Bókastaðir

þY GEARE þE WÆS AGAN FRAM CRISTES ACENnesse ·cccc· wintra. ⁊ ·xciiii· uuintra. þa Cerdic ⁊ Cynric his sunu cuom up æt Cerdices oran. mid ·v· scipum. ⁊ se Cerdic wæs. Elesing. Elesa. Esling. Esla. Gewising. Giwis. Wiging. Wig. Freawining. Freawine. Friþugaring. Friþugar. Bronding. Brond Bældæging. Bældæg Wodening.

Ond þæs ymb ·vi· gear þæs þe hie up cuomon ge eodon West Seaxna rice, ⁊ þæt uuærun þa ærestan cyningas þe West Seaxna lond on Wealum ge eodon; ⁊ he hæfde þæt rice ·xvi· gear, ⁊ þa he geför þa feng his sunu Cynric to þam rice, ⁊ heold ·xvii· winter. þa he gefor þa feng Ceol to þam rice, ⁊ heold ·vi· gear. þa he ge för þa feng Ceolwulf to his broþur, ⁊ he ricsode ·xvii· gear, ⁊ hiera cyn gæþ to Cerdice. þa feng Cynegils Ceolwulfes broþur sunu to rice, ⁊ ricsode ·xxxi· wintra, ⁊ he on feng ærest fulwihte Wesseaxna cyninga; ⁊ þa feng Cenwalh to, ⁊ heold xxxi · wintra, ⁊ se Cenwalh wæs Cynegilses sunu; ⁊ þa heold Seaxburg his cuen an gear þæt rice æfter him. þa feng Æscwine to rice, þæs cyn gæþ to Cerdice, ⁊ heold ·ii· gear. þa feng Centwine to Wesseaxna rice Cynegilsing, ⁊ ricsode ·vii· gear; þa feng Ceadwalla to þam rice, þæs cyn gæþ to Cerdice, ⁊ heold ·iii· gear. Ða feng Ine to Seaxna rice, þæs cyn gæþ to Ceardice, ⁊ heold ·xxxvii· wintra. þa feng Æþelheard to, þæs cyn gæþ to Ceardice, ⁊ heold ·xiiii· winter. þa feng Cuþred to, þæs cyn gæþ to Cerdice, ⁊ heold ·xvii· gear. þa feng Sigebryht to, þæs cyn gæþ to Cerdice, ⁊ heold an gear. þa feng Cynewulf to rice, þæs cyn gæþ to Ceardice, ⁊ heold ·xxxi· wintra. þa feng Beorhtric to rice, þæs cyn gæþ to Cerdice, ⁊ heold ·xvi· gear. þa feng Ecgbryht to þam rice, ⁊ heold ·xxxvii· wintra. ⁊ ·vii· monaþ; ⁊ þa feng Æþelwulf his sunu to, ⁊ heold nigon teoðe healf gear. Se Æþelwulf wæs Ecgbryhting. Ecgbryht. Ealhmunding. Eahlmund. Eafing. Eafa. Eopping. Eoppa. Ingilding. Ingild. Cenreding. ⁊ Ine. Cenreding. ⁊ Cuþburg. Cenreding. ⁊ Cuenburg. Cenreding. Cenred. Ceolwalding. Ceolwald. Cuþwulfing. Cuþwulf Cuþwining. Cuþwine. Celming. Celm. Cynricing. Cynric. Cerdicing.

Ond þa feng Æthelbald his sunu to rice, ⁊ heold ·v· gear. þa feng Æþelbryht his broþur to, ⁊ heold ·v· gear. þa feng Æþered hiera broþur to rice, ⁊ heold ·v· gear. þa feng Ælfred hiera broþur to rice, ⁊ þa was ágán his ielde ·xxiii· wintra. ⁊ ccc · ⁊ xcvi · wintra þæs þe his cyn ærest West Seaxna lond on Wealum geodon:,

ÆR Cristes geflæscnesse ·lx· wintra. Gaius Iulius se Casere ærest Romana Breten lond gesohte. ⁊ Brettas mid gefeohte cnysede. ⁊ hie ofer swiþde, ⁊ swa þeah ne meahte þær rice gewinnan:

Brittene ígland is ehta hund mila lang. ⁊ twa hund brad. ⁊ her sínd on þis iglande fif ge þeode. Englisc. ⁊ Brittisc. ⁊ Wilsc. ⁊ Scyttisc. ⁊ Pyhtisc. ⁊ Boc Leden. Erest weron bugend þises landes Bríttes. þa coman of Armenia. ⁊ ge sætan suðewearde Bryttene ærost. þa ge lamp hit ꝥ Pyhtas coman suþan of Scithian. mid langum scipum na manegum. ⁊ þa coman ærost on norþ Ybernian up. ⁊ þær bædo [n] Scottas ꝥ hi ðer moston wunían. Ac hi noldan heom lyfan. forðan hi [cwædon þæt hi ne mihton ealle æt gædere ge wúnian þær. ⁊ þa] cwædon þa Scottas. we eow magon þeah hwaðere ræd ge læron. We witan oþer egland her be easton. þer ge magon eardian gif ge willað. ⁊ gif hwa eow wið stent. we eow fultumiað. ꝥ ge hit magon ge gangan. Ða ferdon þa Pihtas. ⁊ geferdon þis land norþan weard. ⁊ suþan weard hit hefdon Brittas. swa we ær cwedon. And þa Pyhtas heom abædon wif æt Scottum. on þa ge rad ꝥ hi gecuron heora kyne cinn áá on þa wif healfa. ꝥ hi heoldon swa lange syððan. ⁊ þa gelamp hit imbe geara rina. ꝥ Scotta sumdæl gewat of Ybernian on Brittene. ⁊ þes landes sum dæl ge eodon. ⁊ wes heora heratoga Reoda gehaten. from þam heo sind ge nemnode Dæl Reodi.

