Bókastaðir

Her segir af Asenech dottur Putiphars.

A hinu fyrsta freoleiks aari af þeim. vii. sem Joseph sagdi fyrir at koma mundi. sendi konungrinn hann um allt Egiptaland. at hann leti saman taka hinn. vta. part af ollu hueiti. eptir þi sem fyrr uar greint. Hann kom framm i fyrr nefndri landzins haalfu Helyopoleos. Var þa Putiphar riddara hofðingi ok konungsins radgiafi þar uordinn kennimadr ok hǫfdingi. hann atti sér þa dottur sem Aseneth het. Ollum Egiptalandz iungfrum uar hon fegri ok frealsligri. i flestum lutum uar hon storliga lik ebreskra manna dotrum. hun uar hæuersk ok bar sik heidrsamliga. metnaðarsǫm uar hun sua ok mikillát. at engi karlmadr þotti henni sér iafnkosta. Engin karlmadr hafdi ok seed hana utan fadir hennar ok brædr. fyrir þann skylld at einn mikill turn ok miok haar uar aafastr husi ok herbergium Putiphars. yfir huerium er þat eitt lopthus var smidat. sem i sér hafdi. x. heimollig herbergi. þilik sem suefnklefar uæri. af huerium er hinn fyrsti ok fremzti uar fagrligha giðrr af þeim dyrmætum steinum sem porphiriti eru kalladir. ok allir hans ueggir uaru af einum ok ymissum aagiætum steinum gioruir. ok þar medr uaru hans fleyðr gulligar.

Bygdi Asenech medr sinum þernum þersor herbergi. Varu gud Egiptalandz manna. þau sem af gulli ok sylfri uaru giðr. geymd ok hird i þessum hennar heimolliga klefa. huer er seolf hon dyrkadi dagliga þeim fornfærandi. Annat þetta hit heimolliga hus edr klefi uar hennar fatabur. yfrinn rikdom i sér hafandi. þi at hann uar fullr af gulli ok brendu silfri. dyrum gripum ok dyrligum steinum. J þridiu sialfrar hennar heimolligu herbergi uar nær oll su giætzka sem dyrmætaz uar þar i landi. var þat hennar iurtaklefui. ok aull hennar krydd uaru þar geymd ok hirð. Adra klefa. vii. af þersum. x. heimolligum herbergium hofdu þær. vii. iungfrur harða fagrar. sem henni þionadu dagliga. vidr hueriar er engin karlmadr hafdi nockut ord talad. huarki uaxinn madr ne smásueinn. A suefnklefa sealfrar Aseneth varu. iii. uænir gluggar. ok uar sa storliga mikill sem til austrs horfdi. annarr af þeim uar til sudrs. ok hinn þridi til nordrs. J þersum klefa uar ein sæng sua skemtilig ok skrautlig at sia upp aa. sem hon u ę ri af raudu gulli giðr. hon uar tialldat medr gulluofnum purpura sparlðkum. ok þar til medr iacincto ok einfǫlldum purpura ok bisso. i huerri er sialf hon suaf ein saman. Hia þessarri hennar sæng hafdi engan tima karlmadr niðr setz. Vmuergis þetta hit agi ę ta hus ok herbyrgi allt saman uar einn mikill grasgardr. ok miok haar uar allr hans murr giorr af ferhyrndu grioti. A gardi þersum uaru. iiii. iarnport. þau sem. iiii. hinir fegrstu ungir menn uel u ę pntir uaru fengnir til at geyma allir samt. A hægra uegna i gardinum uar ein fǫgr fliotandi uatzædr. ok eitt fagrt stǫduuatn ok sua skiært þar i hia. at þar matti ual sia i skuggann allra þeirra tria sem þar uaru plantad. er bædi uaru fǫgr ok frygdafull. Aseneth uar sua mikil sem Sarra. sua fogr ok frid sem Rebeccha. ok þaleidiss u ę n ok at ollu uel uordin sem Rachel.

Her segir af Joseph ok Putiphar ok dottur hans.

