Chapter 11
Hvernig skal kenna Víðar? Hann má kalla enn þǫgla ás, eiganda járnskós, dólg ok bana Fenrisúlfs, hefniás goðanna, byggviás fǫðurtopta ok son Óðins, bróður ásanna.
Chapter 12
Hvernig skal kenna Vála? Svá, at kalla hann son Óðins ok Rindar, stjúpson Friggjar, bróður ásanna, hefniás Baldrs, dólg Haðar ok bana hans, byggvanda fǫðurtopta.
Chapter 13
Hvernig skal kenna Hǫð? Svá, at kalla hann blinda-ás, Baldrs bana, skjótanda Mistilteins, son Óðins, Heljarsinna, Vála-dólg.
Chapter 14
Hvernig skal kenna Ull? Svá, at kalla hann son Sifjar, stjúp Þórs, ǫndur-ás, boga-ás, veiði-ás, skjaldar-ás.
Chapter 15
Hvernig skal kenna Hœni? Svá, at kalla hann sessa eða sinna eða mála Óðins ok enn skjóta ás ok enn langa fót ok aur-konung.