So uuisda hie thuo mid uuordon;stuod uuerod mikil umbi that barn godes,gihordun ina bi bilithon filo umbi thesaro uueroldes giuuanduuordon tellian;quat that im oc en ađales manan is acker saidi hluttar hrencornihandon sinon:uuolda im thar so uunsamesuuastmes tilian, fagares fruhtes.Thuo geng thar is fiond after thuru dernian hugi,endi it all mid durthu oƀarseu, mid uueodo uuirsiston.Thuo uuohsun sia bethiu, ge that corn ge that crud.So quamun gangan is hagastoldos te hus,iro herren sagdun thegnos iro thiodnethristion uuordon:'Huat, thu saidos hluttar corn,herro thie guodo, enuuald an thinon accar:nu ni gisihit enig erlo than mer uueodes uuahsan.Hui mohtta that giuuirthan so? 'Thuo sprak eft thie adales manthem erlon tegegnes, thiodan uuiđ is thegnos,quat that hie it magti undarthenkian uuel, that im thar unhold manafter saida, fiond fecni crud:'Ne gionsto mi thero fruhtio uuel,auuerda mi thena uuastom.'Thuo thar eft uuini sprakun, is iungron tegegnes,quathun that sia thar uueldin gangan tuo, cuman mid craftuendi losian that crud thanan, halon it mid iro handon.Thuo sprac im eft iro herro angegin:'Ne uuelleo ik that gi it uuiodon ' quathie,'huand gi biuuardon ni mugun, gigomean an iuuuon gange,thoh gi it gerno ni duan, ni gi thes cornes te filokitho auuerdiat, felliat under iuuua fuoti.Late man sia forth hinan bethiu uuahsanund er beuuod cume endi an them felde sindfruhti ripia, aroa an them accare:than faran uui thar alla tuo,halon it mid ussan handonendi that hrencurni lesan subro tesamneendi it an minon seli duoian,hebbean it thar gihaldan,that it huergin ni mugi uuiht auuerdian,endi that uuiod niman,bindan it te burthinnionendi uuerpan it an bitar fiur,laton it thar haloianheta logna, eld unfuodi.'Thuo stuod erl manag, thegnos thagiandi,huat thiodgomo, mari mahtig Cristmenian uueldi, bocnian mid thiu bilithubarno rikiost.Badun thuo so gernoguodan drohtin antlucan thia lera,that sia muostin thea liudi forth helaga horean.Thuo sprak im eft iro herro angegin, mari mahti Crist:'That ist ' quathie, 'mannes suno:ik selƀo biun that thar saiu,endi sind thesa saliga man that hluttra hrencornithia mi hierr horiat uuel, uuirkeat minon uuilleon;thius uuerold is thie accar, thit breda bulandbarno mancunnies;Satanas selƀoist that thar sait after so letlica lera:habit thesaro liudeo so filo, uuerodes auuerdit,that sia uuam frummeat, uuirkeat after is uuilleon;thoh sculun sia her uuahsan forth thia forgripanun gomon,so samo so thia guodun man, antthat mutspelles meginoƀar man ferit, endi thesaro uueroldes.Thann is allaro accaro gihuilic geripod an thesom rikie:sculun iro reginogiscapu frummian firio barn.Than teferit ertha,that is allero beuuo bredost;than cumit thie berehto drohtin oƀane mid is engilo craftu,endi cumat all tesamne liudi thia io thit lioht gisahun,endi sculun than lon antfahan ubiles endi guodes.Than gangat engilos godes, helaga hebanuuardosendi losiat thia hluttrun man sundar tesamneendi duot sia an sinsconi, ho himiles lioht,endi thia ođra an helligrund,uuerpat thia faruuarahtunan uuallandi fiur:thar sculun sia gibundanabittra logna, thrauuerc tholon,endi thia ođra thioduuelon an hebanrikie,huitero sunnun luhtian gilico.Sulic lon nimat uueros uueldadio.So huie so giuuit egi, gihugdi an is herten,eftha gihorean mugi erl mid is oron,so lata im thitt an innan sorga an is muodsebon,huo hie scal an them marien dage uuid thena rikeon godan rethiu standan uuordo endi uuerco allarothie hie an thesaro uueroldi giduot.That is egislicostallero thingo, forohtlicost firio barnon,that sia sculun uuid iro frahon mahlon, gomon uuid thena guodan drohtin:than uueldi gerno gihuie uuesan allaro manno gihuilicmenes tuomig, sliđero sacono.After thiu scal sorogon err allaro liudeo gihuilic,err hie thit lioht ageƀe, thie than egan uuilialdarlangan tir, hoh hebanrikiendi huldi godes. '
