Bókastaðir

Helgi gaf Þóru, dóttur sína, Gunnari, syni Úlfljóts, er lǫg hafði út ok land upp frá Skjálgdalsá til Háls; hann bjó í Djúpadal; þeira bǫrn váru þau Þorsteinn, Ketill ok Steinmóðr, enn dœtr Yngvildr ok Þórlaug.

Helgi gaf Auðuni rotni, syni Þórólfs smjǫrs, Þorsteins sonar skrofa, Gríms sonar kambans, Helgu dóttur sína, ok land upp frá Hálsi til Villingadals; hann bjó í Saurbœ. Þeira bǫrn váru þau Einarr, faðir Eyjólfs Valgerðarsonar, ok Vigdís, móðir Halla ens hvíta, fǫður Orms, fǫður Gellis, fǫður Orms, fǫður Halla, fǫður Þorgeirs, fǫður Þorvarðs ok Ara, fǫður Guðmundar biskups. Einarr Auðunarson átti Valgerði Rúnólfsdóttur; þeira son Eyjólfr, (er) átti Hallberu Þóroddsdóttur hjálms, ok bjoggu þau á Jórunnarstǫðum langa œvi, enn síðan á Mǫðruvǫllum. Hallfríðr var dóttir Einars Eyjólfssonar, móðir Halldórs, fǫður Snorra, fǫður Guðrúnar, móður Hreins ábóta, fǫður Valdísar, móður Snorra, fǫður Hallberu, er átti Markús Þórðarson. Vigfúss Víga-Glúmsson vá Bárð, son Halla ens hvíta, ok er um hann ort Bárðar drápa, er þetta er stef í:

Enn Brúsi bróðir Bárðar ok Orms, orti vísu þessa, þá er Glúmr stǫkk af þinginu:

Hámundr heljarskinn fekk Helgu Helgadóttur eftir andlát Ingunnar, systur hennar, ok var þeira dóttir Yngvildr, er kǫlluð var allrasystir, er Ǫrnólfr átti.

Helgi gaf Hrólfi, syni sínum, ǫll lǫnd fyrir austan Eyjafjarðará, frá Arnarhváli upp, ok bjó hann í Gnúpufelli, ok reisti þar hof mikit; hann átti Þórǫrnu, dóttur Þrándar mjóbeins; þeira bǫrn váru þau Hafliði enn ǫrvi ok Valþjófr, Viðarr, Grani ok Bǫðvarr, Ingjaldr ok Eyvindr, enn dóttir Guðlaug, er Þorkell enn svarti átti. Valþjófr var faðir Helga, fǫður Þóris, fǫður Arnórs, fǫður Þuríðar, móður Þórdísar, móður Vigdísar, móður Sturlu í Hvammi.

Helgi enn magri gaf Ingjaldi, syni sínum, land út frá Arnarhváli til Þverár ennar ytri; hann bjó at Þverá enni efri, ok reisti þar hof mikit; hann átti Salgerði Steinólfsdóttur; þeira son Eyjólfr, faðir Víga-Glúms, ok Steinólfr, faðir Þórarins illa ok Arnórs ens góða, Rauðœings. Víga-Glúmr var faðir Más, fǫður Þorkǫtlu, móður Þórðar, fǫður Sturlu.

Helgi gaf Hlíf, dóttur sína, Þorgeiri, syni Þórðar bjálka, ok land út frá Þverá til Varðgjár; þau bjoggu at Fiskilœk; bǫrn þeira Þórðr ok Helga.

Skagi Skoftason hét maðr ágætr á Mœri; hann varð ósáttr við Eystein glumru ok fór af því til Íslands; hann nam at ráði Helga Eyjafjarðarstrǫnd ena eystri, út frá Varðgjá til Fnjóskadalsár, ok bjó í Sigluvík; hans son var Þorbjǫrn, faðir Heðins ens milda, er Svalbarð lét gera sextán vetrum fyrir kristni; hann átti Ragnheiði, dóttur Eyjólfs Valgerðarsonar.

Þórir snepill hét maðr, son Ketils brimils; hann bjósk til Íslandsfarar; Gautr hét skipveri hans; enn er þeir lágu til hafs, kvámu at þeim víkingar ok vildu ræna þá, enn Gautr laust stafnbúann þeira með hjálmunveli, ok lǫgðu víkingar við þat frá; síðan var hann kallaðr Hjálmun-Gautr. Þeir Þórir fóru til Íslands, ok kvámu skipi sínu í Skjálfandafljótsós. Þórir nam Kaldakinn á milli Skuggabjarga ok Ljósavatnsskarðs; hann nam þar eigi yndi ok fór á braut; þá kvað hann þetta:

Þórir nam síðan Hnjóskadal allan til Ódeilu, ok bjó at Lundi; hann blótaði lundinn. Hans sonr var Ormr tǫskubak, faðir Hlenna ens gamla, ok Þorkell svarti í Hleiðrargarði; hann átti Guðlaugu Hrólfsdóttur; þeira synir Ǫngull enn svarti, ok Hrafn, faðir Þórðar at Stokkahlǫðum, ok Guðríð, er átti Þorgeirr goði at Ljósavatni.