Joseph gerdi fyrr nefndum Putiphar sendibod. at hann mundi eikia til hans herbergiss. Tok Putiphar þi feginsamliga. ok sagdi dottur sinni at guds mektugr madr Joseph mundi þar koma. ok hann mundi eigi uanda at gipta honum sialfa hana. Vidr þersor ord reiddiz hon ok sagði. at hun hugðiz helldr skylldu giptaz konungs syni enn her-teknum kotkarls syni. ok henni þætti þat helldr eptir sinni mekt ok maneri. Fyrir þi taladi hon sua. at Pharao atti séér syni. sem sidarr man sagt uerda. Ok rett sem þau áttu her um at tala. var þeim sagt at Joseph var kominn. Geck Aseneth þa þegar upp i lopt-husit ok sialfrar sinnar herbergi. Joseph kom þa sitiandi i þeirri konungsins kerru sem ðll gloadi af gulli. hana drogu. iiii. fannhuitir hestar sem snior medr gylldum bitlum beittir ok beisladir. Joseph uar sua buinn. at hann hafdi alhuitan kyrtil miok biartan af bisso. ok þar yfir gulluofinn purpuramðttul. gullkoronu á hðfdi. ok uaru. xii. hinir dyrstu steinar umuergiss aa krununni. ok yfir þeim uaru markat. xii. gullig himintungl. konungligan rikissuðnd hafdi hann seer i hendi. ok þar medr einn kuist oliue medr hardla feitum ok fðgrum aauexti. Geck Putiphar ok hans husfru ut i mot hónum. lutu honum ok i ollum lutum uirding ueittu. Eptir þat gekk Joseph inn i gardinn. ok þegar uaru byrgð aull hans port. Nu séér Aseneth Joseph ut um einn glugg aa sinu herbergi. rugladiz hun þa þegar af þeim ordum sem hon hafdi til hans talat. ok sagdi sua. Séé her. solin sealf er komin i sinni kerru hegat til uár ofan af himni. Ekki uissa ek þat at Joseph uæri guds sun. ok huar man finnaz sa madr um alldr er þilika fegrd megi getit hafa. edr huerr konu kuidr megi liosit ok þilika birti borit hafa. Joseph geck þa inn i herbergi Putiphars. ok uaru þuegnir fætr hans. Eptir þat spurdi Joseph. huer su kona uæri er hann leit um gluggann aa lopthusinu. fari hon i brott sagdi hann. Fyrir þi taladi hann sua. at hann ottadiz at hon mundi þaleidis angra hann ok vnada. sem allar adrar konur þar sem hann kom. þær sendu þegar i stad sina sueina til hans medr einum ok ymissum dyrmætum giðfum. huerium er hann nitadi medr fullkominni ublidu. ok brott kastadi þeim til neisu ok nidranar sem sent hafdi. þa suaradi Putiphar. Minn herra. þersi mær er min dottir. su sem huern karlmann hefir fyrirlitit hegat til. hana hefir ok engin karlmadr seed utan ek ok þer i dag. Ok ef þer uilit sua. þa kemr hon her ok heilsar ydr. Joseph hugsadi þat er hun fyrirleit huern karlmann ok hatadi. at alldrigi mundi hun þa þrábøn edr ofblid uidr hann uera. ok taladi sua til fedr hennar. Ef dottir yd (u) r er skivr iungfru. þa elskar ek hana sem systur mina. Gekk modir hennar þa upp til hennar kallandi hana nidr ok frammleidandi fyrir Joseph. Fadir hennar taladi henni sua til. Heilsa brœdr þinum. þeim sem aa saumu leid hatar ok fyrirlitr allar þær konur sem annars kyns ok kindar eru enn hann. sem þu fyrirlitr alla karlmenn. Aseneth taladi til Josephs. þu blezadr af hinum hæsta gudi uer heill ok uel kominn. Joseph suaradi. Sa gud sem alla luti lifgar blezi þik. Putiphar bad þa dottur sina minnaz uid Joseph ok kyssa hann. Ok sem hun ætladi þat at gera ok gekk at honum. þa retti hann hǫndina framm. takandi moti hennar briosti ok bringu sua segiandi. Meðr ǫngu moti stendr þat. at sá madr sem lifanda gud dyrkar ok lifsbrauð etr ok heilsamligan dryck dreckr. kyssi þa konu sem af heidinni þioð er getin. ok hon dyrkar ok kyssir dauf ok dumba skurdgod. etandi braud sitt ok aðra f ę du af þeirra bordi. ok dreckandi sinn drykk af þeirra kerum ok kaunnum. ok smyriandi sik medr þi oleo. sem uarla uerdr skodat eðr skyniat huelikt þat er.

