Bókastaðir

Úlfr enn skjálgi, son Hǫgna ens hvíta, nam Reykjanes alt, milli Þorskafjarðar ok Hafrafells; hann átti Bjǫrgu, dóttur Eyvindar austmanns, systur Helga ens magra; þeira son var Atli rauði, er átti Þorbjǫrgu, systur Steinólfs lága; þeira son var Már á Hólum; hann átti Þorkǫtlu, dóttur Hergils hnappraz; þeira son var Ari.

Hann varð sæhafi til Hvítramannalands; þat kalla sumir Írland et mikla; þat liggr vestr í haf nær Vínlandi enu góða; þat er kallat sex dœgra sigling vestr frá Írlandi; þaðan náði Ari eigi á brutt at fara, ok var þar skírðr. Þessa sǫgu sagði fyrst Hrafn Hlymreksfari, er lengi hafði verit í Hlymreki á Írlandi. Svá kvað Þorkell Gellisson segja íslenska menn, þá er heyrt hǫfðu frá segja Þorfinn í Orkneyjum, at Ari hefði kendr verit á Hvítramannalandi, ok náði eigi brutt at fara, enn var þar vel virðr.

Ari átti Þorgerði dóttur Álfs ór Dǫlum; þeira son var Þorgils ok Guðleifr ok Illugi; þat er Reyknesinga ætt.

Jǫrundr hét son Úlfs ens skjálga; hann átti Þorbjǫrgu knarrarbringu; þeira dóttir var Þjóðhildr, er átti Eiríkr rauði; þeira son Leifr enn heppni á Grœnlandi. Jǫrundr hét son Atla ens rauða; hann átti Þórdísi, dóttur Þorgeirs suðu; þeira dóttir var Otkatla, er átti Þorgils Kollsson. Jǫrundr var ok faðir Snorra.

Hallsteinn son Þórólfs Mostrarskeggs nam Þorskafjǫrð, ok bjó á Hallsteinsnesi; hann blótaði þar til þess at Þórr sendi honum ǫndvegissúlur; eftir þat kom tré á land hans, þat er var sextigi ok þriggja álna ok tveggja faðma digrt; þat var haft til ǫndvegissúlna, ok eru þar af gervar ǫndvegissúlur nær á hverjum bœ um þverfjǫrðuna; þar heitir nú Grenitrésnes, er tréit kom á land.

Hallsteinn hafði herjat á Skotland, ok tók þar þræla þá er hann hafði út; þá sendi hann til saltgerðar í Svefneyjar; þar hǫfðu þeir ' Hallsteins þræla hag ' fram.

Hallsteinn átti Ósku, dóttur Þorsteins rauðs; þeira son var Þorsteinn [surtr], er fann sumarauka. Þorsteinn surtr átti.......; þeira son var Þórarinn, enn dóttir Þórdís, er átti Þorkell trefill, ok Ósk, er átti Steinn mjǫksiglandi; Þorsteinn hvíti hét son þeira. Sámr hét son Þorsteins surts, óskilgetinn; hann deildi um arf Þorsteins við Trefil, því at hann vildi halda í hendr bǫrnum Þórarins.

Þorbjǫrn loki hét maðr, son Bǫðmóðs ór Skut; hann fór til Íslands ok nam Djúpafjǫrð, ok Grónes til Gufufjarðar; hans son var Þorgils á Þorgilsstǫðum í Djúpafirði, faðir Kolls, er átti Þuríði Þórisdóttur, Halladarsonar jarls, Rǫgnvaldssonar Mœrajarls; Þorgils var son þeira; hann átti Otkǫtlu, dóttur Jǫrundar Atlasonar ens rauða; þeira son var Jǫrundr; hann átti Hallveigu, dóttur Odda Ýrarsonar ok Ketils gufu. Snorri var Jǫrundarson; hann átti Ásnýju, dóttur Víga-Sturlu; þeira son var Gils, er átti Þórdísi Guðlaugsdóttur ok Þorkǫtlu Halldórsdóttur Snorra sonar goða; enn son Gils var Þórðr; hann átti Vigdísi Svertingsdóttur; þeira son var Sturla í Hvammi.

