Bókastaðir

Her byriaz bok af hinum agieta guðs vin Josue hertuga. er Moyses aðr hann andaðiz setti yfer allan Gyðinga lyð.

Moyses agietr guds vin aðr hann andadizt hafðe at guds raaðe ok fyrersǫgn sett þann mann hertogha yfer allan Gyðinga lyð er heet Josue. faðer hans er nefndr Nun. Josue heet oðro nafne Jesus sun Naue. Ok efter andlaat Moysi vittraðiz guð drottinn Josue sua seghiande. Moyses minn þionn er andaðr. nu ris þu vpp ok flyt allan minn lyð yfer aana Jordan. aa þa iorð er ek man gefa Gydinga lyð. Huern þann stad sem þer komit fotum a man ek selia vnder ydart valld. sem ek sagða Moysi. fra eyðimork ok fialli Libano allt til hinnar miklu aar Eyfraaten. alla iorð þeirra þioða er Ethei heita til hafsins mikla moti solar setri. þetta er vinnmerki ydars rikiss. Eingi maðr skal yðr megha i moti standa sua leingi sem þu lifer. Sua sem ek var meðr Moysi meðan hann lifdi. slikt hit sama skal ek nu meðr þer vera ok eigi þik vpp gefa ok eigi forlaata. Styrktz þu ok ver oflugr. þuiat þu skallt skipta iorðu þeirri medr þessum lyð. er ek heet at gefa fedrum þinum. Styrktz þu ok ver stoðugr at fremia ok fullgiora allt lǫghmaal. þat er minn þionn Moyses bauð þer. Eigi skallt þu hneigiaz fra þui loghmaale til hégre handar ne vinstre. at þu meger skilia skynsamlega huat þu giorer. Latt þu loghmáálsbok þessa þer eigi or minne falla. helldr hugleid vm netr ok dagha. at þu vardueiter ok vinner alla luti þa som a henne eru skrifaðer. at þu greider gotu þina ok skiler hana. Séé nu. ek byð þer at þu styrkiz ok ver stadfastr. hirð ekki at hrédaz. þuiat drottinn gud þinn er meðr þer i ollum lutum til huerra sem þu ferr.

Josue kallade saman hofdingia.

Efther þersa guðlegha vittran kallar Josue saman alla hofdingia Gydinga sua segiande. Farit skiott vm allar herbuder ok bioðit folkinu. at huerr maðr bui sinn varnað ok vister. þuiat efther þrea dagha skulut þer fara yfer Jordan ok ganga til eighnar aa þa iorð er drottinn guð man ydr gefa. Sidan kallar Josue til sin þa menn sem komner voru fra Ruben ok Gaað sunum Jacobs ok helming kyns Manase. þersu folki hafde Moyses meðan hann lifde gefit riki þat er þeir hofdu vunnit fyrer austan Jordan af heidnum konungum. þeim er þeim bannade medr bardagha. er þeir beidduz meðr friðe at fara yfer þetta riki. Josue talar nu sua vidr þenna lyð. Minniz nu a friðar felagh. huat hinn méti Moyses guðs þionostumadr bauð yðr. þa er hann veitti sem þer beiddut til frelsis iorð þersa ok oðul. sem nu erum ver a stadder. Latit her efter vnder guðs þionostu ok geymslu konur yðrar ok kuikfe born ok busmala. Enn þer takit vaapn ok viðrbunað ok gangit medr goðfysi dreingilegha ok dearflega fyrer breðr ydra moti heiðingium. þar til er guð gefr þeim fagnaðar frelse. sua sem hann hefer yðr adr gefit. Enn þa er þeir hafa alla iorð oðlaz. þa sem guð man gefa þeim. þa huerfi þer aftr til ydarrar eignar iardar. buiz þa vm ok byggit hana medr friðe ok farselu. Sem Josue hette sinne redu. suara þeir a þersa lund. Meðr glodum hugh ok goðum vilia skulum ver giora alla luthi efter þinni bén ok boðe. Sua sem ver hlyddum Moysi medan hann lifde. sua skulum ver nu vera þer auðuellder ok ofletter til allra lutha er þu vill at ver giorim. Veri guð drottinn meðr þer sem hann var medr Moysi ok styrki þik. sua at þu strider styrklegha ok knoser knaalegha þina motstoðumenn. Se sa drepinn ok deyddr er neittar nokkoru orði þui er þu byðr.

Her sender Josue menn sina i Jiericho at skoða landzlegh.