Chapter 32
So gifran ik that thuo selƀosuno drohtines allaro barno bestbilithi sagda, huilic thero uuarian uueroldrikie under helithcunnehimilrike gilik;quat that oft luttiles huatliohtera uuirthi, so hoho afhobi,so duot himilriki:'That is simla mirathann is mann enig uuanie an thesaro uueroldi.Oc ist im that uuerc gilik that man an seo innansegina uuirpit, fisknett an fluotendi fahit bethiu ubila endi guoda,tiuhit upp te stade, lithot sia ti lande,lisid after thiu thia guodan an greoteendi latit thia ođra eft an grund faran, an uuidan uuag.So duot uualdand god an them marion dagemenniscono barn:brengit irminthiodall tesamne,lisit im thann thia hluttronan hebanriki,latit thia forgriponunan grund faran hellifiures.Ni uuet helitho man thes uuities uuiderlagathes thar uueros thingiat an them infernairminthioda.Than hald ni mag thero miedun mangimacon findan ne thes uuelon ne thes uuillenthes thar uualdand skerit, gildid god selƀogomono so huilicon so ina hier gihaldit,that hie an hebanriki, an that langsama liohtlithan muoti. 'So lerda hie thuo mid listion.Than fuorun thar thia liudi tuo oƀar all Galilealandthat godes barn sehan:dadun it bi them uundre,huanan im mohti sulic uuord cuman, so spahlico gisprocan,that hie spel godes io so suodlicoseggian cunsti, so craftlico giquethan:'Hie ist thieses cunnies hinan ' quathun sia, 'thie man thuru magscipi:hier is is muoder mid us, uuiƀ undar theson uueroda.Huat, uui thia hier uuitun alla,so cuth is us is cunniburdendi is cnuosles gihuat:auuohs all under theson uueroda:huanan scoldi im sulik giuuit cuman, merun mahtigthan hier ođra manna egin? 'So formonsta ina that manno folcendi gispracun im gimedlic uuord,forhogdun ina so helagna,horian ni uueldun is gibodscipi.Ne hie thar oc bilitho filo thuru iro ungiloƀonogian ni uuelda torohtero tecno,huand hie uuissa iro tuiflian hugi, iro uurethan uuillion,that ni uuarun uueros ođra so grimma under Iudeonso uuarun umbi Galilealand, so hardo gihugida:so thar uuas thie helago Crist giboran that barn godes,sia ni uueldun is gibodscipi thoh anfahan ferahtlico,ac bigan that folc undar im rincos radan,huo sia thena rikion Crist uuegdin te uundron.Hietun thuo iro uuerod cuman gisithi tesamne:sundia uueldun an thena godes sunogerno tellian uurethan uuillion:ni uuas im is uuordo niud, spaharo spello,ac sia bigunnun sprecan under im, huo sia ina so craftignafor enon cliƀe uurpin, obar enna berges uuall:uueldun that barn godes liƀu bilosian.Thuo hie im mid them liudeon samad frolico fuor:ni uuas im forht hugi, – uuissa that im ni mohtunmanniscono barn be thero godcundiIudeo liudi er is tidion uuihttionon gifrummian, letharo gilestio –,ac hie im mid them liudeon samod steg uppan thena stenholm,antthat sia te there stedi quamun thar sia ina for them uualle nitharuuerpan hogdun, fellian ti foldu,that hie uurthi is ferahes los, is aldres at endie.Thuo uuarth thero erlo hugi an them berge uppanbittra githahti Iudeono tigangan,that iro enig ni habda so grimmean seƀon ne so uurethan uuilleon… that sie ina thuo undaruuissin.So mohta hie undar iro uueroda standan endi an iro gimangemiddion gangan, faran undar iro folke.Hie deda im thena friđu selbo, mundburd uuid thero menigi,endi giuuet im thuru middi thanan thes fiondo folkes,fuor im thuo thar hie uuolda an ene uuostenniauualdandies suno, cuningo craftigost:habda thero custeo giuuald, huar im than an them landeliobost uuari te uuesanne an thesaro uueroldi.