Sixtigum wintrum ær þam þe Crist were acenned. Gaius Iulius Romana Kasere mid hund ehtatigum scipum ge sohte Brytene. þer he wes ærost ge swenced mid grimmum ge feohte. ⁊ micelne dæl his heres forlædde. ⁊ þa he forlet his here abidan mid Scottum. ⁊ ge wat into Galwalum. ⁊ þer ge gadorode six hund scipa. mid þam he ge wat eft in to Brytene. ⁊ þa hi ærost to gedore ge ræsdon. þa man ofsloh ðes Caseres ge refan. se wes Labienus ge haten. Ða ge namon þa Walas. ⁊ adrifon sumre éa ford ealne mid scearpum pilum greatum innan þam wetere. sy éa hatte Temese. þa ꝥ on fundon ða Romani. þa noldon hi faron ofer þone ford. þa flugon þa Bryt Walas to þam wudu fæstenum. ⁊ se Kasere ge eode wel manega heh burh mid mycelum ge winne. ⁊ eft ge wat in to Galwalum.

Octauianus ricsode ·lvi· wintra. ⁊ on þam ·xlii· geare his rices Crist wæs acenned.

Octauianus rixade ·lvi· wintra. ⁊ on þam ·xlii· geare his rices. Crist wæs acenned.

þa tungel witgan of east dæle cuomon to þon þæt hie Crist weorþedon, ⁊ þa cild on Bethlem of slægene wærun for Cristes ehtnesse from Herode:

Ða tungel witegan of eastdæle coman to þan ꝥ hi Crist wurðoden. And þa cild on Bethleem ofslagene wæron for ehtnesse fram Herode. ⁊ he swealt of sticod fram him sylfum. ⁊ Archelaus his sune feng to rice.

Not in Laud (E).

Her swealt Herodus from him selfum ofsticod, ⁊ Archilaus his sunu feng to rice:

Not in Laud (E).

From frympe middangeardes op þis gear wæron ágán ·v· þusendu wintra. ⁊ cc. wintra.

[Her onfeng Herodes Antipatres sunu to rice in Iudea. ⁊]

Fram frymðe middan eardes oþ þis gear wæron agan ·v· þusend wintra. ⁊ ·cc· wintra.

Philippus ⁊ Herodes to dældun Lysiam, ⁊ Iudeam feowricum to dældun.

Philippus ⁊ Herodes to dældon Iudeam. iiii · ricu to dældon.

Her feng Tiberius to rice.

Her feng Tiberius to rice.

Not in Parker (A).

Her on feng Pilatus gymene ofer þa Iudeas.

Not in Laud (E).

[Her onfeng Pilatus to gymenne ouer þa Iudeas.]

Her wæs Crist gefulluhtud. ⁊ Petrus ⁊ Andreas gehwierfede. ⁊ Iacobus ⁊ Iohannes ⁊ Philippus ⁊ þa ·xii· apostolas.

Her wæs Crist ge fullod. ⁊ Petrus ⁊ Andreas ge hwyrfede ⁊ Iacobus ⁊ Iohs ⁊ þa ·xii· aptc.

Her wæs Crist ahangen; from fruman middangeardes ymb ·v· þusendo wintra. ⁊ cc · ⁊ xxvi · wintra.

Hær wes Crist ahangen. fram fruman middan eardes ymb ·v· þusend wintra. ⁊ ·cc· ⁊ ·xxvi·.

Her wæs Paulus gehwierfed. ⁊ sc̄s Stephanus of torfod.

Her wæs scs Paulus ge hwyrfed ⁊ scs Stephanus oftorfod.

Her se eadiga Petrus se apostol gesæt biscep setl in Antiochia þære ceastre.

Her se eadiga apostol Petrus ge set biscop setl on Antiochia ceastre.

Her onfeng Gaius rice.

Her on feng Gaius to rice.

Her se eadiga Petrus se apostol gesæt biscep setl on Rome.

Her se eadiga Petrus se apostol ge set biscop setl on Rome.

Her Herodes aswalt. sepe Iacobum ofslog ane geare ær his agnum deaþe.

Her Erodes swealt se ðe Iacobum of sloh. anum geare ær his agenum deaðe.

Her Claudius oþer Romana cyninga Bretene lond gesohte, ⁊ þone mæstan dæl þæs ealondes on his gewald onfeng. ⁊ eac swelce Orcadus þa ealond Romana cynedome under þeodde. [þis was þes feorðes geares his rices. ⁊ on þys ylcan geare gewearð se mycela hunger on Siria þe Lucas recð on þare boc Act' Apto:.]