Her segir af þui er guðs engill vitraðiz Asenech.

Aseneth uard storliga rygg heyrandi þessor hans orð. sua at nu tok hun at grata. Joseph leit þaa miskunnar augum til hennar. ok lagdi hann sina hond yfir hennar hǫfud ok blezadi hana. Aseneth gladdiz nockut sua af hans blezan. enn þo skyndi hon heim til sins herbyrgis. ok kastadi ser þar nidr uidr sængina af þeim krankleika sem hon hafdi fengit af þeirra fundi ok vidtali. Jdraðiz hon þa þers mikilliga. er hun hafdi gudin dyrkat ok afnitti þeim þa fulluliga. Joseph aat þar ok drakk. ok eptir þat bioz hann til brottferdar. Putiphar beiddiz at hann mundi dueliaz þar um einn dag. ok feck hann þat eigi. For Joseph i brott ok het at koma aptr þagat eptir hina næstu. vii. daga lidna. Aseneth klæddi sik einum suortum kyrtli. huerr er hennar hrygdarklædnadr hafdi uerit. þann tima sem hinn yngri brodir hennar hafdi andaz. Byrgdi hon sik eina saman i nǫckurum klefa lokandi siolf hurdirnar. ok gret þar. Aull sin skurdgod kastadi hon ut um þann glugga. sem nordan uar aa fyrrgreindu herbyrgi. ok huerium þeim hofdingligum rett sem henni uar settr kastadi hon aa golf framm ok gaf hundum at eta. enn ios molldu ok ðsku upp i hðfud sitt ok um allt herbyrgit. ok grét alla þersa. vii. daga miok saarliga. A hinum áttanda degi uard henni litit miok aarla ut um þann sama glugga sem til nordrs horfdi. sua sem hon heyrði hunda geyia ok hana gala. Ok er hon saa ut. þa birtiz henni su biarta stiarna nærri sealfum himninum sem Lucifer heitir. ok þar med sua mikit lios. at hon gat eigi stadiz. ok af þi fell hon aa framm sinar hendr ok aaseonu i þa ausku sem aa golfinu uar. ok henni syndiz. þar sem hon laa. sem madr nockurr stigi nidr af himninum ok stædi yfir hennar hðfdi kallandi hana medr sinu eiginligu nafni. Enn af þi at hun þordi sakir rædzlu ok mikils ótta aungu uætta at suara. þa het hann aa hana annan tima sua segiandi. Aseneth. Aseneth. Hun svaradi þa. Ek er her minn herra. edr huerr ertu. seg mer þat. Ek er hofdingi guds huss sagdi hann. ok ek er hðfdingi yfir sialfs hans ulgordum ok herferdum. Ris upp ok statt aa þina fætr. man ek þa tala medr þik. Ok er Aseneth freistaði aa fætr at fara ok hon hof sitt hðfud upp. þa syndiz henni saa madr um alla luti likr Joseph. at klædnadi. krunu ok konungligum rikisuendi. sem þar uar kominn. Hans aasiona uar þilik sem ellding. augun sem solar geislar. enn haarit ok hans lockar sem logandi elldr. Ok sem Aseneth saa þetta. uard hon sua ottafengin. at hon fell framm annan tima. Engillinn sa sem henni uitradiz i manz mynd styrkti hana þa léttandi upp aa sina fætr. ok sagdi sua. Legg nidr þetta hit suarta haarkleði. sem þu hefir klætt þik med. ok hrygdarlinda þann sem þu hefir um þinar lendar. skak i brott or hðfdi þer dupt ok osku ok þua bædi hendr þinar ok aasionu i skigru uatni. ok klæd þik fagrliga med hinum heidrligztum þinum klædum. ok eptir þat man ek tala uid þik. Ok þegar sem hun hafdi eptir hans áákuædi um buiz. þa kom hon skiotliga aptr til hans. Kasta af hðfdi þer skautum ok hðfudduk. þiat þu ert skigr iungfru. Styrkz þu ok fagna iungfru Aseneth. fyrir þi at nu er þitt nafn aa lifandi manna bok skraad ok skrifuat. ok æfinligha man þat alldrigi af mááz. Ek segir þer þat ok synir uissuliga. at upp fra þersum degi ert þu endrnyiat ok lifgat. Munt þu blezanar braud eta ok heilsamligan dryck drecka. þiat medr heilagri krismu mant þu smurd uerda. See her i dagh gef ek þik Joseph til brudar ok eiginhusfru. Man þitt nafn eigi uera kallad Aseneth sem mikilsháttar hlifdar borg edr uerndar. fyrir þi at idran þin bad hinn hæsta gud fyrir þer. huer er uordin dottir þers sem haleitaztr er. glöd ok god guds iungfru hæuersk ok hááttsöm. Ok er engillinn uar eptir frettr af Aseneth. huert hans nafn uæri. þa svaradi hann sua. Medr guds hand ok fingri er mitt nafn skrifuat aa þers bok sem haleitaztr er. eru þeir allir lutir oumræðiligir sem aa þeirri bok eru skrifadir. ok engum daudligum manni samir þa at segia ok eigi helldr heyra.