Chapter 33
Thann fuor im an uueg odran Iohannes mid is iungron,guodes ambahtmann,lerda thia liudilangsamna rad,hiet that sia fruma fremidin,firina forlietin, men endi morthuuerc.Hie uuas thar managan lief guodaro gumono.Hie suohta im thuo thena Iudeono cuning, thena heritogon at husthe heten uuas Herodes after is eldiron,oƀarmuodig mann:buida im bi thero brudithiu err sines bruother uuas idis an ehti,antthat hie ellior scuoc, uuerold uuesloda.Thuo im that uuiƀ ginam thie cuning te quenu;err uuarun iro kind odana barn be is bruother.Thuo bigan im thia brud lahan Iohannes thie guodo,quat that it gode uuari uualdande uuidarmuodthat it enig uuero frumidi that bruođer brudan is bed nami, 'hebbie sia im ti hiuuon:Ef thu mi horian uuili, giloƀan minon leron,ni scalt thu sia leng egan,ac mith iro an thinon muode:ni haƀi thu thar sulica minna tuo,ne sundeo thi te suitho.'Thuo uuarth an sorogon hugi thes uuibes after them uuordon:andried that hie thena uueroldcuning spracono gispuoniendi spahion uuordon that hie sia forlieti.Bigan siu im thuo lethes filo radan an runun,endi ina rincos hiet unsundiganaerlos fahan endi innan enon carcarieclustarbendeon, lithocospon bilucan:be them liudeon ni gidorstun ina ferahu bilosian,huand sia uuarun im friund alla, uuissun ina so guodanendi gode uuerthan, habdun ina for uuarsagon,so sia uuela mahtun.Thuo uurđun an them iartaleIudeono cuninges tidi cumina,so thar gitald habdun fruoda folcuueros,huo hie gifuodit uuas, an lioht cuman.So uuas thero liudeo thau that that erlo gihuilicvoƀian scolda Iudeono mid gomon.Thuo uarth thar an thena gastseli megincraft mikilmanno gisamnod heritogono an that husthar iro herro uuas an is cuningstole.Quamun managa Iudeon an thena gastseli;uuarth im thar gladmuod hugi, blithi an iro brioston:gisahun iro boggebon uuesan an uunneon.Druog man uuin an flet sciri mid scalon,scenkon huurbun,gengun mid goldfatun;gaman uuas thar inne hlud an thero hallu,helithos druncun.Uuas thes an lustonlandes hirdi, huat hie them uueroda mestte uunnion gifrumidi.Hiet hie thuo gangan forthgela thiornun, is bruother barn,thar hie an is benki sat uuinu giuulenkid,endi thuo te them uuiƀe sprac,gruotta sia for them gumscipieendi gerno bad that sia thar for them gestiongaman afhuoƀi fagar an flettie:'Lat thit folc sehan huo thu gilinot habisliudeo menigi te blizzenna oƀar benkion;ef thu mi thero bedu tuithos, min uuord fur thesom uuerode,than uuelliu ik it hier te uuaron quethan liohto for theson liudeonendi oc gilestian so, that ik thi than after thiueron uuilliu so hues so thu mi bidisfor theson minon boguuinion:thoh thu mi thesaro heriduomohalƀaro feragos, rikies mines,thoh giduon ik that it enig rinco ni mag uuordon giuuendian,endi it scal giuuerthan so. 