Her Claudius Romana cining ge wat mid here on Brytene. ⁊ ꝥ igland ge éode. ⁊ ealle Pyhtas. ⁊ Walas under þeodde Romana rice. Ðis ge feoht he ge fremede þam feorðan geare his rices. Þam geare ge wearð se mycla hunger on Siria. þe wes fore witegad on Actibus Apto7 þurh Agabum þone witegan. Þa feng Nero to rice æfter Claudie. se æt nextan forlet Brytene igland for his uncafscipe.

Her Iacobus frater Dñi þrowode.

Her Iacobus frater Dñi þrowade.

Her Marcus se godspellere forð ferde.

Not in Laud (E).

Her Marcus se godspellere forþ ferde.

Her Petrus ⁊ Paulus þrowodon.

Her Petrus ⁊ Paulus þrowodon.

Her Uespassianus onfeng rice.

Her Uespasianus onfeng rice.

Her Titus Uespessianus sunu in Hierusalem ofslog Iudea cxi · þusenda;

Her Titus Uespasianus [sunu] in Ierusalem of sloh Iudea ·cxi· þusend.

Her Titus feng to rice, sepe sæde þæt he þone dæg forlure þe he noht to gode on ne gedyde;

Her feng Titus to rice. se ðe sede ꝥ he þone dæg forlure ðe he naht to gode ón né dyde.

Not in Laud (E).

Her Domitianus Tites broður feng to rice.

Her Iohannes se godspellere in Pathma þam ealonde wrat þa boc Apocalipsis.

Her Domitianus Tites broðor feng to rice.

Not in Parker (A).

Her Iohs se godspellere in Pathma þam iglande wrat þa bóc apocalypsin.

Not in Laud (E).

[Her Symon se apostol wæs anhangen. ⁊ Iohannes se godspellere hine gereste in Epheso.]

Not in Parker (A).

Her Simon se apostol wæs ahangen. ⁊ Iohs se godspellere hine ge reste in Effesia.

[Her Clemens papa forþferde.]

Her Clemens papa forðferde.

Her Ignatus biscep þrowude.

Her Ignatius biscop ðrowade.

Not in Parker (A).

Alexander hic constituit aquam benedictam fieri.

Not in Parker (A).

Syxtus papa hic constituit ymnum decantare. Scs. Scs. Scs. in officio missæ.

Not in Parker (A).

Telesphorus papa hic constituit ymnum angelicum cantari GLORIA IN EXCELSIS DEO diebus festis.

[Her Marcus Antonius ⁊ Aurelius his broðer fengon to rice.]

Her Marcus Antonius. ⁊ Aurelius his broðer fengon to rice.

Her Eleutherius on Rome onfeng bisc̄ dóm, ⁊ þone wuldor fæstlice ·xv· winter geheold; To þam Lucius Bretene kyning sende stafas, bæd þæt he wære Cristen gedon. ⁊ he þurh teah þæt he bæd. [⁊ hi syððon wunodon on rihton geleauon oððe Diaclitianes rice.]

Her Eleutherius on Rome onfeng biscop dom. ⁊ þone wurþlice ·xv· winter geheold. To ðam Lucius Brytwalana cing sende men. ⁊ bead fulluhtes. ⁊ he him sona sende. ⁊ heo siððan wunodon on rihtan ge lefan. oððe Dioclitianus rice.

Her Seuerus onfeng rice, ⁊ ricsode ·xvii· winter. Se Breten lond mid dice begyrdde from sæ oþ sæ. [⁊ þa geendode on Euerwic. ⁊ Bassianus his sunu feng to rice.]

Her Seuerus feng to rice. ⁊ ferde mid here on Brytene. ⁊ mid ge feohte ge eode þes iglandes mycelne dæl ⁊ þa gewrohte he weall mid turfum. ⁊ bred weall ðær on ufon. fram sæ to sæ. Britwalum to gebeorge. He rixade ·xvii· gear. ⁊ þa ge endode on Eoferwic. Bassianus his sunu feng to rice. oðer his sunu wes ge haten Geza. se for wearð.

Not in Laud (E).

[Twa hund gæra.]

Not in Parker (A).

Victor papa hic constituit ut Pascha die dominico celebretur. sicut predecessor eius Eleutherius.

Not in Parker (A).

Cornelius papa hic de catacumbas leuauit per noctem corpora apostolorum. et posuit Pauli quidem uia Ostensi ubi decollatus est. Petri autem iuxta locum ubi crucifixus est.

Not in Laud (E).

[Her þrowade Scs Albanus mr.]

Not in Parker (A).

Her þrowade Scs Albanus mr.

Not in Laud (E).

[Þreo hund gæra.]

Not in Parker (A).

Scs Siluester papa · xxiii. Huius tempore celebratur Nicenum concilium. Arelatense quoque primum, in quo fuit Auitianus Rotomagi archiepiscopus.

[Her Gratianus feng to rice.]

Her Gratianus feng to rice.

Hoc tempore celebratur Constantinopolitanum concilium ·cl· patrum aduersus Macedonum et Eunomium sub Damaso.

Not in Parker (A).

Her Maximus feng to rice. he wæs on Bryten lande geboren. ⁊ þanon he for in Galwalas. ⁊ he ðær ofsloh þone kasere Gratianum. ⁊ his broðer adraf of eðele. se wæs gehaten Ualentinianus. ⁊ se Ualentinianus eft ge samnode weorod ⁊ of sloh Maximum. ⁊ feng to rice. On þam tidum árás Pelaies gedwild geond middan geard.