Her segir fra viðtali þeirra Aseneth ok guðs engils.

Aseneth taladi þa til engilsins halldandi aa ofuanuerdum hans möttli. ok sagdi sua. Ef ek hefir nöckura giptu fundit ok fengit i þinu augliti. þa setz nidr um eina litla stund hia sæng þersarri. hia huerri er alldrigi sat enn nockurr karlmadr. ok man ek bua þer bord. Engillinn suaradi. Lat framin koma at þi skiott. Setti hon bordit buandi þat medr hit bezta braud ok sætt uin ok med gaumlu oleo. Ber mer ok hunangs seim. sagdi engillinn. Ok sem hun stod rygg af þersum hans ordum. fyrir þat er hun hafdi engan seim at faa honum. þa sagdi hann sua. Gakk inn i kiallara þinn. ok þar aa einu bordi þinu mantu hunangs seim finna. Vard henni þersi uán eigi at hegoma. at hun fann þar sua huitan seim sem snior uæri ok hit skiernazta hunang gefanda hinn sætazta ilm af ser. Aseneth taladi þa til hans. Eigi hafda ek seiminn minn herra. helldr hitt at hann uard þegar þu taladir ok nefndir medr þinum helgum munni. huadan er hans ilmr man rett þilikr sem af sealfs þins [anda. er ferr af þinum munni. Engillinn hlo þa lettliga at skilning ok skynsemd Aseneth. Retti hann þa framm hondina. leggiandi hana yfir hennar höfud sua segiandi. Sæl ertu. fyrir þat er þu hafnadir skurdgudum ok fyrirleitz þau ok trudir upp aa lifanda gud. ok allir þeir eru sælir sem med idran koma til hans. þiat af þersum hinum sama seim munu þeir bergia. sem [guds byflugur af paradiso hafa saman borit. ok af rosauatni paradisi munu þeir drekka. ok her af bergia allir guds englar. deyia þeir ok alldrigi æfiliga. sem af honum hafa nockurn tima etit. Hann retti þa enn framm hǫndina. ok tok einn hardla litinn part af seimi-num ok áát sealfr suman. enn þat sem eptir var af honum lagdi hann i munn Aseneth. talandi til hennar þar med þersum ordum. See nu átz þu lifs braud. ok nu ertu smurð medr heilagri crismu. man þilt holld upp fra þeima degi endrnyiaz. ok hedan af munu þin bein bætaz ok grædaz. vþrotnandi man þinn kraptr uera. enn æska þin man alldrigi elli kenna. ok alldrigi man þin fegrd faulna. mantu þilik uera sem smidat hofudborg ollum þeim. sem sinni uan uenda flyiandi til nafns almattigs guds. þess sem allra uerallda konungr er. Hann retti þa enn framm hǫndina. ok tok þann seim sem hann hafdi fyrr sagdan part af tekit. uard hann þa þegar heill ok uskaddr sua sem adr uar hann. Tok hann þa medr sinni hægri hendi ofanuerdan seimsins part. þann sem til austrs uissi. medr þeim fingrinum einkannliga sem þumalfingrinum uar næstr ok tilsagnarfingr heitir. dragandi hann at ser til neðanuerdz seimsins. þers sem til uestrs uissi. Syndiz Aseneth þa sem bloð uæri alla uega. þar sem hann hafdi fingrinn um dregit. Sia nu seiminn sagdi engillinn. Sa hon þa. at margar huitar byflugur sem snior flugu ok foru utan af seiminum. enn sumar af þeim hofdu raudan purpura lit sem iacinctus. kringdu þær allar um Aseneth saman berandi ok gerandi af nyiu hunangs seim i hennar hǫndum. átu þær ok þar af. Eptir þat taladi engillinn til byflygissins. Farit nu brott i þann stad sem ydr til heyrir. Hurfu þær allar þadan þegar i stad. ok uendu sinum ueg til paradisum i austr. Engillinn taladi þa til Aseneth. A somu leid eru þeir allir lutir sannir. sem ek hefir talad fyrir þer i dag. sem byflugurnar foru brott i þann stad sem ek uisada þeim. Hann retti þa enn þridia tima framm handina ok tok upp seiminn. kom þa elldr upp þar rett af bordinu ok eyddi ollum þeim seiminum sem eptir hafdi uerit. snart hann þo medr engu moti bordit. Vard af seimsins bruna hardla sætr ilmr ok angi. enn bordit var sua medr aullu ubrunnit. sem engan tima hefdi þi elldr námunda komit. Aseneth taladi þa til engilsins. Seau iungfrur eru her dag-liga hia mer minn herra. þær sem fra barndomi hafa her upp fædz medr mer. varu þær ok aa þeirri sǫmu natt fæddar ok getnar sem ek. villda ek giarna kalla þær. til þers at þu blezadir þeim á sǫmu leid sem þu hefir mik blezad. Hann bad hana kalla þær. ok blezadi hann þeim sua segiandi. Hinn hæsti gud drottinn blezi ydr. at þer seed sua sem. vii. hlifdarborgir stydiur edr sterkir pilarar. Engillinn bað þa Aseneth liotta borðinn. Hon gordi sem hann baud. Ok er han ætladi bordit nidr at leggia. þa uar engillinn brott fra henni at syn. ok er hon snoriz aptr ok litadiz um. þa sa hon sua sem eina kerru medr. iiii. hestum austr til himinsins framm farandi ok þagat huerfandi.

