi at Moysi uaru hendrnar miok þungar. en þeir Aaron ok Ur skildu þo. at bardaginn halladiz iafnan eptir þi áá hina heidnu sem Moyses hellt upp hǫndunum. þa settu þeir undir hann einn stein. á huerium er hann sat. Enn undir sina hans hand studdi huárr þeirra. ok liettu sua upp at honum skylldi þær eigi þyngiaz eðr dofna. ok helldu þersu framm allt til solar setrs. Flydu hinir heiðnu þa. enn Josue rak flottann ok drap þann dag margan mann af Amalechitis medr sinu suerdi. scolastica hystoria. J minning þersa handa upphalldz Moysi hefr prestrinn ok helldr upp sinum haundum i messunni. ok þo engum mun minnr i minning þers ok merking sem Jesus Cristus rétti sinar hendr bidiandiz fyrir áá hinum heilaga krossi. exodus. Eptir þat taladi gud til Moysen. Skrifa þenna sigr til æfinligs minnis upp aa þa bok. sem þu skallt Josue tiá ok i hendr faa. fyrir þi at ek man minning Amalechitarum eydaz lata manna i milli. Moyses gerdi sem gud baud honum. hann gordi þa ok guði alltari offrandi honum fornir kallandi þar medr ok heitandi aa sealfs hans nafn.

Her segir fra Moysi ok af tillaugu ok raðagerð Jethro.

Enn sua sem fyrr nefndr Raguel kennimadr af Madians landi. mágr ok frændi Moysi. huerr er odru nafni het Jethro. heyrdi frasagnir af þeim lutum. sem gud hafdi gert Jsraels folki fyrir sinn þionostumann Moysen. ok at hann hafdi þann sama lyd ut leitt af Egiptalandi. þa kom hann til fundar uid Moysen i eydimorkina. þar sem hann hafdi sinar herbudir sett uidr guds fiall Synay. sua framt sem hann fretti þat uissuliga. at hann uar þar kominn. flytiandi þangat medr sér dottur sina ok husfru Moysy Sephoram ok syni þeirra. ii. Gersen ok Elcazar. Ok þegar sem Jethro gordi honum bod. at hann mundi þar koma medr sunum hans ok husfru. þa geck hann blidliga i moti honum. heilsadi þeim ok mintiz uidr þau ok baud þeim heim til budar sinnar. Ok sem Jethro uar þar kominn. tedi Moyses honum innuirduliga oll þau tukn ok stortidindi. sem gud hafdi gort uid Pharaonem ok allt hans folk fyrir Jsraels skylld. ok huersu gud frealsadi þa af allri þeirri mædu ok erfidi. sem þeim hafdi i ueginum ok ferdinni til fallit. Jethro uard storliga gladr. sua sem hann heyrdi þersi tidindi ok stormerki ok huersu marga goda luti er gud gerdi Jsraels folki. ok sagdi sua. Blezadr uerdi gud drottinn. sa sem ydr frealsadi af Pharaonis ualldi ok hans folks áánaud ok ufridi. Nu skilr ek þat ok skyniar uissuliga. at herra gud drottinn er yfir ok um framm alla adra guda. Offradi Jethro þa gudi fórnir. eptir þi sem mágr hans Moyses sa fyrir. Enn eptir þat átu þeir Aaron med oðrum hinum fremztum Jsraels formonnum allir samt i guds augliti. [scolastica hystoria.] Augustinus syniz eigi uilia. at heidinn madr hafi gudi fórnfært. sua sem Jethro uar. Tekr hann helldr sua. at Moyses hafi fornfært af hans uegna. enn sidan hafi Jethro tekit sinn part af þeirri sómu fornfæringu ok etid. Liettliga at Moyses hafi þann tima þa sómu fornfæring offrat uidr fiallit Synay. sem gud baud fyrr meirr. þa er hann uitradiz honum i runninum. þiat Josephus segir Jethron þar hafa komit á fund Moysy uidr fiallit Synay. sem hann hafdi flestar synirnar ok uitranirnar i runninum seed. sem fyrr uar fra sagt.

