Oc scal ik iu uuesanhuo hier uuegos tuena liggeat an thesom liohte,thia farat liudeo barn, all irminthiod:thera is ođer san uuid strata endi bred,farit sia uuerodes filo, mancunneas manag,huand sia tharod iro muod spanit, uueroldlusta uueros:thiu an thia uuirsun hand liudi ledit,thar sia te farlora uuerthat helithos an hellia:thar ist het endi suart, egislic an innan:othi ist tharod te faranne eldibarnon,thoh it im at them endie ni dugi.Thann ligit eft oderengera mikilu uueg an thesaro uueroldi,farit ina uuerodes liut, faho folcscepi:ne uuelleat ina firio barn gerno gangan,thoh hie te guodes rikie an that euuiga liƀerlos ledie.Thann nimat gi iu thena engean:thoh hie so othi ni si firihon te faranne,thoh scal hie te frumu uuerthan so hue so ina thurugengit,so scal is geld niman, suitho langsam lonendi lif euuig, diurlican drom.Io gi thes drohtin sculun uualdand biddean,that gi thena uueg muotin fan foran antfahanendi forth thurugangan an that godes riki.Hie ist garo simla uuithar thiu ti gebannethe man ina gerno bidit, fergot firio barn.Suokeat fader iuuuan upp te them euuinom rikie:than motun gi ina after thiu te iuuuero frumu findan.Kuthiat iuuua fard tharod an iuuues drohtines doron:thann uuerthat iu antduan after thiu himiliportun anthlidan,that gi an that helago leoht, an that godes rikigangan muotun, odes sehan.Oc scal ik iu seggean noh for theson uueroda allonuuarlic bilithi, that allaro liudio so huilicso thessa mina lera uuili gihaldan an is hertenendi uuil iro an is hugie thenkian, lestean sia an theson lande,thie gilico duot uuison mannethie giuuit haƀit, horsca hugiscefti,endi husstedi kiusit an fastaro foldunendi an felis uppan uuegos uuirkit,thar im uuind ni mag ne uuag ne uuateres stromuuiht gitiunean,ac mah im thar uuid ungiuuideronallon standan an them filisa uppan,huand it so fasto uuarth gistellit an them stene:anthaƀit it thiu stedi nithana,uurethid uuiđer uuinde,that it uuikan ni mag.So duot eft manno so huilicso theson minon ni uuili leron horeannec thero lestian uuiht,so duot hie unuuisonerle gilico, ungiuuitgon uuerethe im bi uuatares stađe an sande uuiliselihus uuirkean, that it uuestroni uuindendi uuago strom, seouthion teslahat;ni mag im sand endi griot giuurethian uuid them uuinde,ac uuirthit teuuorpan thanan,tefellit an them fluode,huand it an fastaro nis erthu gitimbrid.So scal allaro erlo gihuilikes uuerc githihanuuider thiu thiu hie thesa mina uuord frumit, helith helag gibod.'Thuo bigunnun an iro hugie uundron meginfolc mikil:gihordun mahtiges godes leoblica lera:ne uuarun an then lande giuuono that sia gio fan sulicon erseggean gihordin uuordon eftha uuercon.Forstuodun uuisa man that hie so lerda,liudeo drohtin uuaron uuordonso hie giuuald habda, allon them ungilicothia thar an erdagon under them liudscepielerand uuarun acoran under them cunnie:ni habdun thia Cristes uuord gimacon mid mannonthea hie for thero menigi gisprak, gibod uppan them berge.