Ketill gufa hét maðr, Ørlygsson, Bǫðvarssonar, Vígsterkssonar; Ørlygr átti Signýju Óblauðsdóttur, systur Hǫgna ens hvíta. Ketill son þeira kom út síð landnámatíðar; hann hafði verit í vestrvíking, ok haft ór vestrvíking þræla írska; hét einn Þormóðr, annarr Flóki, þriði Kori, fjórði Svartr, ok Skorrar tveir. Ketill tók Rosmhvalanes; sat hann enn fyrsta vetr at Gufuskálum, enn um várit fór hann inn á Nes, ok sat á Gufunesi annan vetr; þá hljópu þeir Skorri enn ellri ok Flóki frá honum með konur tvær ok fé mikit; þeir váru á laun í Skorraholti, enn þeir váru drepnir í Flókadal ok Skorradal.

Ketill fekk øngvan bústað á Nesjum, ok fór hann inn í Borgarfjǫrð, ok sat hinn þriðja vetr at Gufuskálum við Gufá; snemma um várit fór hann vestr í Breiðafjǫrð at leita sér landa; þar var hann á Geirmundarstǫðum, ok bað Ýrar, dóttur Geirmundar, ok gat; vísaði hann þá Katli til landa fyrir vestan fjǫrð.

Enn meðan Ketill var vestr, þá hljópu þrælar hans á braut, ok kvámu fram um nótt á Lambastǫðum; þar bjó þá Þórðr, son Þorgeirs lamba ok Þórdísar Ingvarsdóttur, móðursystur Egils Skalla-Grímssonar; þrælarnir báru eld at húsum, ok brendu Þórð inni ok hjón hans ǫll; þeir brutu þar upp gervibúr, ok tóku vǫru mikla ok lausafé; síðan ráku þeir heim hross ok klyfjuðu; þeir snøru á leið til Álftaness.

Lambi enn sterki, son Þórðar, kom af þingi um morgininn, þá er þeir váru farnir á braut; hann fór eftir þeim, ok drifu þá menn til af bœjum; enn er þrælarnir sá þat, hljóp sinn veg hverr þeira. Þeir tóku Kora í Koranesi, enn sumir gengu á sund; Svart tóku þeir í Svartsskeri, enn Skorra í Skorrey fyrir Mýrum, enn Þormóð út í Þormóðsskeri; þat er vika undan landi.

Enn er Ketill gufa kom aftr, þá fór hann vestr fyrir Mýrar, ok var enn fjórða vetr á Snæfellsnesi at Gufuskálum; hann nam síðan Gufufjǫrð ok Skálanes til Kollafjarðar. Þau Ketill ok Ýri áttu tvá sonu: var Þórhallr annarr, faðir Hallvarar, er átti Bǫrkr, son Þormóðar Þjóstarssonar; annarr var Oddi, er átti Þorlaugu Hrólfsdóttur frá Ballará, ok Þuríðar, dóttur Valþjófs Ørlygssonar frá Esjubergi.

Kolli Hróaldsson nam Kollafjǫrð ok Kvígandanes ok Kvígandafjǫrð; hann seldi ýmsum mǫnnum landnám sitt [enn hann fór í Laxárdal á Hǫskuldsstaði er hann kvángaðisk. Hann var kallaðr Dala-Kollr; hans son var Hǫskuldr, er átti Hallfríði, dóttur Bjarnar, er nam Bjarnarfjǫrð fyrir norðan Steingrímsfjǫrð. Þeira son var Þorleikr, faðir Bolla, er átti Guðrúnu Ósvífrsdóttur].