Exodus. Annan dag eptir sem Jethro uar medr Moysi. bar sua til sem iafnliga kunni til koma. at Moyses sat allt fra morgins timanum ok til aptans yfir domum ok odrum uandamálum. Nu sem Jethro sa. at folkit stod allan daginn bidandi þar eptir allt til aptans. þa taladi hann til Moysen. Huat hefir þetta at þyda. sem þu gerir medr folkinu. þar sem þu sitr allan daginn dømandi einn saman allra manna máál. enn almuginn bidar þar eptir allan daginn fra morni til aptans. Moyses svaradi. Folkit kemr dagliga fyrir mik ok beidiz þann orskurd ok endalykt aa sinum málum. sem gud leggr raad á. Ok þegar sem þeim hefir nokkurs kyns grein edr áskilnadr til komit. þa fara þeir aa fund minn til þilikrar lausnar ok orskurdar. sem ek leggr raad áá medr guds bodordum ok lǫgmali þeirra i milli. Ecki er þetta god gord ne uitrlig sagdi Jethro. at þu bindir þer sua mikla ok þunga byrði. at þu fáir medr ongu moti borit. Fæz þu ok allt þat folk sem meðr þer er i hardla heimsligu hegomastarfi. þiat þetta starf allt saman er um framm þinn mátt ok megn. at þu megir þi einn saman efla ok orka. Heyr helldr mina tillaugu ok haf min rad. ef þer likar. ok mun gud drottinn medr þer uera. J ollum þeim lutum skalltu folkinu ok almuganum til reidu ok þeirra forsiomadr uera. sem gudi til heyra. segia lydinum innuirðuliga lagasetningar ok adra þa luti. sem af gudi ero til hans taladir. þu skallt ok skiluisliga skyra honum ok syna. medr huilikum hætti edr sidsemd er hann skal sealfan hann dyrka. ok þar medr huat er hann skal gðra ok i aullu fram fara. Vel sidan medr sealfs þins forsio af ollu þersu folki uolldugha menn ok ual gudrædda. þa sem sannleik prisi ok plagi enn hati ok fyrirsmái yfirgirnd ok aagirni. Skipa þa sem þer þickia bezt tilfallnir af aullum þeim sinn formann ok hofðingia. fyrst yfir sérhueria ætt ok kynkuisl. edr sua ok yfir serhueria þusund. þar næst hundrads hðfdingia. þeim næst þa sem forsio beri fyrir fimmtigum manna. eptir þat hina sem. x. manna formenn sé. at þersir dømi dagliga semiandi ok nidrsetiandi aull hin smæri mál manna i milli. Man þer þa miklu liettara falla. þo at þeir dæmi at eins um hin minni malin. enn hin se til þin lagit ok rekin. sem einna stærst ok mestháttar eru. Mant þu sua uel mega fylla guds bodskap ok efla ollu þinu starfi. ef þu hefir þaleidiss gort. ok sua man allt þetta folk medr fridi aptr fara til sins heimilis.

Scolastica hystoria. þat er mikilliga merkianda. at fyrrnefndr Jethro telr uolldugleik fyrst af þeim. iiii. lutum. sem hann teer ok synir. at medr þeim manni eru hugleidandi ok hæfir at séé. sem til formanz er takandi ok ueliandi. þiat hann stettir hardla mikit. ef hinir. iii. fylgia iafnframm ok fara medr honum. sem hann skildi til medr at þers háttar [menn skylldi uera gudrædir. elska sannindi. enn fyrirsma mutur ok aagirni. ella er þilikaz sem undirmenninir se bædi sottir med eitr ok suerd. Su uar ok hans rádagǫrd ok tilskipan. at huerr sa formadr sem yfir uar skipadr hueria sem eina Israels ætt skylldi þushundrads hǫfdingia hafa undir sér. enn huerr þeirra. x. hundrads hǫfdingia. huerr hundrads hǫfdingi. ii. fimtighe manna hofdingia. enn huerr þeirra. v. þa sem. x. manna formenn uæri. Skylldu þersir decani sem sidarstir uaru i formanna taulunni doma þau smæstu mal. sem til felli manna i milli ok eigi uæri fleiri i uafdir enn tiu. Tæki þeir eigi yfir. þa skylldi þi skiota æ til hins næsta formennz ok domara. ok sua fra huerium [til hins hæra doms. ok at sidarstu til sealfs Moysen; ef þers þurfti uid. ek uar þat hardla siallðan. utan þau hin stǫrstu maal sem honum einum saman til heyrdu. Vpp a þenna haatt helldr ok hefir heilog Romueria kirkia hardla margar stettir til skynsamligrar skodunar ok skilrikra málanna orskurda heilagri kristni. sua sem primates edr patriarchas. erchibyskupa ok lydbyskupa. erchidiakna ok erchipresta. ok þar medr hinir minni hattar kennimenn. þeir sem doma ok raad leggia aa medr monnum um hinar smæri sektir ok syndir. ok nókkurar eigi sidr þær hinar stœrri sem leyndar eru. enn hinum storum þeim sem opinberar eru stefna þeir ok hioda til byskups.

