Bókastaðir

Þessir menn hafa land numit í Austfirðingafjórðungi, er nú munu upp taldir, ok ferr hvat af hendi norðan til fjórðungamóts, frá Langanesi á Sólheimasand, ok er þat sǫgn manna at þessi fjórðungr hafi fyrst albygðr orðit.

Gunnólfr kroppa hét maðr, son Þóris hauknefs, hersis; hann nam Gunnólfsvík ok Gunnólfsfell ok Langanes alt fyrir útan Helkunduheiði, ok bjó í Fagravík; hans son var Skúli herkja, faðir Geirlaugar.

Finni hét maðr, er nam Finnafjǫrð ok Viðfjǫrð; hans son var Þórarinn, faðir Sigurðar, fǫður Glíru-Halla.

Hróðgeirr enn hvíti Hrappsson nam Sandvík fyrir norðan Digranes, alt til Viðfjarðar, ok bjó á Skeggjastǫðum; hans dóttir var Ingibjǫrg, er átti Þorsteinn enn hvíti; hon var móðir Þorgils, fǫður Helga, fǫður Bjarnar, fǫður Yngvildar, móður Ámunda, fǫður Guðrúnar, móður Þórdísar, móður Helgu, móður Þórðar prests, fǫður Markúss á Melum. Alrekr var bróðir Hróðgeirs, er út kom með honum; hann var faðir Ljótólfs goða í Svarfaðardal.

Eyvindr vápni ok Refr enn rauði, synir Þorsteins þjokkubeins, bjoggusk til Íslands af Strind ór Þrándheimi, þvíat þeir urðu missáttir við Harald konung, ok hafði sítt skip hvárr þeira. Refr varð aftrreka, ok lét konungr drepa hann, enn Eyvindr kom í Vápnafjǫrð ok nam fjǫrðinn allan frá Vestradalsá, ok bjó í Krossavík enni iðri; hans son var Þorbjǫrn.

Steinbjǫrn kortr hét son Refs ens rauða; hann fór til Íslands ok kom í Vápnafjǫrð. Eyvindr fǫðurbróðir hans gaf honum land alt milli Vápnafjarðarár ok Vestradalsár; hann bjó at Hofi. Hans synir váru þeir Þormóðr stikublígr, er bjó í Sunnudal; annarr Refr á Refsstǫðum; þriði Egill á Egilsstǫðum, faðir Þórarins ok Þrastar ok Hallbjarnar ok Hallfríðar, er átti Þorkell Geitisson.

Hróaldr bjóla var fóstbróðir Eyvindar vápna; hann nam land fyrir vestan Vestradalsá, dalinn hálfan, ok Selárdal allan út til Digraness; hann bjó á Torfastǫðum. Hans son var Ísrǫðr, faðir Gunnhildar, er átti Oddi, son Ásólfs í Hǫfða.

Gunnhildr var móðir Gríms, fǫður Halldóru, móður Markúss, fǫður Valgerðar, móður Bǫðvars, fǫður Þórðar prests, fǫður Markúss á Melum.

Ǫlvér enn hvíti hét maðr, son Ósvalds Øxna-Þórissonar; hann var lendr maðr ok bjó í Álmdǫlum; hann varð ósáttr við Hákon jarl Grjótgarðsson, ok fór á Yrjar ok dó þar, enn Þorsteinn enn hvíti, son hans, fór til Íslands, ok kom skipi sínu í Vápnafjǫrð eftir landnám; hann keypti land af Eyvindi vápna, ok bjó á Tóftavelli fyrir útan Síreksstaði nǫkkura vetr, áðr hann komsk at Hofslǫndum, með því móti at hann heimti leigufé sítt at Steinbirni kort, enn hann hafði ekki til at gjalda nema landit; þar bjó Þorsteinn sex tigu vetra síðan ok var vitr maðr ok góðr. Hann átti Ingibjǫrgu, dóttur Hróðgeirs ens hvíta; þeira bǫrn váru þau Þorgils ok Þórðr, Ǫnundr, Þorbjǫrg ok Þóra. Þorgils átti Ásvǫru, dóttur Þóris Graut-Atlasonar; þeira son var Brodd-Helgi.