'Thuo uuarth thero magat after thiumuod gihuorban, hugi after iro herren,that siu an them huse innan an them gestseligaman upp ahuoƀ all so thero liudiolanduuisa gidruog, thera thieda thau.Thiu thiorna spiloda hruor after them huse:hugi uuas an luston, thero manno muodseƀo.Thuo thiu magat habda githionot ti thankethiodcuninge endi allon them erlscipiethem thar inne uuas godaro gumono:siu uuolda thuo ira geƀa egan thiu magat for thero menigi:geng thuo uuid iru muoder sprecanendi fragoda siafiriuuitlico hues siu thena berges uuardbiddean scoldi.Thuo uuisda siu after iro uuilleon,hiet that siu uuihtes than er ni gerodi for them gumscipieneuan that man iro Iohannes an thero hallu innanhobid gaƀi alosit fan is lichamen.That uuas allon them liudion harm them mannon an iro muode,thuo sia it gihordun thia magat sprecan;so uuas it oc them cuninge:hie ni mohta is quidi liogan, is uuord uuendian:hiet thuo is uuapanberan gangan fan them gastseliendi het thena godes man libu bilosean.Tho ni uuas lang te thiu that man an thia hallahobid brahta thes thiodgumenendi it thar thero thiornun forgaƀ, magat fur thero menigi:siu druog it thero muoder forth.Tho uuas endagoallaro manno thes uuisostenthero thie gio an thesa uuerold quam, thero thie quena enigkind gidruogi, idis fan erle,liet man simla thena enna biforan thie thiu thiorna gibarthiu gio thegnes ni uuarth uuis an iro uueroldi,neuan so ina uualdan god fon hebanuuangehelages gestas gimarcoda mahtig:thie ni habda enigan gimacon huergin err nec after.Erlos huurƀun gomon umbi Iohannesse,is iungron managa, salig gisithi,endi ina an sande bigruobun, liobes lichamon:uuissun that hie lioht godes diurlican drommet is drohtine saman, uppodes hemegan muosta, salig suokean.
Chapter 34
Thuo giuuitun im thia gisithos thanan, Iohanneses iungroniamarmuoda, helagferaha:uuas im iro herron dođ suitho an sorogon.Giuuitun im suocan thuo an ther uuostunniauualdandes suno, craftigna Cristendi im cuth gidedun godes mannes forgang,huo habda thie Iudeono cuning manno thena maristonmakies eggion hobdu bihauuan.Hie ni uuelda es tho enig harm sprekan suno drohtines:hie uuissa that thiu seola uuas helag gihaldanuuiđar hettendion, an friđe uuider fiondon.Thuo so gifragi uuarth after them landscipieleriendero best an thero uuostunni:uuerod samnoda,fuoron folcon tuo:uuas im firiuuit mikil uuisaro uuordo;im uuas oc uuilleo mikil sunie drohtines,that hie sulic gisitho folc an that lioht godeslathian muosti, uuennian mid uuillien.Uualdand lerda allan langan dagliudi managa, elithiodiga man,antthat an aband seg sunna te sedle.Thuo gengun is gisithos tuelifi, gumon te them godes barneendi sagdun iro guodon herren mid huilicu arbediu thar thea erlos libdin,quathun that sia is era bithorftin uueros an them uuostion lande:'Sia ni mugun sia hir mid uuihti anthebbean helithos bi hungres githuinge.Nu lat thu sia, herro thie guodo, sithon thar sia selitha findin.Nah sind hier gisetana burgi managa mid meginthiodon:thar findat sia meti te cope uueros after them uuiceon.'Thuo sprac eft uualdan Crist, thiodo drohtin,quat that thes eniga thurufti ni uuarin, 'that sia thuru metilosimina farlatan lioblica lera.Geƀat gi theson liudion ginuog,uuenniat sia hier