Þengill mjǫksiglandi fór af Hálogalandi til Íslands; hann nam land at ráði Helga út frá Hnjóská til Grenivíkr; hann bjó í Hǫfða; hans synir váru þeir Vémundr, faðir Ásólfs í Hǫfða ok Hallsteinn, er þetta kvað, þá er hann sigldi af hafi ok frá andlát fǫður síns:

Þormóðr hét maðr, er nam Grenivík ok Hvallátr, ok Strǫnd alla út til Þorgeirsfjarðar; hans son var Snǫrtr, er Snertlingar eru frá komnir.

Þorgeirr hét maðr, er nam Þorgeirsfjǫrð ok Hvalvatnsfjǫrð.

Loðinn ǫngull hét maðr; hann var fœddr í Ǫngley á Hálogalandi; hann fór fyrir ofríki Hákonar jarls Grjótgarðssonar til Íslands, ok dó í hafi; enn Eyvindr son hans nam Flateyjardal upp til Gunnsteina, ok blótaði þá; þar liggr Ódeila á milli ok landnáms Þórir snepils. Ásbjǫrn dettiáss var son Eyvindar, faðir Finnboga ens ramma, fǫður Narfa, fǫður Yngvildar, móður Jódísar, móður Hǫllu, móður Þorgils, fǫður Geirnýjar, móður Valgerðar, móður Helgu, er átti Snorri Markússon á Melum.

Bárðr, son Heyjangrs-Bjarnar, kom skipi sínu í Skjálfandafljótsós, ok nam Bárðardal allan upp frá Kálfborgará ok Eyjardalsá, ok bjó at Lundarbrekku um hríð; þá markaði hann at veðrum, at landviðri váru betri enn hafviðri, ok ætlaði af því betri lǫnd fyrir sunnan heiði. Hann sendi sonu sína suðr um gói. Þá fundu þeir góibeytla ok annan gróðr; enn annat vár eftir þá gerði Bárðr kjálka hverju kykvendi, því er gengt var, ok lét hvat draga sitt fóðr ok fjárhlut; hann fór Vonarskarð, þar er síðan heitir Bárðargata; hann nam síðan Fljótshverfi, ok bjó at Gnúpum; þá var hann kallaðr Gnúpa-Bárðr.

Hann átti mǫrg bǫrn; hans son var Sigmundr, faðir Þorsteins, er átti Æsu, dóttur Hrólfs rauðskeggs; þeira dóttir var Þórunn, er átti Þorkell leifr, ok var þeira son Þorgeirr goði at Ljósavatni. Annarr son Bárðar var Þorsteinn, faðir Þóris, er var á Fitjum með Hákoni konungi, ok skar rauf á oxahúð, ok hafði þá hlíf; því var hann Leðrháls kallaðr; hann átti Fjǫrleifu Eyvindardóttur; þeira synir váru þeir Hávarðr í Fellsmúla, Herjólfr at Mývatni, Ketill í Húsavík, Vémundr kǫgr, er átti Halldóru, dóttur Þorkels svarta, ok Áskell ok Háls; hann bjó á Helgastǫðum.

Kampa-Grímr fór ór Suðreyjum til Íslands, ok velkti þá úti alt sumar, ok braut skip sítt við Skjálfandafljótsós; hann nam Kaldakinn í annat sinn ok seldi ymsum mǫnnum síðan; hans dóttir var Arnbjǫrg, er Ásólfr í Hǫfða átti.

Þorfiðr máni hét maðr, son Áskels torfa; hann nam land fyrir neðan Eyjardalsá til Landamóts, ok sumt um Ljósavatnsskarð, ok bjó at Øxará.

Þórir, son Gríms gráfeldarmúla af Rogalandi, nam um Ljósavatnsskarð; hans son var Þorkell leifr enn hávi, faðir Þorgeirs goða. Þorgeirr átti fyrst Guðríði, dóttur Þorkels svarta; þeira synir Þorkell hákr ok Hǫskuldr, Tjǫrfi, Kolgrímr, Þorsteinn ok Þorvarðr, enn dóttir Sigríðr. Síðan átti hann Álfgerði, dóttur Arngeirs ens austrœna; Þorgeirr átti ok Þorkǫtlu, dóttur Dala-Kolls; synir hans ok þeira kvenna váru þeir Þorgrímr, Þorgils, Óttarr; þessir váru laungetnir: Þorgrímr ok Finni enn draumspaki; hans móðir hét Lecný, útlend.

