Gud mællti vit Moysen. Stig þu vpp aa fiall Eborim. ok lit iord þa er ek mun gefa sonum Jsrael. Ok er þu sier þa iord. þa muntv fara til frammlidinna frænda þinna sem Aaron brodir þinn. þuiat þer stygdut mik i eydimork Sin ok gagnmælis lydr. ok eigi villdut þier mik helga firir sonum Jsraels firir votn gagnmælis i Cades i eydimork Sin. Moyses suaradi. Drottinn gud andi allz blods. sia firir nockurn mann. þann er styre þessum mannfiolda ok megi fara firir lydnum vt ok inn. at eigi se lydrinn suo sem saudir þeir er eigi hafa hirde. Gud mællti vit Moysen. Taktu Josue son Nuns agætan mann. i honum er guds andi. ok legg þu hond þina yfir hann. þa er hann stendr firir Eliazaro kennimanni ok ollum þessum mannfiolda. ok muntu þa gefa honum bodord at ollum asiaundum monnum ok hlut dyrdar þinnar. at aller synir Jsrael veiti honum hlydni. Eleazar skal til frettar ganga um þa hluti er þess þarf vit. ok Eleazar skal firir rada. huenær lydrinn skal vpp hefia faur sina eda huenær hann skal standa. Moyses gerdi sem gud baud honum. hann setti Josue firir Eleazaro ok ollum lydnum. ok lagdi hendr sinar yfir hofud honum ok sagdi honum þa hlnti er gud baud honum. þa sagdi gud Moysi þau laug er hann setti um huersdagligar fornfæringar a morgun ok aptan. ok þa greindi gud fornfæringar þær er lydrinn skylldi færa aa sierhuerium timum.
Eptir þat mællti gud vit Moysen. Hefn þu nu adr enn þu andazt þess er portkonur spilltu lyd þessum. Moyses mællti þa vit lydinn. Velit nu þusund manna af lydnum af sierhuerium kynsþætti Jsraels. ok uopnit þat lid ok buit til bardaga. ok berizt vit Madianitis þiod. ok hefnit þess er þer letud portkonur ydr suikia. Lydrinn gerdi sem Moyses baud. þeir voldv af lidi sinv. xiiii. þusundir manna. Moyses setti Finies son Eleazar hofdingia yfir þat lid. ok selldi honum heilug ker ok ludra at blasa til þess er þurpti. þa for Finies med þessu lide i moti heidnum monnum. Heidnir menn eflldv lid i moti Gydingum. ok er þeir funduzt. þa baurduzt þeir. J þessum bardaga sigruduzt Gydingar ok drapu alla heidna menn. þa er i moti þeim haufdu farit. suo konunga þeirra ok hofdingia. þar fiell Balaam Beors son. þeir toku þar at herfangi konur þeirra ok baurn ok fenadi alla. ok allt fe þat er þeir haufdu att. ok eyddu borgir þeirra ok kastala ok bæi ok brendv i elldi. Ok er þeir komu aptr til fundar vit Moysen ok Eleazar. þa saugdu þeir þeim sigr þann er þeir hofdu unnit. ok syndu þeim menn ok kuikfe þat er þeir haufdu at herfangi tekit. Enn annat fe haufdu þeir saman borit aa vollum Moab. Moyses ok Eleazar gengu i moti þeim med miklv fiolinenni vt fra herbudum. Ok er Moyses visse at þeir hofdu konur at herfangi tekit. þa reiddezt hann hofdingium þeim er firir þui hofdu radit. Moyses mællti þa. Firir hui toku þier þessar konur at herfangi. ero eigi þessar þær hinar saumu er tældv fyrr frænd ydra ok teygdu þa til blotz Bals. ok lietv firir þa synd margir menn lif sitt. Nv drepit þier oll sueinborn ok konur þær er vit kalla hafa att samrædi. enn vardveitid ydr til handa allar ungar meyiar. verit þier nu. vii. daga firir vtan herbudir. Sa huerr er heidinn mann vegr eda tekr aa heidins mannz like vegins. þann mann skal rannsaka aa þridia degi ok sionda. Alla hluti skal hreinsa. þa er þeir hafa at herfangi tekit. Eleazar kennimadr mællti vit alla hermenn. þa er barizt hofdu aa moti Madianitis monnum. þetta er laugmal þat er drottinn baud sinum monnum. gull ok silfr. iarn ok eir. tin ok bly. ok allt þat er elld ma þola skal i elldi hreinsa. A sionda degi skulu þier þuo klædi ydur. ok suo skulu þer hreinsadir ganga i herbudir. Lydrinn gerdi sem Eleazar baud. Gud baud Moysi. at hann skipti herfangi med lydnum er þeir hofdu feingit i forinne. ok sagdi vandliga firir. at þeim hlutum skylldi skipta med aullum þeim er barist hofdu. ok suo þeim er heima voru. þat baud gud. at eitt kuikindi af. v. hundrudum iafnt af monnum sem odrum kuikuendum skylldi færa Eleazaro. þuiat þeir hlutir ero frumtignir drottins. Enn helming allra kuikvenda skylldu hafa lærdir menn. þeir er þionudu i tialldbud drottins. Moyses ok Eleazar haufdingiar lydsins skiptu herfangi med folkinu. sem gud baud þeim. þat herfang var. dc.. lxx. ok. v. saudir. naut voru. lxx. ok. v. asnar voru. lx. þusund manna. xxx. ok. ii. konur þeirra er eigi hofdu vit kallmenn att samrædi.
