Bókastaðir

An Old Norse Library
Chapter 36
Thuo giuuet im uualdan Crist
sithon fon them seuuesuno drohtines,
enag barn godes.Elitheodo quam im,
gumon tegegnes:uuarun is guodon uuerc
ferran gifragi,that hie so filo sagda
uuararo uuordo:uuas im uuilleo mikil
that hie sulic folcscipifrummean mosti
that sia simla gernogode thionodin,
uuarin gihorigahebancuninge
mancunnies manag.Thuo giuuet hie im oƀar thia marca Iudeono, suohta im Sydono burg,habda gisithos mid im,
guoda iungron.Thar im tegegnes quam
en idis fan ođron thiodon;siu uuas iro ediligiburdeo
cunnies fon Chananeo lande;siu bad thena craftina drohtin
helagna that hie iro helpa giredi,quat that iro uuari harm gistandan
sorga an iro selbaro dohter,quat that siu uuari mid suhteon bifangan: 'bedrogan hebbiat sia dernia uuihti.Nu is iro dod at hendi, thia uurethun hebbiat sia giuuittiu binomana.Nu biddiu ik thi, uualdand fro min,
selƀo suno Dauides,that thu sia af sulicon suhteon atomies,
that thu sia so armaegrohtfullo
uuamscathon biuueri.'Ne gaf iro thuo noh uualdan Crist
enig anduuordi;siu im after geng, folgoda fruocna,antthat siu te is fuotun quam, gruotta ina greotandi.Iungron Cristes
badun iro herronthat hie an is hugie mildi
uurdi them uuiƀa.Thuo habda eft is uuord garo
suno drohtinesendi te is gesithon sprac: 'Erist scal ik Israhelesaƀaron uuerthan
folcscipe ti froman,that sia ferahtan hugi
hebbian te iro herren:im is helpono tharf, thia liudi sind forlorana,forlatan hebbiat
uualdandes uuord,that uuerod is gituiflit, driƀat im dernian hugi,ne uuelliat iro drohtine horan
Israhelo erlscipi,ungiloƀiga sind
helithos iro herren:thoh scal thanan helpa cuman
allon elithiodon.'Agaleto bad
that uuiƀ mid iro uuordonthat iro uualdand Crist
an is muodseƀonmildi uurdi,
that siu iro barnes forthbrucan muosti,
hebbian sia hela.Thuo sprak iro herro angegin
mari endi mahtig:'Nis that ' quathie, 'mannes reht,
gumono nigenonguod te gifrummeanne
that hie is barnonbrodes aftihe,
uuernie im oƀar uuilleon,lati sia uuiti tholon,
hungar hetigrimman,endi fuode is hundos met thiu. ' 'Uuar ist that, uualdend ' quat siu,'that thu mid thinon uuordon sprikis,
suothlico sagis:huat, thoh oft an seli innan
undar iro herron discehuelpos huereƀat
brosmono fullathe fon them biede nithar
antfallat iro frohen.'Thuo gihorda that friđubarn guodes
uuilleon thes uuiƀesendi sprak iro mid is uuordon tuo: 'Uuola that thu uuiƀ haƀisuuilleon guodan! Mikil ist thin giloƀoan thia maht godes,
an thena liudo drohtin.All giuuirđit gilestid so
umbi thines barnes lifso thu badi te mi. ' Thuo uuarth siu san gihelidso it thie helago gisprak
uuordon uuarfaston:that uuiƀ faginoda
thes siu iro barnes forthbrucan muosta: habda iru thuo giholpanhelendio Crist, habda sia forfanganafiondo crafte,
uuamscathon biuuerid.Thuo giuuet im uualdand forth
barno that besta,suohta im burg odra,
thiu so thicco uuasmet thero thiodo Iudeono,
mid sutharliudion gisetan.Thar gifrang ik that hie is gisithos grotta,
thia iungron thia hie im habda be is guodi gicorana,that sia mid im gerno giuuonodin
uueros thuru is uuisun spraca:'All scal ik iu ' quathie, 'mid uuordon fragon,
iungron mina:huat quethat thesa Iudeo liudi,
mari meginthioda,huat ik manno si? ' Im anduuordidun frolicois friund angegin,
iugron sina:'Nis thit Iudeono folc,
erlos enuurdia:sum sagit that thu Elias sis,
uuis uuarsago,the hier iiu lango uuas
guod undar thesan gumscipie;sum sagit that thu Iohannes sis,
diurlic drohtines bodo,thie her dopida iu