Chapter 22
Hie im thuo bethiu bifalah te giseggeannesinon uuordon, huo man himilrikigihalon scoldi, uuidbredan uuelon,ia hie im giuuald forgaf that sia muostin helieanhalta endi blinda, liudio lefhedi,legarbed manag, suara suhti,iac hie im selƀo gibod that sia at enigon manmeda ni namin, diuria methmos:'Gihuggiat gi ' quathie, 'huand iu ist thiu dad cuman, that giuuit endi that uuisdom,endi iu thia giuuald forgiƀit allaro firio fader,so gi sia ni thurƀun mid enigon fehe copan, miedon mid enigon methmon.So uuesat gi iro mannon forth an iuuuon hugisceftionhelpono milda,lerat gi liudio barnlansamna rad, fruma forthuuardes;firinuuerc lahat, suara sundea.Ne latat iu siluƀar ni gold uuihti thes uuirthithat it gio an iuuua giuuald cume, fagara fehoscattos:it ni mag iu te enigaro frumu huerigin uuerthan te enigon uuilleon.Ni sculun gi giuuades than mer erlos egan,neuuan so gi than an hebbean gumon te gigereuue,than gi gangan sculun an that gimang innan.Nio gi umbi iuuuana meti ni sorogot leng umbi iuuua lifnara,huand thena leriand sculun fuodean that folcscepi,thes hie im te frumu uuerthe, lioƀlikes lonesthe hie them liudeon sagit.Uuirdig ist thie uuarihtiothat man ina uuel fuodie thena man mid muosuthe so managaro scal seola bisuorgonendi an thena sith spanan gestos an godes uuang.That is grotara thing that man bisorgon scalseola managa, huo man thia bihaldete heƀanrikie, than man thena lichamonliudeo barno muosu bimurnie.Bithiu man scal haldan thena holdlicothe im te hebanrikie thena uueg uuisitendi ina uuamscathon, fiondun uuitfahitendi firinuuerc lehit, suara suuara sundiun.Nu ik iu sendean scal after theson landscepieso lamb under uuluos:so sculun gi undar iuuua fiond faran,under filo thiodo, undar mislica man.Hebbeat iuuuan muod uuider them so glauuan tegegnesso samo so thie gelouuo uurm, nadra thiu feha,thar siu iro nihtscipies uuitodas uuanid,that man iu under them uuerode ni mugi bisuican an them siđe.For thiu gi sorgon sculun that iu thia man ni muginmuodgithahti, uuilleon auuendan.Uuesat iu so giuuara uuidar thiu, uuid iro fecnon tharso man uuidar fiondon scal.Thann uuesat gi eft an iuuuon dadeondubon gilica,hebbeat uuid erlo gihuenaenualdan hugi, mildan muodsebon,that thar man nigen thuru iuuua gidadibidrogan ni uuerthe, bisuikan thuru iuuua sundea.Nu sculun gi an thena sith faran, an that arundi:thar sculun gi arbedies so filo githolon under thero thiodaendi githuing so samo, manag endi mislic,huand gi an minon namon thia liudi lerat.Bithiu sculun gi thar lethes filo for uueroldcuningonuuities anfahan.Oft sculun gi thar for rikiethuru thius min rehtun uuord gibundana standanendi bethiu githolon, ge hosc gi harmquidi:umbi that ni latat gi iuuuan hugi tuiflean, sebon suicandian:gi ni đurbun an enigan sorgon uuesan an iuuuon hugie huergin,thann iu man for thiu heri forth an thena gastseligangan hetit, huat gi im thann tegegnes sculunguodero uuordo spahlico gisprecan,huand iu thiu spahed cumit, helpa fon himile,endi sprikit thie helago gest mahtig fan iuuuon muthe.Bithiu ni andradat gi iu thero manno nith,ni fortiat iro fiondscepi:thoh sia hebbean iuuues ferhes giuuald, that sia mugin thena lichamonlibu biniotan, aslahan mid suerdu,thoh sia thero seolun ni mugun uuiht auuerdian.Andradat iu uualdand god,farahtiat fader iuuuan,frummeat gerno is gibodscipi,huand hie habit bethies giuuald, liudio liƀesendi oc iro lichamen get thera seolun so self:ef gi iuuua an them sithe tharod forliosat thuru thesa lera,than muotun gi sia eft an them liohte godes biforan findan,huand sia fader iuuua, haldit helag godan himilrikie.