Kynsþattr Rubens ok Gads voru audgir menn ok attv margt kuikfe. Ok er þeir sa þar godar iardir ok heraud Jaredh ok Galeath. þa foru þeir aa fund Moyses ok Eleazar ok annarra hofdingia. ok mælltu suo. Jord Jazareth ok Bebon ok Jareth. Nema. Esbon. Eskale. Soba ok Neba ok Beon. þessar iardir hefir gud gefit i yduart valld ok ero uel grosugar ok kostgodar. enn ver þrælar þinir hofum margt kuikfe. Nv bidium ver þig. ef ver hofum fundit myskunn firir þinum augum. at þu gefir oss þessar iardir til eignar þinum þionum. ok lat oss eigi fara yfir Jordan. Moyses suaradi. Huort skulv þier hier sitia. þa er frændr ydrir fara til bardaga. Firir hui snuit þier nidr hugi frænda yduarra sona Jsraels. at þeir þori eigi at fara til þess stadar er gud hefir þeim gefit. Suo giordu ok frændr ydrir. þeir er ek senda at niosna Jorsalalandz. þa er þeir komu aptr. þa sneru þeir nidr hugi sona Jsraels. at þeir færi eigi til þess landz er gud baud þeim til at fara. Firir þat reiddizt gud þeim ok sagdi. at ongvir tuitugir menn ok elldri mundu koma aa Jorsalaland nema Kaleb ok Josue. ok firir þat let gud þenna lyd. xl. vetra i eydimork. til þess er hann eyddi þa menn alla er vit hann misgiordu. Ok nu risit þer vpp eptir þeirra dæmum illra yduarra frænda. ok giorezt fostrar syndugra manna. at þier aukit vit reidi drottins yfir sonum Jsraels. Nv ef þier vilid eigi gudi fylgia. þa mun hann lyd þenna firirlata i eydimork hier. ok mvnu þer vera sauk bana þeirra manna allra er lif sitt lata her. Nv er Moyses hafdi þessa hluti mællt. þa gengu þeir nær er landzins badu ok mælltu. Uer hofum nu hus ok rettir fenadi vorum. borgir ok kastala konum vorum ok bornum. þui munum ver fara vopnadir til bardaga med lydnum þangat til er þeir fa unnit landit. Enn ver munum hier eptir lata konur vorar ok born i stærstum borgum. Enn ver munum eigi hingat aptr fara fyrr enn synir Jsraels hafa unnit þat land er gud hefir þeim gefit. Moyses mællti. Ef þier giored eptir þui sem þer mælit. at þier farit firir guds saker fusor fyrr til bardaga vel vopnadir ok fylgit lyd guds þangat til er þeir hafa þat vnnit er gud hefir þeim gefit. þa eignizt þer þessar iardir er þier beidizt. þeir suorudu. Alla hluti munu ver efna. þa er ver hofum mællt vm þetta mal. ok dreingiliga skulu ver fylgia folkinu i ollum mannraunum þeim sem at berazt. Moyses vottadi þetta mal firir Eleazaro ok lydnum ok ollum hofdingium. Hann gaf þa kyni Rubens ok Gadz ok halfu kyni Manases syni Joseps þær iardir sem þeir beiddu. þat riki er hast hafdi Seon konungr Amoriorum þioda ok Ogg konungr Basan med borgum ok kastolum. Kynslod Gads skipadi hann Bidon ok Astareth. Aro Efrod. Somphon. Jaredd. Jeobab.
