Hvernig skal kenna Njörð? Svá, at kalla hann Vana-guð eða Vana-nið eða Van ok föður Freys ok Freyju, fégjafa guð. Svá segir Þórðr Sjáreksson:
Hér er þess getit, er Skaði gekk frá Nirði, sem fyrr er ritat.
Hvernig skal kenna Frey? Svá, at kalla hann son Njarðar, bróður Freyju ok enn Vana-guð ok Vana-nið, ok Vanr ok árguð, ok fégjafa. Svá kvað Egill Skallagrímsson:
Freyr er kallaðr Belja-dólgr, svá sem kvað Eyvindr skáldaspillir:
Hann er eigandi Skíðblaðnis ok galtar þess, er Gullinbursti heitir, svá sem hér er sagt:
Svá segir Úlfr Uggason:
Hann heitir ok Slíðrugtanni.
Hvernig skal Heimdall kenna? Svá at kalla hann son níu mœðra eða vörð goða, svá sem fyrr er ritat, eða hvíta-Ás, Loka-dólg, mensœkir Freyju. Heimdalar höfuð heitir sverð; svá er sagt, at hann var lostinn mannshöfði í gögnum. Um þat er kveðit í Heimdalargaldri, ok er síðan kallat höfuð mjötuðr Heimdalar; sverð heitir manns mjötuðr. Heimdallr er eigandi Gulltopps; hann er ok tilsœkir Vágaskers ok Singasteins; þá deildi hann við Loka um Brísingamen; hann heitir ok Vindlér. Úlfr Uggason kvað í Húsdrápu langa stund eptir þeiri frásögu, ok er þess þar getit, at þeir váru í sela-líkjum. Hann er ok sonr Óðins.
Hvernig skal kenna Tý? Svá at kalla hann einhenda-ás ok Úlfs-fóstra, víga-guð, son Óðins.
Hvernig skal kenna Braga? Svá at kalla hann Iðunnar ver, frumsmið bragar ok enn síðskeggja ás — af hans nafni er sá kallaðr skeggbragi, er mikit skegg hefir — ok sonr Óðins.