Exodus. Enn sem Moyses heyrdi þersa hans radagiord ok tillogu. þa giordi hann sua ok for her um allt þetta framm. sem hann hafdi fyrir sagt. Skammfylldiz eigi sia hinn heilagi madr Moyses. sem fullr uar af gudligri [tru ok giptu. at hafa þat raad. sem þersi hinn heidnai madr mágr hans hafdi talat ok til lagit meðr honum. Eptir þat gaf Moyses honum gott orlof. for Jethro sua aptr i sitt eigit land Madyan.

A þridia manadi eptir brottfaur Gydinga af Egiptalendi komu þeir i sudn Synay. þuiat þeir foru ur Raphedin i Sin. ok settu þar herbudir sinar vit fiall þat er þar var. Ok er þeir voru þar. þa talladi drottinn aa Moyses ok mællti. þessa hluti skalltu segia sonum Jacobs ok Israels. þer saud þa hluti er ek giorda egipzkum monnum. huersu ek bar ydr suo sem yfir arnaruængi ok vog ydr upp til handa mier. Nv ef þier heyrit raudd mina (ok) vardueitid þier saattmal mitt. þa munu þier vera mer einkannligr lydr af aullum lydum. þuiat ek aa alla iordina ok þer munut uera mier i kennimannligt riki ok i heilagt lan. Ok er gud hafdi þetta mællt. þa for Moyses ok kalladi aa kynstora menn ok sagdi þeim þat er gud hafdi mællt vit hann. Allr lydrinn suaradi honum. Giora munu uier þat allt er gud bydr. Nu er Moyses hafdi þessi ord lydsins framm rakit til drottins. þa mællti gud vit Moyses. Koma mun ek til þin i þoku skys. at lydr minn heyre mik mælanda vit þik ok trui þier at eilifu. Far þu ok helga folkit i dag. ok aa morgin þuoi þeir klædi sin ok se bunir aa þridia degi. þuiat aa þridia degi mun drottinn nidr stiga yfir fiall Sinay fyrir aullu folki. Mark skaltu giora umhuerfiss fiallit ok bioda aullum lyd. at þeir gangi eigi yfir þat mark aa fiallit. þuiat sa er gengr yfir þat mark. þa deyi hann dauda. Eigi skulu hendr (til) hans taka. helldr se hann grioti bardr edr skeytum raufadr. huort sem yfir merkit gengr menn edr fenadr. Ok er þeir heyra ludrinn syngia. þa rise aller upp ok gangi til fiallzins. Moyses sagdi lydnum þessi ord drottins. er hann hafdi mællt. Ok er þeir haufdu þuegit klædi sin. þa mællti Moyses. Verit þier bunir aa þridia degi ok halldit hreinlifi ydru þar til. Enn er enn þridi dagr var. ok um morguninn tok at skygia. þa heyrdu þeir reidarþrumur. ok þeir sa elldingar fliuga. ok þyck sky hulde fiallit. Ok aakafligr ludrablastr heyrdizt. folkit hræddizt þat er i herbudunum var þessar ognir. Allt fiallit Synay rauk. þiat drottinn ste nidr i elldi yfir fiallit. ok af þeim elldi rann reykr upp sem af ofni. Allt fiallit var ogurligt. ok ludrablastr ox i hærra hliod ok leingra. þa leiddi Moyses lydinn allann ut ur herbudunum at fiallinu. Gud mællti þa vit Moyses. Far þu upp ok Aaron brodir þinn med þer.