Bedueta. Beþeron. þær borgir voru allar miklar ok sterkar. Frændr Rvbens skipudu þessar borgir. Esbon. Eskale. Cariatharim. Naba. Baul. Meon. Frændr Malor son Manases foru i Galaath ok drapu þar Amorœum hofdingia þess herads ok eyddu ollum monnum þeim er þar hofdu bygt. ok eptir þat bygdu þeir þar sialfir. Jair son Manase eyddi marga borg firir heidnum monnum. þeim er voru i Galaath. ok gerdi þar mikla borg. þa kalladi hann Annat. Nvbe vann þa borg er Kanaan var kollut ok þær borgir er þar lagu vit. ok gaf sitt nafn borginne ok kalladi Nube.
Moyses ritadi nafn stada þeirra allra er þeir settv herbudir sinar i eydimarkinne. þar sem gud baud þeim. Gud baud Moysi ok sagdi med huerium endimorkum var þat land er hann gaf sonum Israels. bædi nordr ok sudr. austr ok uestr. Gud mællti vit Moysen. þessi ero naufn þeirra manna er skipta skulu landi medal allra manna yduarra. Eleazar kennimadr ok Josue son Nuns. ok sierhuerir hofdingiar i ollum kynium Jsrael. þeim er ek mun nu nefna. Af kyni Juda Kalef son Efona. Af kyni Simeons Fanuel. Af kyni Dans Boczi son Augli. Af kyni Manase Hamel son Epod. Af kyni Effraim Kanuel son Serfaan. Af kyni Zabulon Elesaphad son Faron. Af kyni Jsacar hertugi Fallziel son Ozan. Af kyni Asser Abiut son Salomi. Af kyni Neptalim Fedael son Ameþad. þessum monnum baud gud at skipta landi med sonum Jsrael. Gud mællti þa enn vit Moysen. Biod þu sonum Jsrael. at þeir gefi lærdum monnum af sinu fe ok eignum borgir at byggia i ok undirborgir frændum þeirra. Af þeim borgum er lærdir menn eigu skulv uera. vi. borgir. þær er allir menn skulu frid hafa. þeir er þangat sækia.. xl. annarra borga skulu lærdir menn eiga til bygdar. ok þar vm framm vndirborgir fenudum til fædzlu.
Moyses skyrdi þa firir folkinu allt laugmal þat sem gud baud þeim. ok iarteignir þær er gud hafdi gert firir þeim. ok eggiadi lydinn til astar vit gud ok vardueitzlu guds bodorda. Moyses sette menn til at bleza þeim er guds laug helldu ok bolua þeim er guds laug brutv. ok sette huorumtueggium formæli. huersu þeir skylldu bleza eda bolua. J þessum ordum mællti hann suo. þessi ord skulu lærdir menn mæla med harri rauddu vit allan Gydinga lyd. Bauluadr se sa madr er skurgod gerir ok blotar. ok þa skal allr lydr suara ok segia amen. þa skulu lærdir men mæla. Bauluadr se sa madr er eigi vegsamar faudur sinn ok modur. ok þa skulu aller menn segia amen. Bolvadr se sa madr. er aa brutt færir landamark naungs sins. ok þa skulu aller svara ok segia amen. Boluadr se sa er blindan mann lætr villazt aa gautu. þa skulu allir suara ok segia amen. Boluadr se sa madr er rangsnyr vtlendz mannz dom eda ungs mannz eda eckiu. þa skulu aller suara ok segia amen. Boluadr se sa madr er sefr med konu fodur sins ok synir yfirbreidzlu reckiu hennar. þa skulu aller suara amen. Boluadr se sa madr er vit ferfætt kuikendi aa samrædi. ok þa skulu aller segia amen. Boluadr se sa madr er sefr med systur sinne ok dottur fodur sins ok modur sinnar. ok þa skulu aller svara ok segia amen. Boluadr se sa madr er sefr med suæru sinne. þa skulu aller suara ok segia amen. Boluadr se sa madr er leyniliga lystr naung sinn. ok þa skulu aller suara ok segia amen. Boluadr se sa madr er fe tekr til þess at liosta naung sinn. þa skulu aller suara amen.