Knjúkr hét son Þórólfs sparrar, er út kom með Ørlygi; hann var kallaðr Nesja-Knjúkr; hann nam nes ǫll til Barðastrandar frá Kvígandafirði, ok bjó....... Annarr son Knjúks var Einarr, faðir Steinólfs, fǫður Salgerðar, móður Bárðar svarta. Þóra hét dóttir Knjúks, er átti Þorvaldr, son Þórðar Víkingssonar; þeira son var Mýra-Knjúkr, faðir Þorgauts, fǫður Steinólfs, fǫður Hǫllu, móður Steinunnar, móður Hrafns á Eyri ok Herdísar, er átti Hallr Gizurarson lǫgmaðr. Dóttir Rafns var Steinunn, móðir herra Rafns ok Hǫllu, ok Herdís, er Svarthǫfði Dugfússon átti; þeira son Óli, er átti Salgerði Jónsdóttur; þeira dóttir Steinunn, er Haukr Erlendsson átti. Knjúkr átti Eyju, dóttur Ingjalds Helgasonar magra; þeira son var Eyjólfr, faðir Þorgríms Kǫtlusonar. Glúmr átti fyrr Kǫtlu; ok var þeira dóttir Þorbjǫrg kolbrún, er Þormóðr orti um. Steingrímr hét son Þorgríms, faðir Yngvildar, er átti Úlfheðinn á Víðimýri.

Geirsteinn kjálki nam Kjálkafjǫrð ok Hjarðarnes með ráði Knjúks. Hans son var Þorgils, er átti Þóru, dóttur Vestars af Eyri; þeira son var Steinn enn danski; hann átti Hallgerði Ǫrnólfsdóttur, Armóðssonar ens rauða. Ǫrnólfr átti Vigdísi dóttur Þorgils. Vigdís hét dóttir Steins ens danska ok Hallgerðar, er átti Illugi Steinbjarnarson; þeira dóttir var Þórunn, móðir Þorgeirs langhǫfða.

Geirleifr, son Eiríks Hǫgnasonar ens hvíta, nam Barðastrǫnd milli Vatnsfjarðar ok Berghlíða; hann var faðir þeira Oddleifs ok Helga skarfs. Oddleifr var faðir Gests ens spaka ok Þorsteins ok Æsu, er átti Þorgils, son Gríms ór Grímsnesi; þeira synir váru þeir Jǫrundr í Miðengi ok Þórarinn at Búrfelli. Gestr átti........; váru þeira bǫrn Þórðr ok Halla, er Snorri Dala-Álfsson átti. Þorgils var son þeira. Ǫnnur dóttir Gests var Þórey, er Þorgils átti; Þórarinn var son þeira, faðir Jódísar, móður Illuga, fǫður Birnu, móður Illuga ok Arnórs ok Eyvindar, fǫður Steingríms, fǫður Helgu, móður Jórunnar, móður Hauks Erlendssonar.

Helgi skarfr var faðir Þorbjargar kǫtlu, er átti Þorsteinn Sǫlmundarson; þeira synir Refr í Brynjudal ok Þórðr, faðir Illuga, fǫður Hróðnýjar, er Þorgrímr sviði átti. Þórdís hét ǫnnur dóttir Helga skarfs, er átti Þorsteinn Ásbjarnarson ór Kirkjubœ austan; þeira son var Surtr, faðir Sighvats lǫgsǫgumanns.

Geirleifr átti Jóru Helgadóttur. Þorfinnr hét enn þriði son Geirleifs; hann átti Guðrúnu Ásólfsdóttur; Ásmundr hét son þeira; hann átti Hallkǫtlu, dóttur Bjarnar Mássonar, Ásmundarsonar. Hlenni hét son þeira; hann átti Ægileifu, dóttur Þorsteins Krǫflusonar. Þorfiðr var son þeira, faðir Þorgeirs langhǫfða.

Þorsteinn Oddleifsson var faðir Ísgerðar er átti Bǫlverkr, son Eyjólfs ens grá; þeira son Gellir lǫgsǫgumaðr. Vény var enn dóttir Þorsteins, móðir Þórðar krákunefs; þaðan eru Krákneflingar komnir.

Armóðr enn rauði Þorbjarnarson, fóstbróðir Geirleifs, nam Rauðasand; hans synir váru þeir Ǫrnólfr ok Þorbjǫrn, faðir Hrólfs ens rauðsenzka.

Þórólfr spǫrr kom út með Ørlygi, ok nam Patreksfjǫrð fyrir vestan, ok Víkr fyrir vestan Barð nema Kollsvík; þar bjó Kollr, fóstbróðir Ørlygs. Þórólfr nam ok Keflavík fyrir sunnan Barð, ok bjó at Hvallátrum. Þeir Nesja-Knjúkr ok Ingólfr enn sterki ok Geirþjófr váru synir Þórólfs sparrar. Þórarna var dóttir Ingólfs, er Þorsteinn Oddleifsson átti.