Hann átti fyrr Hǫllu Lýtingsdóttur, Arnbjarnarsonar; þeira son var Víga-Bjarni. Hann átti Rannveigu, dóttur Eiríks ór Goððǫlum; þeira son var Skegg-Broddi enn dóttir Yngvildr, er átti Þorsteinn Hallsson.

Skegg-Broddi átti Guðrúnu, dóttur Þórarins sælings ok Halldóru Einarsdóttur; þeira bǫrn Þórir ok Bjarni húslangr. Þórir átti Steinunni, dóttur Þorgríms ens háva; þeira dóttir var Guðrún, er átti Flosi Kolbeinsson; þeira son var Bjarni, faðir Bjarna, er átti Hǫllu Jǫrundardóttur; þeira bǫrn váru þau Flosi prestr ok Torfi prestr, Einarr brúðr ok Guðrún, er Þórðr Sturluson átti, ok Goðrún, er Einarr Bergþórsson átti, ok Helga, móðir Sigríðar Sighvatsdóttur.

Flosi prestr átti Ragnhildi, dóttur Barkar á Baugsstǫðum; þeira bǫrn Bjarni ok Einarr, Halla, móðir herra Kristofórus, ok Þórdís, móðir frú Ingigerðar, móður frú Guðrúnar ok Hallberu. Valgerðr var dóttir Flosa, móðir herra Erlends sterka, fǫður Hauks ok Valgerðar.

Þorsteinn torfi ok Lýtingr brœðr fóru til Íslands. Lýtingr nam Vápnafjarðarstrǫnd alla ena eystri, Bǫðvarsdal ok Fagradal, ok bjó í Krossavík; frá honum eru Vápnfirðingar komnir. Hans son var Geitir, faðir Þorkels, fǫður Ragneiðar, móður Hǫllu, móður Bótólfs, fǫður Þórdísar, móður Helgu, móður Þórðar prests, fǫður Markúss á Melum.

Þorfiðr hét maðr, er fyrst bjó á Skeggjastǫðum at ráði Þórðar hálma; hans son var Þorsteinn fagri, er vá Einar, son Þóris Graut-Atlasonar, ok brœðr hans tveir, Þorkell ok Heðinn, er vágu Þorgils, fǫður Brodd-Helga.

Þorsteinn torfi nam Hlíð alla útan frá Ósfjǫllum ok upp til Hvannár, ok bjó at Forsvelli; hans son var Þorvaldr, faðir Þorgeirs, fǫður Hallgeirs, fǫður Hrapps á Forsvelli.

Hákon hét maðr, er nam Jǫkulsdal allan fyrir vestan Jǫkulsá ok fyrir ofan Teigará, ok bjó á Hákonarstǫðum; hans dóttir var Þorbjǫrg, er áttu synir Brynjólfs ens gamla, Gunnbjǫrn ok Hallgrímr. Teigr lá ónuminn millum Þorsteins torfa ok Hákonar; þann lǫgðu þeir til hofs, ok heitir sá nú Hofsteigr.

Skjǫldólfr Vémundarson, bróðir Berðlu-Kára, nam Jǫkulsdal fyrir austan Jǫkulsá upp frá Knefilsdalsá, ok bjó á Skjǫldólfsstǫðum; hans bǫrn váru þau Þorsteinn, er átti Fastnýju Brynjólfsdóttur, ok Sigríð, móðir Bersa Ǫzurarsonar.

Þórðr hét maðr, son Þórólfs hálma, bróðir Helga bunhauss; hann nam Tungulǫnd ǫll á milli Lagarfljóts ok Jǫkulsár, fyrir útan Rangá; hans son var Þórólfr hálmi, er átti Guðríði Brynjólfsdóttur; þeira son var Þórðr þvari, faðir Þórodds, fǫður Brands, fǫður Steinunnar, móður Rannveigar, móður Sæhildar, er Gizurr átti.

Ǫzurr slagakollr nam land milli Ormsár ok Rangár; hann átti Guðnýju Brynjólfsdóttur; þeira son var Ásmundr, faðir Marðar.

