Þat er at segja frá Þorgilsi Skarða, at hann reið norðr til Skagafjarðar þegar er þeir Hrafn ok Sturla riðu suðr á heiði. Var hann með Heinreki biskupi um Jólin ok þeir átta saman. Arnórr Eireksson var með þriðja mann á Víðimýri; tveir vóru at Stað með Páli Kolbeins syni. Þorgils reið síðan til Borgarfjarðar fyrir Fǫstuna, ok sat í Stafaholti, ok hafði vǫrðu sterka. Ekki fundusk þeir Gizurr um vetrinn.
Ok um vetrinn milli Jóla ok Fǫstu kom Gizurr sunnan til Skagafjarðar, ok þá keypti hann Flugumýri at Heinreki biskupi; þvíat Helga Sæmundar dóttir hafði biskupi í hendr fengit. Hallr, son hans, var með honum, ok nær tuttugu menn; sagði hann bóndum í Skagafirði, at hann mundi búnat sinn reisa um várit á Flugumýri. Þat sagði hann ok Eyjólfi Þorsteins syni, at hann vildi hann eigi í Skagafirði. Eptir þat reið Gizurr suðr. Var þá kyrt um vetrinn þaðan frá. Hrafn fór heim til Sauðafells at Fǫstunni.
Um várit eptir Fardaga fór Gizurr sunnan til Flugumýrar ok Gróa kona hans, ok Hallr son þeirra. Nær þrír tigir manna vóru þau saman. Var þá bú risulikt saman sett á Flugumýri.
Gizurr reið til þings um sumarit norðan með þrjú hundruð manna. Ísleifr ok Ketilbjǫrn synir hans kómu til móts við hann á Beiti-vǫllum með fjǫgur hundruð manna. Riðu þeir allir samt á þing. Þingreið var lítil vestan ór sveitum. Óláfr Þórðarson hafði þá lǫgsǫgn. Hann reið þá eigi til þings, ok [eigi] þeir Hrafn fyrir ófriði. Þórðr Andrésson reið til þings með Gizurar-sonum, ok veitti þeim at ǫllum málum á því þingi, ok Andrés faðir hans. Með ráði Gizurar tók lǫgsǫgu á því sumri Teitr Einarsson, ok allra þeirra manna er þá vóru á þingi. Gizurr gékk til Lǫgbergs, áðr hann reið af þingi, ok lét lýsa fjǫrráða-sǫkum við sik á hendr Hrafni ok Sturlu ok ǫllum þeim mǫnnum er í þeirri ferð vóru um vetrinn. Síðan riðu menn af þingi. Fór Gizurr heim á Flugumýri.