Þorbjǫrn tálkni ok Þorbjǫrn skúmi, synir Bǫðvars blǫðruskalla, kvámu út með Ørlygi; þeir námu Patreksfjǫrð hálfan ok Tálknafjǫrð allan til Kópaness.

Ketill ilbreiðr, son Þorbjarnar tálkna, nam Dali alla frá Kópanesi til Dufansdals; hann gaf Þórǫrnu, dóttur sína, Hergilsi hnappraz; rézk hann þá suðr í Breiðafjǫrð, ok nam Berufjǫrð hjá Reykjanesi.

Ǫrn hét maðr ágætr; hann var frændi Geirmundar heljarskinns; hann fór af Rogalandi fyrir ofríki Haraldar konungs; hann nam land í Arnarfirði svá vítt sem hann vildi; hann sat um vetrinn á Tjaldanesi, þvíat þar gekk eigi sól af um skammdegi.

Án rauðfeldr, son Gríms loðinkinna ór Hrafnistu, ok Helgu, dóttur Ánar bogsveigis, varð missáttr við Harald konung enn hárfagra, ok fór því ór landi í vestrvíking; hann herjaði á Írland, ok fekk þar Grelaðar, dóttur Bjartmars jarls; þau fóru til Íslands ok kvámu í Arnarfjǫrð vetri síðar enn Ǫrn. Án var enn fyrsta vetr í Dufansdal; þar þótti Grelǫðu illa ilmat ór jǫrðu. Ǫrn spurði til Hámundar heljarskinns, frænda síns, norðr í Eyjafirði, ok fýstisk hann þangat; því seldi hann Áni rauðfeld lǫnd ǫll milli Langaness ok Stapa; Án gerði bú á Eyri; þar þótti Grelǫðu hunangsilmr ór grasi.

Dufan var leysingi Ánar; hann bjó eftir í Dufansdal.

Bjartmarr var son Ánar, faðir Végesta tveggja ok Helga, fǫður Þuríðar arnkǫtlu, er átti Hergils; þeira dóttir var Þuríðr arnkatla, er átti Helgi Eyþjófsson. Þórhildr var dóttir Bjartmars, er átti Vésteinn Végeirsson; Vésteinn ok Uðr váru bǫrn þeira.

Hjallkárr var leysingi Ánar; hans son var Bjǫrn, þræll Bjartmars; hann gaf Birni frelsi; þá grœddi hann fé, enn Végestr vandaði um, ok lagði hann spjóti í gegnum, enn Bjǫrn laust hann með grefi til bana.

Geirþjófr Valþjófsson nam land í Arnarfirði: Forsfjǫrð, Reykjarfjǫrð, Trostansfjǫrð, Geirþjófsfjǫrð, ok bjó í Geirþjófsfirði; hann átti Valgerði dóttur Úlfs ens skjálga. Þeira son var Hǫgni; hann átti Uði, dóttur Óláfs jafnakolls ok Þóru Gunnsteinsdóttur. Atli var son þeira; hann átti Þuríði Þorleifsdóttur, Eyvindarsonar knés ok Þuríðar rúmgyltu. Þorleifr átti Gró, dóttur Þórólfs brækis. Hǫskuldr var son Atla, faðir Atla, fǫður Bárðar ens svarta, fǫður Sveinbjarnar, fǫður Rafns, fǫður Steinunnar, móður herra Rafns.

Eiríkr hét maðr, er nam Keldudal fyrir sunnan Dýrafjǫrð ok Sléttanes til Stapa, ok til Háls ens ytra í Dýrafirði; hann var faðir Þorkels, fǫður Þórðar, fǫður Þorkels, fǫður Steinólfs, fǫður Þórðar, fǫður Þorleifar, móður Þorgerðar, móður Þóru, móður Guðmundar gríss, er átti Solveigu, dóttur Jóns Loftssonar. Þeira bǫrn váru Magnús góði, ok Þorlákr, faðir Árna byskups, ok Þóra, móðir Gizurar jarls. Þorleif var móðir Línu, móður Ceciliu, móður Bárðar ok Þorgerðar, er átti Bjǫrn enn enski; þeira bǫrn váru þau Arnis ábóti ok Þóra, er átti Ámundi Þorgeirsson.