Chapter 23
Ni cumat thia alla te himilethia the hier hropat te mi mann te mundburd.Managa sind thero thia uuelliat allaro dago gihuilikeste drohtine hnigan, hropat thar te helpuendi huggiat an ođer, uuirkeat uuamdadi:ni sind im than thiu uuord fruma,ac thia muotun huerbanan that himiles lioht, gangan an that godes rikithia thes gerna sint that sia hier gifrummeanfader alouualden uuerc endi uuilleon.Thia ni thurbun mid uuordon so filo hruopan te helpu,huand thie helago god uuet allaro manno gihuesmuodgithahti, uuord endi uuilleon,endi gildit im is uuerco lon.Bithiu sculun gi sorgonthan gi an thena sith faran, huo gi that arunditi anthia bebrengiat.Thann gi lithan sculunafter theson landscipie, uuido after thesaro uueroldi,all so iu uuegos lediat, bred strata ti burg,simla kiosat gi iu thena beston san mann undar thero menigiendi cuthiat im iuuuan muodseƀon uuaron uuordon.Ef sia than thes uuirdiga sind that sia iuuua guodun uuercgerno lestean mid hlutturu hugiu,thanne gi them huse mid im uuonot an uuilleonendi im uuela lonot,geldat im mid guoduendi sia ti gode selbon uuordon giuuihatendi seggeat im uuissan fridu, helaga helpahebancuninges.Ef sia than so saligathuru iro selƀaro dad uuerthan ni muotunthat sia iuuua uuerc frummean, lestean iuuua lera,than gi fan them liudeon san farat fan them folke,endi thie iuuua fritho huiriƀit eft an iuuuer selbaro sith,endi latat sia mid sundeon forth, mid baluuuercun buonendi suokeat iu burg ođra, micil manno uuerod,endi ni latat thes melmes uuiht folgon an iuuuon fuotonthanan the man iu antfahan ni uuili,ac scuddeat it fon iuuuon scuohon,that it im eft te scamu uuerthe, them uueroda te giuuitscipie,that iro uuillio ni dog.Than seggiu ik iu te uuaron,so huann so thesu uuerold endiot endi the mario dagoƀar man farit, that thann Sodomaburg,thiu her thuru sundeun uuarth an afgrundiuneldes craftu, fiuru bifallan,that thiu thanne habit friđu meran, milderan mundboronthan thia man egin thia iu hier uuiđaruuerpatendi ni uuelliat iuuua uuord frummean.So huie so iu than antfahitthuru ferehtan hugi, thuru mildean muod,so haƀit minan forth uuilleon giuuarahtanendi oc uualdand god antfangan fader iuuuan,firio drohtin, rikean radgebon,thena the all reht bikann.Uuet uualdand selfendi uuilleon lonot gumono gihuilicon,so huat so hie her guodes geduot, thoh hie thuru minnea godesmanno huilicon uuillandi forgeƀeuuatares drincan, that hie thurftigon manthurst gihelie, caldes brunnen.Thesa quidi uuerthat uuara, that iu ni biliƀit,ne hie thes lon sculi for godes ogongeld antfahan, mieda managfalda,so huat so hie is thuru mina minnea giduot.So huie so mi than forlognitliudo barno, helitho for thesaro heri,so duon ik is an himile so self thar uppe for them alouualden faderendi for allon is engilo crafte, for thero mikilun menigi.So huilic so than eft manno barno an thesaro uueroldi ni uuiliuuordon mithan, ac gihid for gumscipiethat hie min iungro si, thena uuillio ik eft ogianfor ogon godes, for alloro firio fader,thar folc manag for thena allouualdonalla gangat rethinon uuid thena rikeon.Thar uuilliu ik im an reht uuesan mildi mundboroso huemu so minon hier uuordon horitendi thiu uuerc frumid thia ik hier an theson berge uppangibodan hebbiu. 'Habda thuo te uuaronuualdandes suno gilerit thia liudihuo sia lof gode uuirkean scoldin.Thuo let hie that uuerod thanan an allaro halƀa gihuilicaheriscipi manno sithon te selithon.Habdun selƀes uuord gihorid hebancuningeshelaga lera, so gio te uueroldi sinduuordon endi dadean mancunnies managoƀar theson middilgard spracono thiu spahirun,so hue so thiu spel gifrang thiu thar an them berga spracbarno rikost.