Aseneth lagdiz til bønar eptir þat er engillinn uar i brottu. Ok sem hon bad ser liknar ok miskunnar. fyrir þat er hon hafdi sua diarfliga uidr hann talad. þa kom einn iunkkiæri til hennar. sa sem fedr hennar þionostumadr uar. berandi henni sealfs hans boð sua segiandi. Se nu kom Joseph. sterkr ok mektugr guds madr. er hans forrennari her nu rett uid portit aa [ydru herbergi. Skundadi Aseneth þa ut i moti Joseph ok stod i suðlunum frammi fyrir herberginu. Ok þegar sem Joseph gekk inn i gardinn. kalladi Aseneth upp aa hann. segiandi honum allt tal engilsins. þat sem hann hafdi uid hana talat. ok þar medr þo hon sealfs hans fotr. Annan dag eptir bad Joseph konunginn sealfan Pharaonem gipta ser Aseneth til eiginhusfru. Var þat þegar gort sem hann uilldi. at hon uar honum gefin. ok setti konungrinn þær uænuztu coronur sem hann atti upp aa huars þeirra hǫfud. ok let þau minnaz til ok kyssaz. Veitti sidan sealfr þeirra brudlaup. gorandi þa sua gillda ok uæna ueitzlu. at hun uannz ual. vii. daga. biodandi þar med at engin madr skylldi nockura erfidiss orku uinna medan brudlaup Josephs stødi. Gaf honum þa þat nafn. at hann skylldi guds son heita. enn Aseneth dottir hins haleitazta.

Her segir fra Joseph ok sonum Jacobs. capitulum.