Heðinn ok Hǫskuldr, synir Þorsteins þurs, fóru til Íslands ok námu fyrir innan Tunguheiði. Heðinn bjó at Heðinshǫfða ok átti Guðrúnu; þeira dóttir var Arnríðr, er Ketill Fjǫrleifarson átti; Guðrún var dóttir þeira, er Hrólfr átti [í Gnúpufelli]. Hǫskuldr nam lǫnd ǫll fyrir austan Laxá ok bjó í Skǫrðuvík; við hann er kent Hǫskuldsvatn, þviat hann druknaði þar. Í þeira landnámi er Húsavík, er Garðarr hafði vetrsetu. Son Hǫskulds var Hróaldr, er átti Ægileifu, dóttur Hrólfs Helgasonar.

Vestmaðr ok Úlfr fóstbrœðr fóru einu skipi til Íslands; þeir námu Reykjadal allan fyrir vestan Laxá upp til Vestmannsvatns. Vestmaðr átti Guðlaugu. Úlfr bjó undir Skrattafelli; hann átti.......; þeira son Geirólfr, er átti Vígdísi Konálsdóttur síðar enn Þorgrímr; þeira son Hallr.

Þorsteinn hǫfði hét maðr; hann var hersir á Hǫrðalandi; hans synir váru þeir Eyvindr ok Ketill hǫrðski. Eyvindr fýstisk til Íslands eftir andlát fǫður síns, enn Ketill bað hann nema báðum þeim land, ef honum sýndisk síðar at fara. Eyvindr kom í Húsavík skipi sínu, ok nam Reykjadal upp frá Vestmannsvatni; hann bjó at Helgastǫðum ok er þar heygðr. Náttfari, er með Garðari hafði út farit, eignaði sér áðr Reykjadal, ok hafði merkt á viðum, enn Eyvindr rak hann á braut ok lét hann hafa Náttfaravík.

Ketill fór út at orðsendingu Eyvindar; hann bjó á Einarsstǫðum; hans son var Konáll ok Þorsteinn, faðir Einars, er þar bjó síðan. Sonr Eyvindar var Áskell goði, er átti dóttur Grenjaðar; þeira synir Þorsteinn ok Víga-Skúta. Dóttir Eyvindar var Fjǫrleif. Konáll átti Oddnýju Einarsdóttur, systur Eyjólfs Valgerðarsonar; þeira bǫrn váru þau Einarr, er átti sex sonu, ok dóttur Þóreyju, er átti Steinólfr Másson, ok ǫnnur Eydís, er Þorsteinn goði átti ór Ásbjarnarvík. Þórðr Konálsson var faðir Sokka á Breiðamýri, fǫður Konáls. Dóttir Konáls var Vigdís, er átti Þorgrímr, son Þorbjarnar skaga, ok var þeira son Þorleifr Geirólfsstjúpr.

Grenjaðr hét maðr, Hrappsson, bróðir Geirleifs; hann nam Þegjandadal ok Kraunaheiði, Þorgerðarfell ok Laxárdal neðan; hann bjó á Grenjaðarstǫðum; hann átti Þorgerði, dóttur Helga hests; þeira son var Þorgils vámúli, faðir Ǫnundar, fǫður Hallberu, móður Halldóru, móður Þorgerðar, móður Halls ábóta, ok Hallberu, er átti Hreinn Styrmisson.

Bǫðólfr hét maðr, son Gríms Grimólfssonar af Ǫgðum, bróðir Bǫðmóðs; hann átti Þórunni, dóttur Þórólfs ens fróða; þeira son var Skeggi. Þau fóru ǫll til Íslands, ok brutu skip sítt við Tjǫrnes, ok váru at Auðólfsstǫðum enn fyrsta vetr; hann nam Tjǫrnes alt á milli Tunguár ok Óss. Bǫðólfr átti síðar Þorbjǫrgu hólmasól, dóttur Magr-Helga; þeira dóttir var Þorgerðr, er átti Ásmundr Ǫndottsson; þeira son Þorleifr, faðir Þuríðar, er átti Valla-Ljótr.

Skeggi Bǫðólfsson nam Kelduhverfi upp til Kelduness, ok bjó í Miklagarði; hann átti Helgu, dóttur Þorgeirs at Fiskilœk; þeira son var Þórir farmaðr; hann lét gera knǫr í Sogni; þann vígði Sigurðr biskup; af þeim knerri eru brandar veðrspáir fyrir durum í Miklagarði. Um Þóri orti Grettir þetta:

Án hét son Þóris, faðir Arnar, fǫður Ingibjargar, móður Skúms, fǫður Þorkels ábóta.