uuerod an uuatere;alla sia mid uuordon sprecat
that thu enhuilic sisedilero manno,
thero uuarsaganothia hier mid uuordon iu
lerdun thesa liudi,endi that thu sis eft an thit lioht cuman
te uuisonne theson uuerode.'Thuo sprac eft uualdand Crist: 'Hue quethat gi huat ik si ' quat$ hie,'iungron mina,
liobun liuduueros?'Thuo ti lat ni uuarth
Simon Petrus:sprac san angegin
eno for im allon– habda im ellen guod,
thrista githahti,uuas is thiodene hold –:
Chapter 37
'Thu bist thie uuaro ' quat Petrus,'uualdandes suno
libbiandes godes,the thit lioht giscop,
Crist cuning euuig:so uuellat uui quethan alla
iungron thina,that thu sis god selbo,
helendero best.'Thuo sprac im eft is herro angegin: 'Salig bis thu Simon ' quathie, 'suno Ionases;ne mahtas thu that selƀo gihuggian,
gimarcon an thinon muodgithahtion,ne it ni mohta thi mannes tunga
uuordon giuuisan,ac deda it thi uualdand selƀo,
fader allaro firio barno,that thu so forth gispraki
so deopo be drohtin thinan.Diurlic scalt thu thes lon antfahan, hluttro habis thu an thinan herron giloƀon,hugiscefti sind thina stena gilica, so fast bist thu so felis thie hardo,hetan sculun thi firiho barn
sancte Peter:obar them stene scal man minan seli uuirkean,
helag hus godes;thar scal is hiuuiski tuo
salig samnon:ni mugun uuid them thinon suitheon crafte
anthebbean helliportun.Ik fargibu thi himilriceas slutila,
that thu muost after miallon giuualdan
cristinon folke;cumat alla te thi
gumono gestos;thu haƀi grotan giuuald,
huena thu hier an erthueldibarno
gibindan uuellies:them is bethiu giduan,
himilriki bilocanendi hellia sind im opana,
brinnandi fiur;so huena so thu eft antbindan uuili,
antheftean is hendi,them ist himilriki
antlocan liohto mestendi liƀ euuig,
gruoni godes uuang.Met sulicoro ik thi giƀu uuelliu
lonon thinon gilobon.Ne uuelliu ik that gi theson liudeon noh
marean thesaro menigithat ik biun mahtig Crist,
godes enag barn.Mi sculun Iudeono noh
unsculdignaerlos bindan,
uuegian mik te uundron– duot mi uuities filo –
innan Hierusalemgeres ordon,
ahtean mines aldreseggion scarpon,
belosian mi libu.Ik an theson liohte scal
thuru uses drohtines craftfon dode astandan
an them thriddeon dage.'Thuo uuarth thegno best
suitho an sorogon,Symon Petrus, uuarth im hugi hreuuuog,endi te is herron sprak
rink an runun:'Ni scal that riki god ' quathie,
'uualdand uuellianthat thu iu sulic uuiti mikil
githolos undar theson thioda:nis thes tharf nigen,
helag drohtin.Thuo sprac im eft is herro angegin,
mari mahtig Crist– uuas im an is muode hold –: 'Huat, thu nu uuidaruuard bist ' quathie,'uuillien mines,
thegno besta!Huat, thu thesaro thiodo bicanst
menniscan sidon:thu ni uuest thia maht godes
thia ik gifrummean scal.Ik mag thi filo seggean
uuaron uuordon,that hier under theson uuerode standan
gisithos minathia ni motun sueltan err,
huereƀan an hinfarder sia himiles lioht,
godes riki sehat.'Kos im iungron thuo
san after thiuSymon Petruse,
Iacobe endi Iohanneseguomon tuena,
bethia thia gibrođer,endi im thuo uppan thena berg giuuet
sundar mid them gisithonsalig barn godes
mid them thegnon thrim,thiodo drohtin,
uualdand thesaro uueroldes:uuolda im thar uundres filo,
tecno togian,that sia gitruodin thiu bat
that hie selƀo uuassuno drohtines,
helag hebancuning.Thuo sia an thena hohan uual
stigun sten endi berg,antthat sia te thero stedi quamun
uueros uuidar uuolcanthar uualdand Crist,
cuningo craftigostgicoran habda,
that hie is godcundiiungron sinon
thuru is enes craftogian uuolda,
berehtlic bilithi.
