Öll scolo cavp halldaz með monnom váttlavs nema .iiii. Ef maðr cavpir land eða goðorð eða haf scip eða fastnar ser kono. fiorbavgs garð varðar ef maðr bregðr þeim málom en iii. marca utlegð vm önor kavp hvervetna þess er bvar bera at keypt var eða vattar.
Ef maðr fiðr fe fyrir ofan iorð i sino lande oc scal hann segia til iii. sumor a alþingi. þa ef eigi verðr eigande at et .iii. sumar þa eignaz hann feet. Ef maðr fiðr fe i iorðo sine oc scal hann segia til vm sin a alþingi. ef eigi verðr eigande at. oc eignaz han þa. þviat eins verðr at rétto eigande at ef sa verðr til er þat fe hefir fra verit stolit eþa hans erfingiar ella.
Ef maðr grefr fe sit i iorð til hirzlo gull eþa silfr oc varðar þat fiorbavgs garð. Sa a söc þa er søkia vill. þar scal queðia heimilis bva ix. aþingi þess er sottr er.