mid uuilleon.'Thuo habda eft is uuord garo Philippus fruod gumo,quat that thar so filo uuari manno menigi:'thoh uui hier te metie habdin garo im te gebanne,so uui mahtin forgeldan mest,ef uui hier gisaldinsiluƀerscatto tue hund samad,tueho uuari is noh than that iro enig tharenes ginami:so luttic uuari that theson liudion.'Thuo sprac eft thie landes uuardendi fragoda siafiruuitlico manno drohtin,huat sia thar ti meti habdin uuisses giuunnan.Thuo sprac im eft mid is uuordon angegin Andreas for them erlonendi them alouualden selƀem sagda,that sia an iro gisithie than mer garoes ni habdin' nouan gerstin bruod fiui an usero ferdeendi fiscos tuena.Huat mag that thoh thesaro menigi?'Thuo sprak im eft mahtig Crist, thie guodo godes sunoendi hiet that gomono folc scerian endi sceđanendi hiet thia scola settian erlos after thero erthun,irmintheoda an grase gruonion,endi thuo ti es iungron sprac allaro barno best,hiet im thiu brod halon endi thia fiscos forth.That folc stillo bed,sat gisithi mikil;undar thiu hie thuru is selƀes craft manno drohtinthena meti uuihda helag hebancuning,endi mid is handon brac,gaf it is iungron forthendi hiet sia under them gumscipie dragan endi delian.Sia lestidun iro drohtines uuord, is geƀa gerno:druogon gomono gihuem helaga helpa.It undar iro handon uuohs, meti manno gihuem:thero meginthioda uuarth lif an luston:thia liudi uurdun alla sada salig folc,so huat so thar gisamnod uuas fon allon uuidon uuegon.Thuo hiet uualdand Crist gangan is iungronendi hiet sia gomean uuel that thiu leƀa tharforloran ni uurdi;hiet sia thuo samnonthuo thar sada uuarun mancunnies manag.Thar muoses uuarth brodes ti leƀu,that man birilos gilas tuelifi fulla:that uuas tecan mikil, grot craft godes,huand thar uuas gumono gitald ano uuiƀ endi kinduueros atsamma fif thusundig.That folc all forstuod, thia man an iro muode,that sia thar mahtigna herron habdun.Thuo sia hebancuning thia liudi lobodun,quathun that gio ni uurđi an thitt lioht cuman uuisera uuarsaga,eftha that hie giuuald mid gode an thesaro middilgardmerun habdi, enuualdan hugi.Alla gispracun that hie uuari uuirdiguuelono gihuilikes, that hie erthrikiegan muosti, uuidana uueroldstuol,'nu hie sulic giuuit habit, so grota craft mid gode.'Thia gumon alla giuuarth that sia ina gihoobinte herrosten, gicurin ina te cuninge:that Criste ni uuas uuihtes uuirdig,huand hie thit uueroldriki, ertha endi upphimilthuru es enes craft selbo giuuarahtaendi sithor biheld, land endi liudscipi– thoh thes enigan gilobon ni dedin uuretha uuidarsacon –that all an is giuueldi sted, cuningriko craftendi kesarduomas, meginthioda mahal.Bithiu ni uuelda hie thuru thero manno spraka hebban enigan herduomhelag drohtin, uueroldcuninges namon;ne hie thuo mid uuordon strid ni afhuoƀ uuid that folc furthor,ac fuor im thuo thar hie uuelda an en gibirgi uppan:floh that barn godes gelero gilpquidi,endi is iungron hiet oƀar enna seu sithonendi im selƀo gibod huar sia im eft tegegnesgangan scoldin.