Chapter 38
Thuo im thar ti bedu gihneg; thuo uuarth im thar uppeodarlicora
uuliti endi giuuadi:uurđun im is uuangan leohta,
blicandi so thie berahto sunno:so scen that barn godes: liuhta is lichamo,liomon stuodun
uuanamo fon them uualdandes barne;uuart is giuuadi so huitt
so sneo te sehanne.Thuo uuarth thar seldlic thing
giogid after thiu:Elias endi Moyses
quamun thar te Cristeuuid so craftina
uuordon uuehslon.Thar uuarth so uunsam spraka,
so guod uuord undar gumonthar the godes suno
uuid thia mariun manmahlean uuolda, so blithi uuarth uppan them berge:scen that berahta lioht, uuas thar gard godlicendi gruoni uuang,
paradise gilik.Petrus thuo gimalda,
helid hardmuodigendi te is herron sprak, gruotta thena godes suno:'Guod ist it hier te uuesanne,
ef thu it gikiosan uuili,Crist alouualdo,
that man thi hier an thesaro hohien hus giuuirkie,
marlico gemaco,endi Moysese ođar
endi Eliase thridda:thit is ođes hem,
uuelono uunsamost.'Reht so hie thuo that uuord gisprak,
so liet thie luft an tue:lioht uuolkan scan,
glitendi glimo,endi thia guodan man
uulitigsconi biuuarp.Thuo fon them uuolcne quam
helag stemne godesendi them helithon thar
selbo sagda,that that is suno uuari,
libbendero liobost:'an them mi licod uuell
an minon hugisceftion.Them gi horean sculun, fulgangat im gerno.'Thuo ni mahtun thia iungron Cristes
thes uuolcnes uulitiendi uuord godes,
thia is mikilun mahtthia man antstandan, ac sia bifellun thuo forthuuardes:ferahes ni uuandun,
lengiron libes.Thuo geng im tuo thie landes uuard, behren sia mid is handonhelendero best, hiet that sia im ni andriedin:'Ni scal iu hier derian eouuiht
thes gi hier seldlikesgisehan hebbeat,
marero thingo.'Thuo eft them mannon uuarth
hugi at iro hertenendi gihelid muod,
gibada an iro brioston:gisahun that barn godes
enna standan:uuas that odar thuo
bihlidan himiles lioht.Thuo giuuet im thie helago Crist
fon them berege nithar;gibod after thiu
iungron sinonthat sia oƀar Iuđeono folc
ne sagdin thiu gisiuni:'err than ik selƀo…
suitho diurlicofon dode astande,
arise fon thero rastu:sithor mugun gi it rekkean forth,
marean oƀar middilgardmanagon theodon
vuido after thesaro uueroldi. '
Chapter 39
Thuo giuuet im uualdan Crist
eft an Galileo land,suohta is gadulingas
mahtig is mago hem,sagda thar manages huat
berehtero bilitho,endi that barn godes
them is saligon gisithonsorogspell ni forhal, ac hie im opanlicoallon sagda
them is guodon iungron,huo ina scolde that Iuđeono folc
uuegian te uundron.Thes uurthun thar uuisa man
suitho an sorogon:uuarth im ser hugi,
hriuuig umbi iro herta:gihordon iro herron thuo,
uualdandes sunouuordon tellean
huat hie undar thero thiodotholian scolda
uuillendi undar them uueroda.Thuo giuet im uualdand Crist,
gumo fan Galilea,suohta im Iudeono burg, quamun im te Capharnaum.Thar fundun sia enna cuninges thegan
uulancan under tham uuerode:quat that hie uuari giuueldig bodo
adalkesures;hie gruotta after thiu
Symon Petruse,quat that hie uuari gisendid tharod
that hie thar gimanodimanno gihuilican
thero hoƀidscattothia sia te them hoƀe scoldin
tinsi geldan:'Nis thes tueho enig
gumono nigenon,ne sia ina forguldin san
methmo custeon,neƀan iuuua mester enn
haƀit it forlatan.Ni scal that licon uuell
minon herron,sa man it im at is hoƀe cuthit,
athalkesure.'Thuo geng after thiu
Symon Petrus:uuolda it seggian thuo
herren sinon:hie uuas is an is hugie iu than
giuuaro uualdan Crist:im ni mohta uuord enig
biholan uuerthan:hie uuissa hugiscefti
manno gihuilices –:hiet thuo thena is mareon thegan,
Simon Petrusean thena seo innan
angul uuerpan:'Succan so thu thar erist mugis
fisk gifahen,so tiuh thu thena fan them fluode te thi, antklemmi im thiu kinni:thar maht thu undar them kaflon niman
guldina scattos,that thu forgeldan maht
them manne te gimuodieminan endi thinan
tinseo so huilicanso hie us tuo suokit. ' Hie ni thorfta im thuo after thiuodaru uuordu
furthor gibiodan:geng fiscari god,
Simon Petrus,uuarp an thena seo innan
angol an uthiunendi uupp gitoh
fisk af fluodemid is folmon tuem, teclof im thiu kinniendi an them kaflon nam
guldina scattos:deda all so im thie godes suno
uuordon giuuisda.Thar uuas thuo uualdandes
megincraft gimarid,huo scal allaro manno gihuilik
suitho uuillendiis uueroldherren
sculdi endi scattosthia imi giscerida sint
gerno geldan:ni scal ina forgumon eouuiht, ni formuni ina an is mode,ac uuese im mildi an is huge, thiono im thiolico:an thiu mag hie thiedgodes
uuilleon geuuirkanendi oc is uueroldherren
huldi hebbean.