Not in Laud (E).

Her Maximianus se casere feng to rice. he wæs on Breten [walas] londe geboren. ⁊ þonne for in Gallia. [⁊ he ðar ofsloh ðone casere Gratianum. ⁊ his broðer adraf of æðele. se wæs gehaten Ualentinianus. ⁊ se Ualentinianus eft ge samnode werod, ⁊ ofsloh Maximum. ⁊ feng to rice. On þam timan aras Pelagies gedwyld geond middan eard.]

Not in Parker (A).

Innocentius papa hic misit decretalem epistolam Uictricio Rotomagensi archiepiscopo. Hic constituit sabbato ieiunare quia eo die Dñs iacuit in sepulchro.

Her Gotan abræcon Rome burg. ⁊ næfre siþan Romane ne ricsodon on Bretone. [þæt wæs embe ·xi· hund wintra ⁊ x · wintra þes þe heo getimbred was. Ealles hi rixodon on Brytene feower hund wintra ⁊ hund seouanti wintra. syððan ærost Gaius Iulius þæt lond ærost gesohte.]

Her wæs to brocen Romana burh fram Gotum ymb ·xi· hund wintra ⁊ ·x· wintra. þæs þe heo ge timbred wæs. Siððan ofer ꝥ ne rixodan leng Romana cinigas on Brytene. Ealles hi ðær rixodan ·iiii· hund wintra. ⁊ hund seofenti wintra. siððan Gaius Iulius ꝥ land erost ge sohte.

Her Romane gesomnodon al þa gold hord þe on Bretene wæron, ⁊ sume on eorþan ahyddon. þæt hie nænig mon siþþan findan ne meahte, ⁊ sume mid him on Gallia læddon:

Her Romane ge samnodan ealle þa gold hord ðe on Brytene wæron. ⁊ sume on eorðan be hyddan. ꝥ heo nan man syððan findon ne mihton. ⁊ sume mid heom on Gallia læddon.

[Her Þeodosius se gingra feng to rice.]

Her Deodosius se gingra feng to rice.

Not in Parker (A).

Huius temporis ætate extitit exordium regum Francorum, primus Faramundus.

Her Palladius [vel Patricius] se bisc̄ wæs onsended to Scottum þæt he hiera geleafan trymede. from Cælestino þam papan:

Her Patricius wæs asend fram Celestine þam papan to bodianne Scottum fulluht.

Not in Parker (A).

Hoc tempore diabolus in Creta Iudeis in specie Moysi apparens ad terram repromissionis per mare pede sicco perducere promittit. sicque plurimis necatis reliqui ad Xpi gratiam conuertuntur.

Not in Parker (A).

Celestinus papa; huius tempore aggregata est Ephesina synodus ducentorum episcoporum. cui prefuit Cirillus Alexandrinus presul aduersus Nestorium Constantinopolitanum episcopum.

Not in Parker (A).

Leo papa; hic sanciuit Calcedonensem sinodum.

[Her sendon Brytwalas to Rome. ⁊ heom fultomes bædon wiþ Piho'htas. ac hi þar næfdan nanne. forþan þe hi fyrdedon wiþ Ætla Huna cyninga. ⁊ þa sendon hi to Anglum. ⁊ Angel cynnes æðelingas ðæs ylcan bædan.]

Her sendon Brytwalas ofer 'sæ' to Rome. ⁊ heom fultumes bædon wið Peohtas. ac hi þær nefdon nænne. forþan ðe hi feordodan wið Ætlan Huna cininge. ⁊ þa sendon hi to Anglum. ⁊ Angel cynnes æðelingas þes ilcan bædon.

Her Mauricius [rtianus] ⁊ Ualentines onfengon rice. ⁊ ricsodon ·vii· winter. ⁊ on hiera dagum Hengest ⁊ Horsa from Wyrt georne geleaþade Bretta kyninge gesohton Bretene on þam staþe þe is genemned Ypwines fleot. ærest Brettum to fultume, ac hie eft on hie fuhton: [Se cing het hi feohtan agien Pihtas. ⁊ hi swa dydan, ⁊ sige hæfdon swa hwar swa hi comon. Hi ða sende to Angle ⁊ heton heom sendan mare fultum. ⁊ heom seggan Brytwalana nahtnesse. ⁊ ðæs landes cysta. Hy þa sendan heom mare fultum. Þa comon þa men of þrim mægðum Germanie. Of Eald Seaxum. of Anglum, of Iotum. Of Iotum comon Cantware ⁊ Wihtware. ꝥ ys seo mæið ðe nu eardað on Wiht. ⁊ þæt cynn on West Sexum þe man gyt hæt Iutna cyn. Of Eald Seaxon comon East Sexa ⁊ Suð Sexa ⁊ West Sexan. Of Angle comon. se a siððan stod westi betwyx Iutum ⁊ Seaxum. East Engla. Midel Angla. Mearca ⁊ ealle Norð hymbra.]