Joseph for um aull Egiptalandz herud. Kom þar yfiruættiss freoleiki ok aauðxtr um hin næstu. vii. aar. Let hann allt þat korn saman taka ok i hlǫdur bera. sem hann kunni faa. ok allt þat hueiti sem þa þotti sua nogt ok mikit uera sem ægiss sandr. ok eigi kom mælingum aa. let hann i ymissum borgum hirdaz ok geymaz. ok engan lut let hann þi helldr unytaz edr at miskǫstum faraz. Hann gat at eiga. ii. syni medr fyrr nefndri husfru sinni Aseneth. adr enn sulltrinn ok hallærit kom. kalladi hann hinn fyrra ok hinn frumgetna sinn son Manasen. þat þydiz gleyming. ok sagdi sua. þat gaf gud ok gordi. at ek hefir nu gleymt ok afhuga uordit minum erfidum ok mins fedr husi. Annan kalladi hann Effraym. þat er áuaxtan. sua segiandi. Vera let gud mik i minu fatækisslandi. Enn þann tima sem þau. vii. freoleiks aar uáru gengin. sem aa Egiptalandi hofdu uerit ok nu uar fra sagt. þa komu þau. vii. hallæriss áár ok sulltar aar. sem Joseph hafdi fyrir sagt. sua at sulltr ok seyra gekk ner um allan heiminn. ok þar kom at uarla beid braud edr adra fædu a ollu Egiptalandi. Tok þa folkit at suellta ok kallza konunginn Pharaonem. at hann fengi þeim nockut til fædiss ok uidrlifis. Hann svaradi þeim. Farit til Josephs ok gorit huat er hann bydr ydr. Sulltrinn uox dagliga um allt landit. lauk Joseph þa upp kornlaudum. þeim sem kostinum geymdu. ok selldi Egiptalandz monnum. ok sua þeim sem af ódrum londum ok herudum komu þangat séér kost at kaupa. Uaru þeir peningar greiddir i hendr konungsins féhirdzlumonnum sem þar uaru i moti gefnir.