Chapter 40
So lerda thie helago Crist
thia is guodun iungron:'Ef enig gumono uuid iu ' quathie,
'sundia giuuirkie,than nim thu ina sundar te thi
thena rinc an runaendi im is rada sagi, uuisi im mid uuordon.Ef im than thes uuirdig ne si
that hie thi gihore,halo thi thar ođran tuo
guodero gumonoendi lah im is grimmun uuerc, sac ina suothuuordon.Ef im than is sundia after thiu,
lethuuerc ne lethon,than giduo it ođran liudeon cuth, mari it than for menegiendi lat manno filo
uuitan is foruuruhti:otho biginnid im thann is uuerc tregan,
an is hugie hreuuuan,than hie it gihorid helitho filo
ahton eldibarn,endi im is ubilun dad
uuereat mid uuordon.Ef hie thann oc uuendian ni uuili,
ac formuodit sulica menigi,than lat thu thena man faran, haƀi ina than for hethinonendi lat ina thi an thinon hugie lethan, mith is an thinon muode,ne si that im eft mildi god,
her hebancuninghelpa forlihe,
fader allero firoho barno.'Thuo fragoda Petrus,
allaro thegno bestthiodon sinan: 'Huo oft scal ik them mannonthia uuid mi hebbeat
lethuuerc giduan,lieƀo drohtin,
scal ik im sebun sithoniro sundea alatan
uurethero uuerco,er than ik is eniga uuraca frummea
lethes te lone?'Thuo sprak eft thie landes uuard
angegin thie godes sunoguodon thegne: 'Ne seggiu ik thi fan siƀunin,so thu selƀo sprikis,
mahlis mid thinu muthu:ik duon thi mera thar tuo: siƀun sithon siƀontigso scalt thu sundea gihuem
lethes alatan:so uuelliu ik thi te leron geƀan
uuordon uuarfaston.Nu ik thi sulica giuuald forgaf
that thu mines hiuuiskiesherost uuaris,
manages mankunnies,nu scalt thu im mildi uuesan,
liudeon lithi.'Thuo thar te them lerande quam
enn iung man angeginendi fragoda Iesum Crist: 'Mestar thie guodo ' quathie,'huat scal ik mines duon
that ik hebanrikihebbean muoti? ' Habda im oduuelonallon giuunnan,
methomhorđ manag,thoh he mildan hugi
bari an is briostun.Thuo sprac im that barn godes: 'Huat quiđis thu umbi godi?nis that gomono enig
botan thie enothie thar all giscuop
uuerold endi uunnia.Ef thu is uuillion habis
that thu an lioht godeslithan muotis,
than scalt thu bihaldanthia helagan lera
thia thar an them aldoneuue gibiudit,
that thu man ni slah,ne thu menes ni sueri,
forlegarnissia farlatendi luggi giuuitscipi,
strid endi stulina;ni uuis thu te starc an hugie,
ne nithin ne hatul,ni nodrof ni frumi; abunst alla forlat;uuis thinon eldiron guod,
fader endi muoderendi thinon friundon hold,
them nahiston ginathig.Than thu thi giniedon muost
himilo rikies,ef thu it bihaldan uuili,
fulgangan godes lerun.'Thuo sprac eft thie iungo man: 'All hebbiu ik so gilestid ' quathie,'so thu mi leris nu,
uuordon uuisis,so ik is eouuiht ne forliet
fan minero kindiski.'Thuo bigan ina Crist sehan
an mid is ogon:'En is thar noh nu ' quathie,
'uuan thero uuerco:ef thu is uuillion habis
that thu thionon thiodnethionon muotis
herron thinon,than scalt thu that thin horth neman, scalt thinon oduuelonallan forcopan,
diuria methmos,endi delian het
armon mannon:than habis thi after thiu
horth an himile;cum thi than gihaldan te mi, folgo thi minero ferdi:than habis thu friđo sithor. ' Thuo uurdun Cristes uuordkindiungan man
suitho an sorogon:uuas im ser hugi,
muod umbi herte– habda metmo filo,
uuelono giuunnan –:uuenda im eft thanan, uuas im unothoinnan brioston,
an is sebon suaro.Sah im after thuo
Crist alouualdo,quat it thuo thar hie uuelda
te them is iungron geginuuardon,that uuari an godes riki
unothi odigan manupp ti cumanne: 'Othor mag man oluuendeon,thoh hie si unmet grot,
thuru nadlun gat,thoh it si naro suitho,
saftor thuruslopianthan mugi cuman thiu seola te himile
thes odages mannesthie hier all haƀit
giuuendit an thena uueroldscattuuilleon sinon,
muodgithahti,endi ne hugit umbi thia maht godes. '