Vésteinn son Végeirs, bróðir Vébjarnar Sygnakappa, nam land milli Hálsa í Dýrafirði ok bjó í Haukadal; hann átti Þórhildi Bjartmarsdóttur; þeira bǫrn Vésteinn ok Uðr.

Þorbjǫrn súrr kom út at albygðu landi; honum gaf Vésteinn hálfan Haukadal; hans synir váru þeir Gísli ok Þorkell ok Ari, enn dóttir Þórdís, er Þorgrímr átti; þeira son Snorri goði. Síðan átti Þórdísi Bǫrkr enn digri; þeira dóttir Þuríðr, er átti Þorbjǫrn digri, enn síðar Þóroddr skattkaupandi; þeira son var Kjartan at Fróðá.

Dýri hét maðr ágætr; hann fór af Sunnmœri til Íslands at ráði Rǫgnvalds jarls, enn fyrir ofríki Haralds konungs hárfagra. Dýri nam Dýrafjǫrð ok bjó at Hálsum; hans son var Hrafn á Ketilseyri, faðir Þuríðar, er átti Vésteinn Vésteinsson; þeira synir Bergr ok Helgi.

Þórðr hét maðr, Víkingsson, eða son Haraldar konungs hárfagra; hann fór til Íslands, ok nam land milli Þúfu á Hjallanesi ok Jarðfallsgils; hann bjó í Alviðru; Þórðr átti Þjóðhildi, dóttur Eyvindar austmanns, systur Helga ens magra. Þorkell Alviðrukappi enn auðgi var son þeira; hann átti....... Þórðr hét son þeira; annar Eyjólfr, faðir Gísla, er átti Hallgerði Vermundar dóttur ens mjóva; þeira son var Brandr faðir Guðmundar prests í Hjarðarholti, enn dóttir Þóra, er átti Brandr Þórhaddsson; þeira dóttir Steinvǫr, móðir Rannveigar, móður Sæhildar, er Gizurr átti. Helgi hét annarr son Eyjólfs; hans bǫrn váru þau Óláfr ok Guðleif, er Fjarska-Fiðr átti.

Þorvaldr hvíti hét annarr son Þórðar Víkingssonar; hann átti Þóru, dóttur Nesja-Knjúks; þeira son var Mýra-Knjúkr, faðir Þorgauts, fǫður Steinólfs, er átti Herdísi Tindsdóttur; þeira bǫrn váru þau Þorkell á Mýrum, ok Halla, er átti Þórðr Oddleifsson.

Annarr son Þorvalds hvíta var Þórðr ǫrvǫndr, er átti Ásdísi Þorgrímsdóttur, Harðrefssonar. Móðir Ásdísar var Rannveig, dóttir Grjótgarðar Hlaðajarls. Ásdís var móðir Úlfs stallara, enn systir Ljóts ens spaka, ok Halldísar, er Þorbjǫrn Þjóðreksson átti. Dóttir þeira Þórðar ǫrvandar var Oddkatla, er átti Sturla Þjóðreksson; þeira son Þórðr, er átti Hallberu, dóttur Snorra goða; þeira dóttir Þuríðr, er átti Hafliði Másson. Snorri var son Þórðar Sturlusonar, er átti Oddbjǫrgu dóttur Gríms Loðmundarsonar; þeira bǫrn váru þau Flugu-Grímr ok Hallbera, er Mág-Snorri átti.

Dœtr Sturlu váru sex: ein var Ásný, er Snorri Jǫrundarson átti; þeira dóttir Þórdís, móðir Hǫskulds læknis, fǫður Margretar, móður Þorfinns ábóta. Son þeira Snorra ok Ásnýjar var Gils, faðir Þórðar, fǫður Sturlu í Hvammi.

Ingjaldr Brunason nam Ingjaldssand milli Hjallaness ok Ófœru; hann var faðir Harðrefs, fǫður Þorgríms, fǫður þeira Ljóts ens spaka, sem áðr var ritat.