148. Þa er Josue var i þeim stad er Sathim heiter. sende hann. ii. menn fra herbudum leynilegha yfer Jordan at skynia ok skoða landzlegh ok niosna. ef þeir néði i borg Jericho er stoð a vollunum odru megin aarinnar. þeir foru ok framm komu. toku ser herbergi i husum einnar portkonu innan borghar er heet Raab. Ok þegar var sagt konungi borgarinnar. at þar véri komner a þeirri nalt niosnarmenn Gydingha. Konungr sender iafnskiott menn til husa Raab ok bað hana framm selia gesti þa er þar voru. þuiat þat voru niosnarmenn segia þeir komner at ranzsaka land vaart. Sem Raab var uon við konungs menn. for hon at fela gesti sina i nokkoru leyni husa sinna Geingr siðan at suara konungs monnum. Jatti ek segher hun. at komu. ii. menn til min vkunner mer. ok visse ek eigi huadan þeir voru. ok struku brottu baðer i myrkrinu við þat sealft er borgarhlið voru byrgd. visse ek eighi huert þeir sneru af sidan. Farit nu sem skiotaz at handla þa. Konungs menn kostgiefðu sem fyrst at finna þa. fyrer þui skynda þeir i brott af borginne a þer gotur er greidaz laa vegr til Jordaanar. var þa borgarhlið byrgt aftr efter þeim. Enn Raab geingr inn til gesta ok talar sua. Eigi dyl ek. helldr þikki mer vis vaan. at guð man gefa yðr iorð þersa. þuiat eingi er sua styrkr ok stoðugr ok hraustr hofdingli a vaaru lande at eighi hreðiz yðra tilkuamu. sua at vggr ok otti gerdir ok grefr vm váár hiortu. at oss er varla lifs von fyrer hrezlu. siðan ver heyrdum at drottinn þurkaðe hafit rauda ok giorde ydr þar yfer greiða gotu. er þer forut af Egiptalande. ok huersu þer draput. ii. konunga Aamorreorum þioða. þui trui ek ok þat hyggr ek. at guð yðarr er drottinn bedi vppi a himni ok nidre a iorðu. Nu þa suerit mer fyrer dyrð drottins. at sua sem ek gerir vidr ykkr milldi ok miskunn. slikt hit sama skulut þer giora viðr mik. Gefit mer skyrt ok skiott mark til. at þit manit mer heaalp veita ok heilsu foður minum ok modur bredrum ok systrum ok ollu þui gods er ver eigum. ok allt vart hyski ok heimamenn leysa fra dauða ok draapi. þeir suorudu. Sennilega skulum við selia okkr i lifs haaska fyrer yðr. ef þu selr okkr nu eighi framm. ok þa er guð gefr þersa iorð a vaart valld. þa skulum ver giora vidr þik sannleik ok maklega miskunn. Nu fyrer þui at hennar herbergi voru afost borgarvegginum. leet hon þa siga i festi i gegnum einn glugg ofan fyrer murinn. ok melti viðr þa. Farit nu fiallu ę ghu vt yfer aana eighi hit beinsta. at þeir finne ykkr eigi. er þeir huerfa aftr er ykkar fara at leitha. þeir snua þuers fra borginne ok fara efther fcalli allt til Jordanar. oc sva yfir ana til fvndar við Josve oc segia honvm allt þat er gerðiz i þeirra ferð. kvaðvz þat oc vist hyggia. at gvð myndi gefa i þeirra valld alla þa iorð. þiat allir landzmenn ero ottafvllir segia þeir.

Fra ferð Gyðinga.

149. Um morgvninn eftir sem Josve oc allr herrinn var klæddr. taka þeir at hræra herbvðir sinar oc fara fram til arinnar Jordanar oc dvölldvz þar. iii. daga við ana. At þrim davgvm liðnvm fara rennarar vm allar herbvðir oc toko at kalla sva segiandi. þann tima sem þer siait kennimenn fram bera sattmalsðrk drottins. þa risi þer vpp oc s ę kit framm eftir. Enn fyrir þi at þer ę igit at ganga gavtv vkvnna. þa sem þer hafið æigi fyrrvm farit. þa skvlv þer þessa menn er ðrkina bera lata alldri skemra fram fara vndan en. ii. þvsvndir alna se milli yðar oc archarinnar. til þess at þer megit iafnan liosan læiðarvisi hafa af þeirra fyrirferð. Josve talar nv til lyðsins. Hr ę insit yðr oc helgit. þiat a morgin man herra gvð gera fvrðvliga favgr takn i yðrv avgliti. Siðan mællti hann til kennimanna. Takit vpp hina helgv ðrk oc gangit fyrir folkino. En þeir fliott fyllandi hans boðskap barv framm ðrkina. Gvð drottinn talar þa til Josve. J dag man ek til taka þik vpp at hefia fyrir ðllvm Jsraels lyð. at þeir megi þaðan af skilia. at ek em nv sva með þer sem ek var með Moyse. Enn nv bioðtþv kennimonnvm at bera avrkina. Ok þegar sem þeir stiga vt a Jordan. þa nemi þeir stað oc standi þar. þa mællti Josve til lyðsins. Gangit nv higat oc heyrið orð drottins. J þesso megvt þer vist vita segir hann. at varr herra lifandi gvð er með yðr. at hann man dreifa oc dræpa i yðvarri avgsyn þessar þioðir Chananeum. Etheum. Eveum. Ferezeum. Gergeseum. Amorreum oc Jebuseum. at þa er kennimenn þeir er bera sattmalsǫrk drottins allrar iarðar snerta sinvm fotvm vatn Jordanar. þa man sa hlvtr arinnar sem niðr er fra þeim þrotna oc þorna af. enn þat sem vpp er fra þeim man styrkiaz oc standa vppi.

Ferð Gyðinga yfir Jordan.

150. Nv biozt allr herr sem akafaz or herbvðvm. oc er kennimenn koma at ainni með ǫrkina. þa ferr allt sem fyrr var sagt. at i ainni var vǫxtr Jordan mikill. sem verða kann vm kornskvrðar tima. sva at fylldi allan farveg vpp a backana baðvm megin. Ok þegar sem þeir stiga i vatnit er á flavt backann. þa nam staðar stravmrinn vpp fra þæim oc þrvtnaði. þilikaz sem fiall stæði sva hatt. at langa læið sa til allt af borg Adóm oc til þess staðar er Sartan heitir. Enn þat vavtn sem neðar voro fello fram i sia þar sem hæitir davða haf. þar hǫfðv staðit borgir Sodoma oc Gomorra. Varþ þa með ǫllo ecki vatn eftir i farveg arinnar. Geck þa allr lyðr þvrrvm fotvm yfir Jordan. Enn kennimenn með ǫrkina helgv stoðv a þvrrv grioti i miðivm farveg Jordanar. þar til er allt folk var yfir komit ana a fyrirhæiz iorð.