Gizorr byscop, sonr Ísleifs, vas vígþr til byscops at bœn lanzmanna á dögom Óláfs conungs Harallzsonar, .ii. vetrom epter þat, es Ísleifr andaþisc. þann vas hann annan hér á landi, en annan á Gautlandi. en þá vas namn hans rétt, at hann hét Gisrøþr. suá sagþi hann oss. Marcús Sceggiasonr hafþi lögsögo næstr Sighuati, oc tóc þat sumar, es Gizorr byscop hafþi einn vetr verit hér á landi, en fór meþ .iiii. sumor oc .xx. at hans sögo es scrifoþ ævi allra lögsögomanna á bóc þessi, þeira es vǫ́ro fyr várt minni. en honom sagþi Þórarinn bróþer hans, oc Sceggi faþer þeira, oc fleiri spaker menn, til þeira ævi, es fyr hans minni vǫ́ro, at þuí es Biarni enn spaki hafþi sagt, föþor faþer þeira, es munþi Þórarin lögsögomann oc .vi. aþra síþan. Gizorr byscop vas ástsælli af öllom lanzmönnom, an huerr maþr annarra, þeira es vér vitem hér á landi hava verit. af ástsælþ hans oc af tölom þeira Sæmundar, meþ umbráþi Marcús lögsögomannz, vas þat í lög leitt, at aller menn tölþo oc virþo alt fé sitt, oc sóro at rétt virt væri, huárt sem vas í löndom eþa í lausaaurom, oc gørþo tíund af síþan. þat ero miclar iartegner, huat hlýþner lanzmenn vǫ́ro þeim manni, es hann com þuí fram, at fé alt vas virt meþ suardögom, þat es á Íslandi vas, oc landet siálft, oc tíunder af gørvar, oc lög á lögþ, at suá scal vesa meþan Ísland es ' bygt. Gizorr byscop lét oc lög leggia á þat, at stóll byscops þess, es á Íslandi væri, scylldi í Scálahollti vesa, en áþr vas huergi, oc lagþi hann þar til stólsens Scálahollzland oc margra cynia auþœve önnor bæþi í löndom oc í lausom aurom. en þá es hǫ́num þótti sá staþr hava vel at auþœvom þróazk, þá gaf hann meir an fiórþung byscopsdóms síns til þess, at helldr væri .ii. byscopsstólar á landi hér, an einn, suá sem Norþlendingar æsto hann til. en hann hafþi áþr látit telia búendr á landi hér, oc vǫ́ro þá í Austfirþinga fiórþungi .vii. hundroþ heil, en í Rangæinga fiórþungi .x., en í Breiþfirþinga fiórþungi .ix., en í Ayfirþinga fiórþungi .xii., en ótalþer vǫ́ro þeir, es eigi ǫ́tto þingfarar caupi at gegna of alt Ísland.
Úlfheþinn Gunnars sonr ens spaca tóc lögsögo epter Marcús, oc hafþi .ix. sumor, þá hafþi Bergþórr Hramnssonr .vi., en þá hafþi Goþmundr Þorgeirssonr .xii. sumor. et fyrsta sumar, es Bergþórr sagþi lög upp, vas nýmæli þat gørt, at lög ǫ́r scylldi scriva á bóc at Hafliþa Mǫ́ssonar of vetrenn epter at sögo oc umbráþi þeira Bergþórs oc annara spacra manna, þeira es til þess vǫ́ro tecner. scylldu þeir gørva nýmæli þau öll í lögom, es þeim litisc þau betri, an en forno lög. scylldi þau segja upp et næsta sumar epter í lögrétto, oc þau öll hallda, es enn meiri hlutr manna mællti þá eigi gegn. en þat varþ fram at fara, at þá vas scrifaþr Vígslóþi oc mart annat í lögom, oc sagt upp í lögrétto af kennimönnom of sumaret epter. en þat licaþi öllom vel, oc mællti þuí mangi í gegn. þat vas oc et fyrsta sumar, es Bergþórr sagþi lög upp, þá vas Gizorr byscop óþingfœrr af sótt. þá sendi hann orþ til alþingis vinom sínom oc höfþingiom, at biþia scylldi Þorlác Rúnólfsson Þorleikssonar, bróþor Hallz í Haukadali, at hann scylldi láta vígiasc til byscops. en þat gørþo aller suá sem orþ hans qvómo til, oc fecsc þat af þuí, at Gizorr hafþi siálfr fyrr miöc beþit, oc fór hann útan þat sumar, en kom út et næsta epter, oc vas þá vígþr til byscops. Gizorr vas vígþr til byscops þá es hann vas fertøgr. þá vas Grégóríus septimus páve. en síþan vas hann enn næsta vetr í Danmörco, oc kom of sumaret epter hingat til lanz. en þá es hann hafþi verit .xxiiii. vetr byscop, suá sem faþer hans, þá vas Jóan Ögmundarsonr vígþr til byscops fyrstr til stóls at Hólom. þá vas hann vetri miþr an hálfsextøgr. en .xii. vetrom síþar, þá es Gizorr hafþi allz verit byscop .xxxvi. vetr, þá vas Þorlácr vígþr til byscops. hann lét Gizorr vígia til stóls í Scálahollti at sér lifanda. þá vas Þorlácr .ii. vetrom meirr an .xxx. en Gizorr byscop andaþisc .xxx. nǫ́ttom síþar í Scálahollti á enom þriþia degi í vico .v. kalend. iunii.
Á þuí áre eno sama andaþisc Páschalis secundus páve, fyrr an Gizorr biscop, oc Baldvine Jórsala conungr, oc Arnaldus patriarcha í Hierúsalem, oc Philippús Suía conungr. en síþar et sama sumar Álexíus Grikkia conungr. þá hafþi hann .xxxviii. vetr setit at stóli í Miclagarþi. en .ii. vetrom síþar varþ allda mót. þá höfþo þeir Aysteinn oc Sigurþr verit .xvii. vetr conungar í Norvegi eptir Magnús föþor sínn, Óláfsson Harallzsonar. þat vas .cxx. vetrom eptir fall Óláfs Trygguasonar, en .ccl. epter dráp Eadmundar Engla conungs. en .dxvi. vetrom epter andlát Grégóríús páva, þess es cristni com á England, at þuí es talit es. en hann andaþisc á öþro áre conungdóms Fócó keisara .dciiii. vetrom eptir burþ cristz at almannatali. þat verþr alt saman .mcxx. ǫ́r. hér lýcsc siá bóc.