Chapter 35
Thuo teliet that liuduuerodafter them lande allon,tefuor folc mikil,sithor iro fraho giuuet an that gibirgi uppanbarno rikost, uualdand an is uuilleon.Thuo te thes uuateres stađe samnodun thia gisithos Cristesthe hie im habda selƀo gicorana, sia tuelifi thuru iro treuua guoda:ne uuas im tuehono nigen neƀo sia an thia godes thionostgerno uueldin oƀar thena seu sithon.Thuo lietun sia an suithean strom hohhurnid sciphluttron uthion scedan scirana uuatar.Scred lioht dages,sunno uuarth an sedle;thia seolithandiun naht neflu biuuarp;nathidun erlos forthuuardes an fluod;uuarth thiu fiorđa tid thero nahtes kuman– neriendi Crist uuaroda thiu uuaglithand –:thuo uuarth uuind mikil, ho uueder ahaban:hlamodun uthion, strom an stamne;stridion feridun thia uueros uuidar uuinde:uuas im uureth hugi, seƀo sorogono full:selƀon ni uuandun lagolithandaan land cuman thuru thes uuedares giuuin.Thuo gisahun sia uualdand Crist an them seuue uppanselƀon gangan, faran an fathion:ni mohta an thena fluod innan an thena seo sinkan,huand ina is selbes craft helag anthabda.Hugi uuarth an forohton thero manno muodsebo:andriedun that it im mahtig fiond te gidruogi dadi.Thuo sprac im iro drohtin tuo, helag hebancuningendi sagda im that it iro herro uuas mari endi mahtig:'Nu gi muodes sculun fastes fahan;ne si iu foroht hugi,gibariod gi baldlico:ik biun that barn godes, is selbes suno,thie iuu uuid theson seuue scal mundon uuid theson meristrom.'Thuo sprac im enn thero manno angegin obar bord scipesbaruuirdig gumo, Petrus se godo– ne uuelda pina tholon, uuatares uuiti –:'Ef thu it uualdand sis ' quathie, 'herro thie godo,so mi an minon hugie thunkit, hiet mi thann tharod gangan te thioƀar theson gebanes strom drucno obar diop uuater,ef thu min drohtin sis, managero mundboro.'Thuo hiet ina mahtig Crist gangan im tegegnes.Hie uuarth garo sane,stuop fan them stamneendi stridion geng forth te is frahen:the fluod anthabda thena man thuru maht godes,antthat hie im an is muode bigan andradan diop uuater,thuo hie driban gisah thena uuag met uuindu:uundun ina uthion umbi, hoh strom umbi hring.Reht so hie thuo an is hugie tuehoda, so uuek im that uuater undarendi hie an thena uuag innan sanc an thena seostromendi hriep san after thiu gahon te them godes suneendi gerno bad that hie ina thuo gineridithuo hie an nodi uuas thegan an githuinga.Thiodo drohtin antfeng ina thuo mid is fadmonendi fragoda sane te hui hie thuo gituehodi:'Huat, thu mahtis gitroian uuell, uuitan that te uuaronthat thi uuateres strom an them seuue innanthines sithes ni mahti lagustrom gilestian,so lango so thu haƀis giloƀon te mi an thinon hugie hardo.Nu uuellu ik thi an helpun uuesan, niman thi an thesaro nodi '.Thuo nam ina alomahti helag be handon:thuo uuarth im eft hluttar uuater, fast undar fuoton,endi sia an fathe samad bethia gengon,anthat sia oƀar bord scipes stuopun for them strome;an them stamne gisat allaro barno best.Thuo uuarth bred uuater, stromos gistillid,endi sia ti stada quamun lagolithandiaan land samad thuru thes uuateres giuuin;sagdun thuo uualdande thanc,diurđun usan drohtindadon endi uuordon,fellun im te fuotonendi filo spracon uuisero uuordo,quathun that sia uuissin garo that hie uuari selbosuno drohtines uuar an thesaro uueroldiendi giuuald habdi oƀar middilgard,endi that hie mahti allaro manno gihues ferahe giformon,al so hie im an them fluode deda vuid thes uuateres giuuin.