Enn þa er Jacob fretti. at miol ok korn selldiz aa Egiptalandi. þa taladi hann sua til sona sinna. Af þi at hin hardazta tid geriz aa Chanaanslandi. fyrir hui erut þer sua uþrifnir. Ek hefir heyrt at hueiti selz aa Egiptalandi. freistit ok farit nidr þann ueg. ok kaupit oss til bordz þann kost þo at litinn sem oss naudsyniar. at uer halldim lifi uaru ok fyrirfarimz eigi af sullt ok fatækt. Foru sidan. x. brødr Josephs til Egiptalandz þers eyrindis at kaupa þar hueiti. Enn Beniamin hinn yngzti af aullum þeim uar eptir hia fedr sinum. at honum bæri engan daligan edr uadaligan lut til aa ueginum. Komu þeir aa Egiptaland medr odrum þeim sem þagat foru til kaupa. Var Joseph þar þa formadr ok hofdingi fyrir. ok eptir hans bodskap ok akuædi selldiz ollum monnum hueiti ok annarr kostr þadan. Nu sem hans brødr komu fyrir hann uegsamandi hann ok lotning ueittu sem allir adrir. ok hann kendi þa giórla enn þeir kendu hann medr engu moti. þa taladi hann hardligarr ok ublidligarr til þeirra enn annarra manna ok þo fyrir einn tulk spyriandi þá. Huadan komut þer sagdi hann. þeir suorudu. Af Chanaanslandi komu uær at kaupa oss lifnæringar kost ok naudsynligha luti. Enn nu sem hann kendi þa. enn þeir kendu hann eigi. þa minntiz hann aa drauma þa. sem fyrr meirr hafdi fyrir hann borit. ok sagdi sua. þer erut einir speiarar ok komut fyrir þann skylld heghat. at þer uilldut sia uarn fatækan ok ueslugan landzskap. þeir svorudu. Eigi er sua minn herra. helldr komum uer þinir þionostumenn til þers at kaupa oss fædzlu ok fedr uarum. Vær erum allir eins manz synir. komu uær her medr nádum sem adrir fridmenn. ok eigi bruggu uær brædr þionar þinir nǫckurs konar illt edr daligt. Ek ueit at odruuiss er sagdi hann. Til þers komu þer hegat. at þer skodadut ok hugleiddut uigleysi uars landz ok annan þers fatækdom. þeir svorudu. Vær sueinar þinir erum. xi. brædr. synir eins manz af Chanáanslandi. ok er hinn yngzti eptir nu hia fedr uarum. en annarr er nu eigi til. Hitt er sannara sagdi Joseph. at þer erut speiarar ok komut til af einum ok ymissum londum. Skal ek her þegar i stad profa. hue sannordir þer erut. þi at þat er undarligt ok miok sua umattuligt einum kolkarli at eiga iafnmarga syni þilika. einkannliga er þer segit einn uera eptir heima. þar sem uarla kunna konungar at fa þilika suna nægd sua mannuænliga. Ok þat segir ek upp aa konungsins heilsu Pharaonis. at alldrigi fyrri farit þer hedan allir i brott enn sa minnzti brodir ydarr kemr higat. Sendit einn huern af ydr þann sem hann flytr higat. Skulu þer þar til i bóndum her halldnir uera. sem profaz huart þat er satt eðr logit sem þer hafit sagt. Ella fyrir konungsins heilsu Pharaonis segir ek ok seer þat fyrir uist. at þer erut speiarar ok niosnarmenn. Ok fyrir þi at hann ottadiz. at þeir mundu nockut illt gort hafa. þa let hann geyma þeim um. iii. daga. Hinn. iiii. dag taladi hann til þeirra. sua sem þeir uaru ut leiddir. Gorit sem ek sagda. ok munu þer þa na at hallda lifinu. ef þer erut spaklatir fridmenn. þiat ek er gudhræddr madr. Vil ek at einn af ydr brædrum see her bundinn eptir i pant ok settr i myrkuastofu. en þer farit brótt adrir. ef ydr likar. ok berit heim til yduars huss hueiti þat sem þer hafit keypt. Flytit sidan aptr til min þann unga yduarn brødr. at ek megi sua profua sagnir ydrar sannar. ok munu þer þa ecki drepnir uera. þeir gerdu eptir þi sem hann baud. ok tóludu þo sin i milli. sua at hann heyrdi upp aa. enn hugsádu at hann mundi eigi undirstanda ebreska tungu. einkannliga fyrir þat er hann hafdi tulk fyrir ser i þeirra tali. ok sógdu sua. Verduliga þolum u ę r þetta eptir sealfra varra tilskylldan. fyrir þat er u ę r górdum uid uarn kiðtligan brodur seandi hans neyd ok angist. ok eigi uilldum uer hann heyra sem hann bad oss.

Fyrir þersa uára gord ok grimmleik kemr oss nu þersi naud ok þrönguing. Ruben einn af þeim brodrum sagði sua. Talada ek ekki þat þa til yduar. at ek bad ydr ekki syndgaz á sueininum edr uid hann misgðra. ok uilldut þer eigi heyra mik. See nu er til hefnda eptir sed hans blod. Enn af þi at Joseph skildi huert þeirra ord. þo at þeir uissi þat eigi sem sagt uar. þa snðriz hann brott um eina litla stund ok komz uid sua at hann táradiz. veik ser aptr sidan. ok taladi uid þa sem adr. Let hann taka Simeon brodur þeirra ok binda. sua at þeir sa upp aa. Baud sidan sueinum sinum at fylla sekki þeirra allra medr hueiti. ok i huers þeirra sekk let hann leggia þann fiarhlut sem þeir hofdu moti hueitinu gefit. gefandi þeim þar medr sua mikinn kost sem þeim nægdiz i ueginum. Var sua gört sem hann baud. Foru þeir i brott eptir þat. berandi hueitit aa sealfra þeirra ausnum.