Huius tempore celebratur Calcedonense concilium ·dc· xxx · episcoporum aduersus Euticem abbatem et Dioscorum. Her Martianus ⁊ Ualentinus onfengon rice. ⁊ rixadon ·vii· winter. ⁊ on þeora dagum ge laðode Wyrtgeorn Angel cin hider. ⁊ hi þa coman on þrim ceolum hider to Brytene. on þam stede Heopwines fleot. Se cyning Wyrtgeorn gef heom land on suðan eastan ðissum lande. wiððan þe hi sceoldon feohton wið Pyhtas. Heo þa fuhton wið Pyhtas. ⁊ heofdon sige swa hwer swa heo comon. Hy ða sendon to Angle, heton sendon mara fultum. ⁊ heton heom secgan Brytwalana nahtscipe. ⁊ þes landes cysta. Hy ða sona sendon hider mare weored þam oðrum to fultume. Ða comon þa men of þrim megðum Germanie. Of Ald Seaxum. of Anglum. of Iotum. Of Iotum comon Cantwara. ⁊ Wihtwara. ꝥ is seo megð þe nu eardaþ on Wiht. ⁊ ꝥ cyn on West Sexum þe man nu git hæt Iutna cynn. Of Eald Seaxum coman East Seaxa. ⁊ Suð Sexa. ⁊ West Sexa. Of Angle comon se á syððan stod westig. be twix Iutum ⁊ Seaxum. East Angla. Middel Angla. Mearca. ⁊ ealla Norþhymbra. Heora heretogan wæron twegen gebroðra. Hengest. ⁊ Horsa. ꝥ wæron Wihtgilses suna. Wihtgils wæs Witting. Witta Wecting. Wecta Wodning. fram þan Wodne awoc eall ure cyne cynn. ⁊ Suðan hymbra eac.

Her Hengest ⁊ Horsa fuhton wiþ Wyrt georne þam cyninge, in þære stowe þe is gecueden Ægæles þrep, ⁊ his broþur Horsan man ofslog. ⁊ æfter þam Hengest feng 'to' rice ⁊ Æsc his sunu:

Her Hengest ⁊ Horsa fuhton wið Wyrtgerne þam cininge on þære stowe þe is cweden Ægeles þrep. ⁊ his broðor Horsan man ofsloh. ⁊ æfter þonn feng to rice Hengest. ⁊ Æsc his sunu.

Not in Parker (A).

Her Hengest ⁊ Æsc gefuhton wið Bryttas on þere stow þe is ge cweden Crecganford. ⁊ þer ofslogon ·iiii· werad. ⁊ þa Bryttas forleton þa Kentland. ⁊ mid mycclum ege flugon to Lunden byrig.

Not in Laud (E).

Her Hengest ⁊ Æsc fuhton wiþ Brettas in þære stowe þe is ge cueden Crecgan ford, ⁊ þær ofslogon ·IIII· wera, ⁊ þa Brettas þa forleton Cent lond, ⁊ mid micle ege flugon to Lunden byrg:

Her Hengest ⁊ Æsc gefuhton uuiþ [wið] Walas neah Wippedes fleote, ⁊ þær ·xii· Wilisce aldor menn ofslogon, ⁊ hiera þegn án þær wearþ ofslægen, þam wæs noma Wipped:

Her Hengest ⁊ Æsc gefuhton wið Walas neh Wippedes fleote. ⁊ ðær of slogon ·xii· Wilsce ealdor men. ⁊ heora an þegn wearð þær ofslegen. þam wæs nama Wipped.

Her Hengest ⁊ Æsc gefuhton wiþ Walas, ⁊ genamon un arimedlico here reaf, ⁊ þa Walas flugon þa Englan swa fýr:

Her Hengest ⁊ Æsc gefuhton wið Walas. ⁊ genamon unarimenlicu here reaf. ⁊ þa Walas flugon þa Englan swiðe þearle.

Her cuom Ælle on Breten lond, ⁊ his ·iii· suna. Cymen, ⁊ Wlencing, ⁊ Cissa. mid ·iii· scipum, on þa stowe þe is nemned Cymenes ora, ⁊ þær ofslogon monige Wealas, ⁊ sume on fleame bedrifon on þone wudu þe is genemned Andredes leage:

Her com Ælle on Bryten land. ⁊ his ·iii· suna. Cymen. ⁊ Wlencing. ⁊ Cissa. mid ·iii· scipum, on ða stowe þe is ge nemnad Cymenes ora. ⁊ þær ofslogon manige Walas. ⁊ sume on fleame bedrifon. on þone wudu þe is nemned Andredes lege.

Her Ælle gefeaht wiþ Walas neah Mearc rædes burnan stæðe:

Her Ælle gefeaht wið Walas neh Mearcredes burnan stede.

Her Æsc feng to rice, ⁊ was ·xxiiii· wintra Cantwara cyning:

Her Æsc feng to rice. ⁊ wæs ·xxxiiii· wintra cining.

Not in Parker (A).

Hoc tempore beatus Mamertus, episcopus Uiennensis, solennes letanias instituit rogationum.

Her Ælle ⁊ Cissa ymb sæton Andredes cester, ⁊ ofslogon alle þa þe þær inne eardedon, ne wearþ þær forþon án Bret to lafe;

Her Ælla ⁊ Cissa ymbsæton Andredesceaster. ⁊ ofslogon ealle þa ðe þær inne eardedon. ne wearð þær forþen an Brit to lafe.

Her cuomon twegen aldor men on Bretene. Cerdic ⁊ Cynric his sunu, mid ·v· scipum. in þone stede þe is gecueden Cerdices ora, ⁊ þy ilcan dæge gefuhtun wiþ Walum:

Her coman twegen ealdor men on Brytene. Certic ⁊ Cynric his sunu, mid ·v· scipum on þone stede. þe is gehaten Certices ora. ⁊ on þam ilcan dæge gefuhton wið Walas.