Ketill ok Graut-Atli, synir Þóris þiðranda, fóru ór Veradal til Íslands, ok námu land í Fljótsdal fyrr enn Brynjólfr kom út, Lagarfljótsstrandir báðar. Ketill nam fyrir vestan Fljót á milli Hengiforsár ok Ormsár.

Ketill fór útan, ok var með Véþorni, syni Vémundar ens gamla; þá keypti hann at Véþorni Arneiði, dóttur Ásbjarnar jarls skerjablesa, er Hólmfastr son Véþorns, hafði hertekit, þá er þeir Grímr, systurson Véþorns, drápu Ásbjǫrn jarl. Ketill keypti Arneiði, dóttur Ásbjarnar, tveim hlutum dýrra enn Véþorn mat hana í fyrstu; enn er kaupit var orðit, þá gerði Ketill brúðkaup til Arneiðar.

Eftir þat fann hon grafsilfr mikit undir viðarrótum; þá bauð Ketill at flytja hana til frænda sínna, enn hon kaus þá honum at fylgja. Þau fóru út ok bjoggu á Arneiðarstǫðum; þeira son var Þiðrandi, faðir Ketils í Njarðvík. Jóreiðr var dóttir Þiðranda, móðir Þorsteins, fǫður Guðríðar, móður Rannveigar, móður Salgerðar, móður Guðrúnar, móður Hreins ábóta, fǫður Valdísar, móður Snorra, fǫður Hallberu, er átti Markús Þórðarson á Melum.

Graut-Atli nam ena eystri strǫnd Lagarfljóts, alt á milli Giljár ok Vallaness, fyrir vestan Øxnalœk; hans synir váru þeir Þorbjǫrn ok Þórir, er átti Ásvǫru Brynjólfsdóttur.

Þorgeirr Vestarson hét maðr gǫfigr; hann átti þrjá sonu: var einn Brynjólfr enn gamli, annarr Ævarr enn gamli, þriði Herjólfr. Þeir fóru allir til Íslands á sínu skipi hverr þeira.

Brynjólfr kom skipi sínu í Eskifjǫrð, ok nam land fyrir ofan fjall, Fljótsdal allan fyrir ofan Hengiforsá, fyrir vestan, enn fyrir ofan Gilsá, fyrir austan, Skriðudal allan, ok svá Vǫlluna út til Eyvindarár, ok tók mikit af landnámi Una Garðarssonar, ok bygði þar frændum sínum ok mágum; hann átti þá tíu bǫrn, enn síðan fekk hann Helgu, er átt hafði Herjólfr, bróðir hans, ok áttu þau þrjú bǫrn; þeira son var Ǫzurr, faðir Bersa, fǫður Hólmsteins, fǫður Órœkju, fǫður Hólmsteins, fǫður Helgu, móður Hólmsteins, fǫður Hallgerðar, móður Þorbjargar, er átti Loftr byskupsson.

Ævarr enn gamli, bróðir Brynjólfs, kom út í Reyðarfirði, ok fór upp um fjall; honum gaf Brynjólfr Skriðudal allan fyrir ofan Gilsá; hann bjó á Arnallzstǫðum; hann átti tvá sonu, enn dœtr þrjár.

Ásrøðr hét maðr, er fekk Ásvarar Herjólfsdóttur, bróðurdóttur Brynjólfs ok stjúpdóttur; henni fylgðu heiman ǫll lǫnd milli Gilsár ok Eyvindarár; þau bjoggu á Ketilsstǫðum. Þeira son var Þorvaldr holbarki, faðir Þorbergs, fǫður Hafljóts, fǫður Þórhadds skálar. Dóttir Holbarka var Þórunn, er átti Þorbjǫrn Graut-Atlason; ǫnnur Ástríðr, móðir Ásbjarnar loðinhǫfða, fǫður Þórarins í Seyðarfirði, fǫður Ásbjarnar, fǫður Kolskeggs ens fróða ok Ingileifar, móður Halls, fǫður Finns lǫgsǫgumanns.