Nockuru sidarr tok einn þeirra nidr i sinn sekk ok gtladi eykinum aaifodr. ok er hann sa fiarlutinn i seckiar munninum. þa taladi hann til brødra sinna. See her er mer gesinn aptr kaupeyrir minn. hefir ek hann her nu i sekkinum. þeir uurdu hræddir ok ottafengnir. ok taladu sua sin i millum. Huersu man þetta uera edr uid uita. sem gud hefir gort uid oss. Eptir þat foru þeir ueg sinn. þar til er þeir komu heim til fedr sins Jacobs aa Chanaansland. ok sögdu honum. greinandi giorla ok skiluisliga ord ok gördir ok allt. sem farit hafdi medr þeim ok landzherranum i Egipto. sua þat at Simeon uar þar eptir i böndum. ok þat at hann bad þa sinn hinn yngzta breðr þangat flytia. sem adr uar sagt. Eptir þat er þeir höfdu sagt honum allt hit sannazta af sinni ferd. þa fann huerr þeirra sinn fiarhlut ok kaupeyri bundinn i sinum sekk. vndraduz þeir þa ok ottaduz allir. Ok sem Jacob heyrdi þat. sagdi hann sua. Barnlausan hafit þer nu gort mik driugum. Joseph er eigi til. Simeon er i böndum hafdr ok halldinn. enn nu ę tlit þer Beniamin brott at taka. Allir þersir illir lutir ok dáligir huerfa til min ok koma nu mer i mot. þa svaradi Ruben. Fáá mer hann i hendr. ek skal hann aptr flytia. Eigi man sia son minn þangat med ydr fara sagði Jacob. Brodir hans samborinn er allr. en hann er einn eptir. Nu ef hann mætir nockuru dáligu i þi sama landi. sem þer farit til. þa munu þer minar ellihærur medr sut ok harmi til heluitiss færa.

Sulltr ok hallæri þrǫngdi þa af nyiu ollu þi landi ok mǫrgum odrum. Ok sem allr kostr sa var upp genginn. sem þeir hǫfdu heim flutt af Egiptalandi. þa taladi Jacob enn til sona sinna. Farit nidr aptr a Egiptaland ok kaupit oss fæzlur þo at litlar. Judas svaradi. Sa madr sem þar uar stiuardr sóór sik um. at uær skylldim eigi sua mikit sysla at uær nædim at sia hann. utan uer flyttim þangat hinn yngzta brodur uarn med oss. Villtu gefa gott orlof at hann fylgi mer. þa munum uær fara allir saman ok kaupa þa luti. sem oss naudsyniar enn fara i engan stad. ef þu uill eigi þat. þat gerdut þer upp aa minn angr ok skada sagdi Jacob. er þer sogdut honum nǫckut ifra. at þer ættit penna brodur. þeir svorudu. þersi madr spurði oss innuirdiliga eptir uárri ætt. bædi huart fadir uárr lifði edr ef uær ættim fleiri brødr en þar uaru þa. ok urdu uer honum uidrku ę miliga at suara um þa luti sem hann spurdi. edr mattum u ę r þat nǫckut uita fyrir. at hann mundi þers beidaz at u ę r flyttim þangat brodur uárn. Judas taladi þa enn til fedr sins. Sent þu sueininn medr mer ok undir minu nafni. at uer megim fara ueg uárn ok hallda lifi uáru ok synir uarir. Ek tekr giarna medr sueininum af scalfs þins hendi. kref hann ut af mer. skal ek uid ydr alla tima mikilliga sakadr uera. ef ek flytr hann eigi heim ok færir hann sealfum þer i hendr. Uærim uer nu aptr komnir annan tima. ef þetta hefdi eigi hindrad. Jsrael fadir þeirra svaradi þa. Ef sua mikil naudsyn liggr her vid. sem þer seghit. þa gerit sem þer uilit. Takit af ollum hinum dygduguztum iarðarinnar sauðxtum. er til bidr i þersu landi. berandi þa i budkum med ydr. ok presentit þær giafir þessum manni. Nefndi hann þar til nockur. iiii. edr. v. þau hin dyraztu krydd ok iurta kyn. sem i nockuru landi kunnu faaz. ok þar medr sagdi hann sua. Hafit ok tuifalldan kaupæyri medr ydr. ok berit þann aptr þangat sem þer fundut i sekkunum. ef sua léttliga hefir kunnat til at bera. at nockut fals edr misfangi hefir i farit. Takit ok nu þar med yduarn bræðr. ok farit sua a fund þessa manz. Bidr ek. at minn almattigr gud geri hann nu blidan ok miuklyndan uid yðr ok sendi þann brodur ydarn heilan aptr higat medr ydr sem hann helldr þar i bǫndum ok Beniamin. Enn ek man nu sua sem barnlauss eptir uera.