Chapter 24
Giuuet im thuo umbi thria naht after thiuthesaro thiedo drohtin an Galilealand,thar hie te enon gomon uuarth gebedan that barn godes:thar scolda man ena brud geban, munelica magat.Thar Maria uuass mid iro sunie selƀo,salig thiorna, mahtiges muoder.Managaro drohtin geng im thuo mid is iungron,godes egan barn an that hoha hus,thar thiu heri dranc, thia Iudeon an them gestseli:hie im oc at them gomon uuas,iac hie thar gicuthdathat hie habda craft godes, helpa fan himilfader,helagna gest, uualdandes uuisduom.Uuerod blithoda,uuarun thar an lustonliudi atsamna, gumon gladmuoda.Gengun ambahtman, scenkion mid scalon,druogun scirana uuin mid orcon endi mid alofaton;uuas thar erlo drom fagar an flettie,thuo thar folc undar im an them benkion so bestblizza afhobun, uuarun thar an uunnion.So im thes uuines brast them liudeon thes lithes:is ni uuas forleƀit uuiht huergin an them huse,that for thia heri forth scenkion druogin,ac thiu scapu uuarun lithes alarit.Thuo ni uuas lang te thiu that it san antfundafirio sconiosta, Cristes muoder:geng uuiđ iro kind sprekan uuiđ iro suno selƀan,sagda im mid uuordon that thia uuerdos thuo meruuines ni habdun them gestion to gomon.Siu thuo gerno bad that is thie helago Cristhelpa giriedi them uueroda te uuillion.Thuo haƀda eft is uuord garo mahtig barn godesendi uuid is muoder sprak:'Huat ist mi endi thi ' quathie,'umbi thesaro manno lith, umbi theses uuerodes uuin?Te hui sprikis thu thes, uuiƀ, so filo, manos mi for thesaro menigi?Ne sind mina noh tida cumana.'Thann thoh gitruoda so uuel an iru hugisceftionhelag thiorna, that is after them uuordonuualdandes barn, helandero besthelpan uueldi.Hiet thuo thia ambahtmannidiso sconiost scenkion endi scapuuardos,thia thar scoldun thera scola thionon, that sia thes ne uuord ne uuercuuiht ni forlietin thes sia thie helago Cristhetan uueldi lestian for them liudeon.Larea stuodun thar stenfatu sehsi.Thuo so stillo gibod mahtig barn godes,so it thar manno filo ne uuissa te uuarun,huo hie it mid is uuordu gisprak;hie hiet thia scenkion thuosciries uuateres thiu fatu fullian,endi hie thar mid is fingron thuo segnoda selbosinon handon,uuarahta it te uuine,endi hiet is an enn uuegi hladan, sceppian mid enaro scalun,endi thuo te them scenkion sprak,hiet it thero gestiothe at them gomon uuas them herostenan hand geƀan, full mid folmonthem the thes folcas thar giuueld after them uuerode.Reht so hie thuo thes uuines gidranc, so ni mohta hie bimithan,ne hie for thero menigi sprak te them brudigumen,quat that simla that besta lith allaro erlo gihuilicerist scoldi geban at is gomon:'Undar thiu uuirđit thesaro gomono hugi auuekit mid uuinu,that sia uuel bliđot, druncan dromiat.Than mag man thar dragan after thiu lithlicora lith:so ist thesaro liudeo thau.Thann haƀis thu nu uundarlicouuirdscipi thinan gimarcot for thesaro menigi:hetis for thit manno folc alles thines uuinesthat uuirsista thina ambahtmanerist brengan, geban at thinon gomon.Nu sind thina gesti sada,sind thina drohtingosdruncana suitho,is thit folc fromuod:nu hetis thu her forth dragan allaro litho lofsamostthero the ik gio an theson liohte gisah huergin hebbean.Mid thius scoldis thu us hindag er gebon endi gomean,thann it allaro gumono gihuilic githigidi te thanke.'Thuo uuarth thar thegan manag giuuar after them uuordon,sithor sia thes uuines gidruncun, that the helago Cristthar an them huse innan tecan uuarahta:truodun sia sithor thiu mer an is mundburd,that hie habda maht godes, giuuald an thesaro uueroldi.Thuo uuarth that so uuido cuth oƀar GalilealandIudeo liudion, huo thar selƀo gidedasuno drohtines uuater te uuine:that uuarth thar uundro erist thero the hie thar an GalileaIudeo liudeon tegno gitogdi.Ni mag that gitelliean mann, giseggian te suothen,huat thar sithor uuarth uundres undar them uueroda,thar uualdand Crist an godes namonIudeo liudeon allan langan daglera sagda, gihiet im himilrikiendi hellia githuing uuerida mid uuordon,hiet sia uuara godes, sinliƀ suokean:thar ist seolono lioht, drom drohtinesendi dagscimon, guodlicnissi godes;thar gest manag uuunot an uuilleonthei hier uuel thenkit, that hie hier bihaldeheƀancuninges gibod.
