Hvernig skal kenna sól?Svá, at kalla hana dóttur Mundilfara, systur Mána, kona Glens, eldr himins ok lopts.Svá sem kvað Skúli Þorsteinsson:
Glens beðja veðr gyðju goðblíð í vé, síðan ljós kemr gott, með geislum, gránserks ofan Mána.
Svá kvað Einarr Skúlason:
Hvargi es Beita borgar bálgrimmustum skála hár of hnossvin órum heims vafrlogi sveimar.
Chapter 27
Hvernig skal kenna vind?Svá, at kalla hann son Fornjóts, bróður ægis ok elds, brjót viðar, skaði ok bani eða hundr eða vargr viðar eða segls eða seglreiða.Svá sagði Sveinn í Norðrsetudrápu:
Tóku fyrst til fjúka Fornjóts synir ljótir.
Chapter 28
Hvernig skal kenna eld?Svá, at kalla hann bróður vinds ok ægis, bana ok grand viðar ok húsa, Hálfs bani, sól húsanna.
Chapter 29
Hvernig skal kenna vetr?Svá, at kalla hann son Vindsvals ok bana orma, hríðmál.Svá kvað Ormr Steinþórsson:
Ræð ek þenna mög manni Vindsvals unað blindum.
Svá kvað Ásgrímr:
Siggœðir vas síðan seimörr í Þrándheimi (þjóð veit þínar íðir) þann orms-trega (sannar).
Chapter 30
Hvernig skal kenna sumar?Svá, at kalla son Svásaðar ok líkn ormanna, ok gróðr manna.Svá sem kvað Egill Skallagrímsson:
Upp skulum órum sverðum, úlfs tannlituðr, glitra, eigum dáð at drýgja í dalmiskunn fiska.