Her cuom Port on Bretene. ⁊ his ·ii· suna Bieda ⁊ Mægla mid ·ii· scipum. on þære stowe þe is gecueden Portes muþa, ⁊ ofslogon anne giongne Brettisc monnan, swiþe æþelne monnan:

Her com Port on Brytene. ⁊ his twegen sunan. Bieda. ⁊ Mægla, mid ·ii· scipum in þære stowe þe is ge cweden Portes muða. ⁊ sona land namon. ⁊ ofslogon ænne gungne Brytiscne man. swiðe æðelne.

Her Cerdic ⁊ Cynric ofslogon ænne Brettisc cyning, þam was nama Natanleod. ⁊ v · þusendu wera mid him, æfter [þan] was þæt lond, [wearð] nemned Natan leaga oþ Cerdices ford:

Her Certic ⁊ Cinric ofslogon ænne Bryttiscne cining. þam wæs nama Nazaleod. ⁊ ·v· þusend wera mid him. ⁊ æfter þan wæs ꝥ land genemnad Nazanleog. á oþ Certices ford.

Her cuomon West Seaxe in Bretene mid ·iii· scipum. in þa stowe þe is gecueden Cerdices ora, Stuf ⁊ Wihtgar. ⁊ fuhtun wiþ Brettas ⁊ hie gefliemdon:

Her com West Seaxa in Brytene mid þrim scipum in þa stowe ðe is gecweden Certices ora. ⁊ Stuf ⁊ Wihtgar fuhton wið Bryttas. ⁊ hi geflemdon.

Her Cerdic ⁊ Cynric [West Sexena] rice onfengun, ⁊ þy ilcan geare hie fuhton wiþ Brettas þær mon nu nemneþ Cerdices ford. [⁊ siþþan ricsadan West Sexana cynebearn of þan dæge.]

Her Certic ⁊ Kynric onfengon West Seaxna rice. ⁊ þi ilcan geare hi ge fuhton wið Bryttas. ðer man nu nemnað Certices ford. ⁊ siððan rixadon West Seaxna cynebarn of þam dæge.

Her Cerdic ⁊ Cynric fuhton wiþ Brettas. in þære stowe þe is gecueden Cerdices leaga:

Her Certic ⁊ Kynric ge fuhton wið Brittas. on þære stowa ðe is gecweden Certices ford.

Not in Parker (A).

Hoc tempore Dionisius in urbe R. circulum paschalem composuit. Tunc Priscianus profunda grammatica rimatus est.

Her Cerdic ⁊ Cynric genamon Wihte ealond. ⁊ ofslogon fea [la] men on Wihtgaræsbyrg:

Her Certic ⁊ Cynric ge naman Wihtland. ⁊ of slogon feala manna. on Wihtgaras birig.

Her Cerdic forþferde, ⁊ Cynric his sunu ricsode forþ ·xxvi· wintra, ⁊ hie saldon hiera tuæm nefum Stufe ⁊ Wihtgare Wiehte ealond [eall wiht ealand]:

Her Certic forþ ferde. ⁊ Cynric his sunu rixade forþ ·xxvi· wintra. ⁊ heo sealdon heora twam nefum Stufe ⁊ Wihtgare eall Wihtland.

Her sunne apiestrode ·xiiii· dagum ær Kl. Mart from ær mergenne oþ undern:

Her sunne aðestrode. on ·xiiii· kl. MR. from ærmorgene oþ underne.

Her sunne apiestrode on ·xii· Kl. Iulii. ⁊ steorran hie ætiewdon ful neah healfe tid ofer undern:

Her sunne aðeostrode on ·xii· kl. Iulii. ⁊ steorran heo ætewdon ful neh healfe tid ofer under [n].

Her Uuihtgar forþferde, ⁊ hiene mon bebyrgde on Wihtgara byrg:

Her Wihtgar forðferde. ⁊ hine mon be byrig [de] on Wihtgaras byrig.

Her Ida feng to rice, þonon Norþan hymbra cyne cyn onwoc. [⁊ rixode twelf gear. ⁊ he timbrode Bebbanburh. seo wæs ærost mid hegge betyned. ⁊ þar æfter mid wealle.] [Ida wæs Eopping, Eoppa Esing, Esa wæs Inguing. Ingui Ængenwitting. Ængenwit Ælocing. Æloc Benocing. Benoc Branding, Brand Bældæging. Bældæg Wodening. Woden Freoþolafing, Freoþelaf Freoþulfing. Friþulf Finning. Finn Godulfing. Godulf Geating.]

Her Ida feng to rice þanon Norðhymbra cyne kyn ærost awoc. ⁊ rixade ·xii· gear. ⁊ he ge timbrade Bebban burh. sy wæs ærost mid hegge be tined. ⁊ þær æfter mid wealle.

Her Cynric gefeaht wiþ Brettas in þære stowe þe is genemned æt Searobyrg. ⁊ þa Bret Walas gefliemde. Cerdic wæs Cynri [ces fæder. Cerdic Elesing. Elesa Esling. Esla Giwising. Giwis Wiging. Wig Freawining. Freawine Freoþogaring. Freoþogar Bran [d] ing. Brand Bældæging. Bældæg Wodening.]

