Þetta er prologus fyri bók þessi.
Í aldarfarsbók þeiri, er Beda prestr heilagr gerði, er getit eylands þess er Týli heitir, ok á bókum er sagt at liggi sex dœgra sigling í norðr frá Bretlandi; þar sagði hann eigi koma dag á vetr, ok eigi nótt á sumar, þá er dagr er sem lengstr. Til þess ætla vitrir menn þat haft, at Ísland sé Týli kallat, at þat er víða á landinu er sól skínn um nætr, þá er dagr er sem lengstr, enn þat er víða um daga er sól sér eigi, þá er nótt er sem lengst. Enn Beda prestr andaðisk sjau hundruðum ok fimm ok þrimr tigum árum eftir holdgan dróttins várs, at því er ritat er, ok meirr enn hundraði ára fyrr enn Ísland bygðisk af Norðmǫnnum. Enn áðr Ísland bygðisk af Noregi, váru þar þeir menn, er Norðmenn kalla Papa; þeir váru menn kristnir, ok hyggja menn at þeir hafi verit vestan um haf, því at fundusk eftir þeim bœkr írskar, bjǫllur ok baglar, ok enn fleiri hlutir, þeir er þat mátti skilja at þeir váru Vestmenn; þat fansk í Papey austr ok í Papíli; er ok þess getit á bókum enskum, at í þann tíma var farit milli landanna.