Chapter 25
Giuuet im thuo mid is iungronfan them gomon forth Cristus te Kapharnaumcuningo rikiost te thero mariun burg.Megin samnoda, gumon im tegegnes,guodoro manno, salig gisithi:uueldun thia is suotiun uuord helag gihorian.Thar im en hunno quam, en guod man angeginendi ina gerno bad helpan helagna,quat that hie under is hiuuiskie enna lefna lamonlango habdi siocan an is seldon:'so ina enig seggio ni mag handon gihelian.Nu is im thinero helpono tharf, fro min thie guodo.'Thuo sprak im eft that frithubarn godes san after thiuselƀo tegegnes,quat that hie thar quamiendi that kind uueldi nerian after thero nodi.Thuo im nahor geng thie man for thero menigiuuid so mahtigna uuordon uuehslan:'Ik thes uuirdig ni bium ' quathie, 'herro thie guodo,that thu an min hus cumes, suokies mina selda,huand ik biun so sundig man mid uuordon endi mid uuerkon.Ik giloƀiu that thu giuuald habis, that thu ina hinan mahthelan giuuirkean, uualdand fro min:ef thu it mid thinu uuordu gisprikis, thann is san thiu lefhed losot endi uuirdit is lichamo hel endi hreni,ef thu im thina helpa forgiƀis.Ik biun mi ambahtman,hebbiu mi odes ginuog uuelono giuunnan:thoh ik under giuueldi si adalcuninges,bethiu hebbiu ik erlo gitrost, holda heririncos,thia mi so gihoriga sind that sia thes ne uuord ne uuercuuiht ni forlatat, thes ik sia an theson landscipielestian hetu, ac sia farat endi frummeatendi eft te iro frahon cumat, holda te iro herren;thoh ik at minon hus egi uuidbredan uuelonendi uuerodes ginuog, helithos hugiderbea,bithiu ni gidarr ik thik so helagna biddean barn godes,that thu an min bu ganges, suokies mina selda,huand ik so sundig biun, uuet mina foruurhti.'Thuo sprak eft uualdan Crist, thie gomo uuid is iungron,quat that hie an Iudeon huerigin under Israhelesauaron ni fundi gimacon thes mannesthie gio merr ti gode an them landscipegiloƀon habdi thann hluttron te himile:'Nu latu ik iu thar horean tuo thar ik it iu te uuarun hieruuordon seggiu, that noh sculun elithiodoostan endi uuestan mancunneas cumanmanag tesamne, … thia muotun thar an Habrahamesendi an Isaaces so self endi oc an Iacobes,guodoro manno barmon restianendi bethiu githolon, uuelon endi uuilleonendi uuonotsam lif, guod lioht mid gode.Than scal Iudeo filo, theses rikies suniberouuoda uuerthan, biduelida sulicoro diurthu,endi sculon an dalon thiustron an them allaro ferrostonferne liggean.Thar mag man gihoreanhelithos quithean, thar sia iro torn managtandon bitat;thar ist gest grimmagendi gradag fiur, hard helligithuing,het endi thiustri, suart sinnahtisundia ti lone, uuretharo giuurhteo,so huem so thes uuilleon ni habit that hie ina alosieerr hie thet lioht ageƀe, uuendigie fan thesaro uueroldi. –Nu maht thu thi an thinon uuillion forth sithon te seldon;than findis thu gisundan at hus maguiungan man:muod is im an luston,that barn ist gihelid,so thu badi te mi:it uuirđit all so gelestidso thu giloƀon haƀis an thinon hugie hardo.'Thuo sagda heƀancuninge the ambahtmanalouualdon gode thanc for thero thioda,thes hie im at sulicon tharbon halp.Habda thuo giarundeodal so hie uuelda, saliglico:giuuet im an thena sith thanan,uuenda an is uuilleonthar hie uuelon ehta, bu endi bodlos:fand that barn gisund, kindiungan man.Cristes uuarun thuo uuord gifullid:hie giuuald habda te gitogianne tecan,so that ni mag gitellian man, giahton oƀar thesaro erthu,huat hie thuru is enes craft an thesaro middilgardmaritha gifrumida, vundres giuuarahta,huand all an is giuueldi sted, himil endi ertha.