Bragi heitir einn, hann er ágætr at speki ok mest at málsnild ok orðfimi;hann kann mest af skáldskap, ok af honum er bragr kallaðr skáldskapr, ok af hans nafni er sá kallaðr bragr karla eða bragr kvinna, er orðsnild hefir framarr en aðrir, kona eða karlmaðr.Kona hans er Iðunn;hon varðveitir í eski sínu epli þau, er goðin skulu á bíta, þá er þau eldask, ok verða þá allir ungir, ok svá mun vera alt til ragnarøkrs.
Þá mælti Gangleri: Allmikit þykki mér goðin eiga undir gæzlu eða trúnaði Iðunnar.
Þá mælti Hárr ok hló við: Nær lagði þat ófœru einu sinni;kunna mun ek þar af at segja, en þú skalt nú fyrst heyra fleiri nöfn ásanna.
Chapter 27
Heimdallr heitir einn, hann er kallaðr hvíti-áss, hann er mikill ok heilagr;hann báru at syni meyjar níu ok allar systr;hann heitir ok Hallinskíði ok Gullintanni;tennr hans váru af gulli; hestr hans heitir Gulltoppr.Hann býr þar er heita Himinbjörg við Bifröst;hann er vörðr goða ok sitr þar við himinsenda at gæta brúarinnar fyrir bergrisum;hann þarf minna svefn en fugl;hann sér jafnt nótt sem dag hundrað rasta frá sér;hann heyrir ok þat, er gras vex á jörðu eða ull á sauðum ok alt þat, er hæra lætr;hann hefir lúðr þann, er Gjallarhorn heitir, ok heyrir blástr hans í alla heima.Hér er svá sagt:
Himinbjörg heita, en þar Heimdall kveða valda véum; þar vörðr goða drekkr í væru ranni glaðr enn góða mjöð.
Ok enn segir hann sjálfr í
Chapter 28
Heimdalargaldri:
Níu em ek mœðra mögr, níu em ek systra sonr.
Höðr heitir einn ássinn, hann er blindr;œrit er hann sterkr, en vilja mundu goðin, at þenna ás þyrfti eigi at nefna, því at hans handaverk munu lengi vera höfð at minnum með goðum ok mönnum.
Chapter 29
Víðarr heitir einn, hinn þögli áss;hann hefir skó þjokkvan.Hann er sterkr, næst því sem Þórr;af honum hafa goðin mikit traust í allar þrautir.
Chapter 30
Áli eða Váli heitir einn, sonr Óðins ok Rindar;hann er djarfr í orrostum ok mjök happskeytr.