Her Kynric feaht wið Bryttas on þære stowe þe is ge nemned Searo byrig. ⁊ þa Bryttas ge flemde.

Her Cynric ⁊ Ceawlin fuhton wiþ Brettas æt Beranbyrg:

Her Kynric ⁊ Ceawling fuhton wið Bryttas æt Beran byrig.

Her Ceawlin feng to rice on Wesseaxum, ⁊ Ælle feng to Norþanhymbra rice. [Idan forðgefarenum. ⁊ heora ægðer rixade xxxti. wintra.] [Ælle wæs Yffing. Yffe Uxfreaing. Uxfrea Wilgisling. Wilgisl Wester falcing. Westerfalca Sæfugling. Sæfugl Sæbalding. Sæbald Sigegeating. Sige geat Swebdæging. Swebdæg Sigegaring. Sigegar Wægdæging. Wægdæg Wodening.]

Her Ceawling rice onfeng on Weast Seaxum. ⁊ Ælle feng to Norðhymbra rice. Idan forð ge farenum. ⁊ hyra ægðer rixade ·xxx· wintra.

[Her feng Æðelbriht to Cantwara rice. ⁊ heold ·liii· wintra.] [Her Columba presbiter côm of Scottum on Bryttas. Peohtas to lærenne. ⁊ on Hii þam ealande mynster worhte.] [On his dagum sende Gregorius us fulluht ⁊ Columba mæsse preost com to Pihtum. ⁊ hi gecyrde to Cristes geleauan. ꝥ synd þonne wærteras be norðum morum. ⁊ heora cyng him gesealde þæt igland þe man Ií nemnað. þar syndon fif hida. þæs ðe man seggað. þar se Columban getimbrade mynster, ⁊ he þar was abb'. xxxii. [wintra.] ⁊ þar forðferde. þa he was ·lxxvii· wintra. Ða stowe habbað gyt his yrfnuman. Suþ Pihtas wæron ær gefullode of Ninna biscope. se was on Rome gelæred. his mynster ys Hwiterne on S. Martines naman gehalgod. þar he resteð mid manegum halgum. Nu sceal beon æfre on Ii abbod, ⁊ na biscop. ⁊ þan sculon beon under ðeodde ealle Scotta biscopas. for þan þe Columban was abbod, na biscop.]

Her feng Æðelbriht to Cantwara rice. ⁊ heold ·liii· wintra. On his dagum sende Gregorius 'us' fulluht. ⁊ Columba messapreost com to Pyhtum. ⁊ hi gecyrde to Cristes geleafan. ꝥ sind þone wærteres be norðum morum. ⁊ heora cyning him ge sealde ꝥ egland þe man nemnad Íí. þær sindon ·v· hida. ðæs þe men cweðaþ. Þær se Columba ge tymbrade mynster. ⁊ ðær he wæs abbot ·xxxii· wintra. ⁊ þær forðferde ða ða he wæs ·lxxvii· wintra. Ða stowe habbað nu git his erfe wærdes. Suð Pyhtas wæron mycle ær ge fullode. Heom bodade fulwiht Nimia biscop. se wæs on Rome ge læred. þæs cyrice. ⁊ his mynster is æt Hwiterne. on Martines naman ge halgod. þær he restað mid manegum halgum wærum. Nu sceal beon æfre on Íí abbod næs bisceop. ⁊ þam sculon [beon] under þædde ealle Scotta biscopes. for þam ðe Columba wæs abbod. nes bisceop.

Her Ceaulin ⁊ Cuþa gefuhton wiþ Æþelbryht. ⁊ hine in Cent gefliemdon, ⁊ tuegen aldor men on Wibban dune ofslogon, Oslaf ⁊ Cnebban.

Her Ceawlin ⁊ Cuþa ge fuhton wið Æðelbriht. ⁊ hine on Cent ge flemdon. ⁊ ·ii· ældor men on Wibban duna of slogon. Oslac ⁊ Cnebban.

Her Cuþwulf feaht wiþ Bretwalas æt Bedcanforda. ⁊ iiii · tunas genom, Lygeanburg. ⁊ Ægelesburg. Bænesing tun. ⁊ Egones hâm. ⁊ þy ilcan geare he geforþferde.

Her Cuþa ge feaht wið Bryt walas. æt Biedcanforda. ⁊ feower tunas ge nam. Lygeanbyrig. ⁊ Æglesbyrig. ⁊ Benesing tun. ⁊ Egonesham. ⁊ on þam ilcan geare he forþfor. se Cuþa wæs Ceawlines broðor.

Her Cuþwine ⁊ Ceawlin fuhton wiþ Brettas, ⁊ hie ·iii· kyningas ofslogon, Coinmail, ⁊ Condidan, ⁊ Farinmail, in þære stowe þe is gecueden [w] Deorham. ⁊ genamon ·iii· ceastro [a] Gleawanceaster, ⁊ Cirenceaster, ⁊ Baþanceaster.

Her Cvðwine ⁊ Ceawlin ge fuhton wið Bryttas. ⁊ hi ·iii· ciningas of slogon. Coinmagil. ⁊ Candidan. ⁊ Farinmagil. in þære stowe þe is ge cweden Deorham. ⁊ ge namon ·iii· ceastra. Gleawcestre. ⁊ Cirenceaster. ⁊ Baþan ceaster.

[Her Mauricius feng to Romana rice.]

Her Mauricius feng to Romana rice.

Her Ceawlin ⁊ Cuþa fuhton wiþ Brettas, in þam stede þe mon nemneþ Feþanleag, ⁊ Cuþan mon ofslog. ⁊ Ceaulin monige tunas genom, ⁊ un arimed lice here reaf, ⁊ ierre he hwearf þonan to his agnum.

Her Ceawlin ⁊ Cuþa ge fuhton wið ða Bryttas on þam stede ðe man nemnaþ Feþan lea. ⁊ Cuþan man ofsloh. ⁊ Ceawlin maniga tunas ge nam. ⁊ unarimedlice here reaf.

Her Ælle cyning forþ ferde, ⁊ Æþelric ricsode æfter him ·v· gear.

Her Ælle cining forðferde. ⁊ Æðelric rixade æfter him fif gear.

Her Ceol [ric] ricsode ·v· gear.

Her Ceolric rixade ·vi· gear. Gregorius papa hic augmentauit in predicatione canonem: Diesque nostros in tua pace disponas.

Her micel wælfill wæs æt Woddesbeorge, ⁊ Ceawlin wæs ut adrifen. [⁊ Gregorius feng to papdome on Rome.]

Her Gregorius feng to papdome on Rome. ⁊ mycel wæl ge weard on Brytene þes geares æt Wodnesbeorge. ⁊ Ceawlin wæs ut ádrifen.

Her Ceawlin ⁊ Cuichelm ⁊ Crida forwurdon, ⁊ Æþelfriþ feng to rice [on Norðhymbrum].

Her Ceawlin ⁊ Cwichelm ⁊ Crida forwurdon. ⁊ Æðelferð feng to rice on Norðhymbrum. Æðelricing. Æðelric Iding.

Not in Laud (E).

[Her Gregorius papa sende to Brytene Augustinum. mid wel manegum munecum. þe Godes word Engla ðeoda godspelledon.]

Not in Parker (A).

Hoc tempore monasterium sancti Benedicti a Longobardis destructum est. Her Gregorius papa sende to Brytene Augustinum mid wel manegum munucum. þe Godes word Engla þeoda godspellodon.

Her ongon Ceolwulf ricsian on Wes seaxum, ⁊ simle he feaht. ⁊ won, oþþe wiþ Angel cyn, oþþe uuiþ Walas, oþþe wiþ Peohtas, oþþe wiþ Scottas; Se wæs Cuþa ing. Cuþa Cynricing, Cynric Cerdicing, Cerdic Elesing, Elesa Esling, Esla Gewising, Giwis Wiging, Wig Freawining, Freawine Friðugaring, Friðugar Bronding, Brond Bældæging, Bældæg Wodening.

Her ongan Ceolwulf rixian on Weast Seaxum. ⁊ symb [l] e he feaht ⁊ wan. oððe wið Angelcynn. oþþe wið Walas, oððe wið Pyhtas, oððe wið Scottas.

Her sende Gregorius papa Agustino ærce biscepe pallium in Bretene, ⁊ wel monige godcunde lareowas him to fultome; ⁊ Paulinus bisc̄ gehwerfde Edwine Norðhymbra cyning to fulwihte.

Her sende Gregorius papa Augustine arcebiscope pallium on Brytene. ⁊ wel manega godcunde larewas him to fultume. ⁊ Paulinus biscop gehwirfede Eadwine Norð'hymbra cining to fulluhte.

Her [wæs gefeoht æt Egesan stane.] [Ægðan Scotta cyng feaht wið Dælreoda, ⁊ wið Æðelferþe Norþhymra cynge æt Dægstane, ⁊ man ofsloh mæst ealne his here.]

Her Ægðan Scotta cining feaht wið Deolreda. ⁊ wið Æðelferþe Norðhymbra kining æt Dægsanstane. ⁊ man ofsloh mæst ælne his here. þær man ofsloh Theodbald Æðelferðes broðor. mid eallan his weorode. Ne dorste siððan nan Scotta cininga lædan here on þas þeoda. Hering Hussan sunu lædde þone here ðider.

[Augustinus gehalgode ·ii· biscopas. Mellitum ⁊ Iustum.] Her [East Seaxe onfengon geleafan ⁊ fulwihtes [Mellitum he sende to bodienne East Seaxum fulluht. ðar was se cing gehaten] bæð. under Sæbrihte cinge ⁊ Mellite bisceope.] [Sæbyrht. Ricolan sunu. Æðelberhtes swyster. þone Æðelbyrht gesette to cynge. ⁊ Æðelberht gesealde Mellite biscop setl on Lundewic. ⁊ Iusto on Hrouecystre. seo ys ·xxiiii· mila fram Dorwit ceastre.]

Her Augustinus ge halgode ·ii· biscopas. Mellitum ⁊ Iustum. Mellitum he sende to bodianne East Seaxum fulluht. þær wes se cing ge haten Sæberht. Ricolan sunu Æðelberhtes suster. þone Æðelberht ge sette þær to cininga. ⁊ Æðelberht ge sealde Mellite biscop setle on Lu'n'den wíc. And Iusto he sealde Hrofes ceaster. seo is ·xxiiii· mila fram Dorwit ceastre.