Geirmundr bjó á Geirmundarstǫðum til elli æfi sinnar. En sá var einn hvammr í landi Geirmundar, at hann kvazk vildu kjósa á brott ór landinu, ef hann mætti ráða; ok mest fyrir því, "At sá er einn staðr í hvamminum, at ávalt er ek lít þangat, þá skræmir þat ljós fyrir augu mér er mér verðr eigi at skapi; ok þat ljós er ávalt yfir reyni-lundi þeim er þar er vaxinn einn samt undir brekkunni." Ok þat fylgði, ef nǫkkuru sinni varð búfé hans staðt í hvamminum, þá lét hann ónýta nyt undan á þeim degi.
Ok eitt sinn er frá því sagt, at búsmali hans hafði þar komit niðr um nótt eina. Ok er smalamaðr reis upp ok sá féit í hvamminum, varð hann ákaflega hræddr, ok hleypr sem hann má ok eltir féit ór hvamminum; ok rýfr ór reyni-runninum vǫnd einn ok keyrir féit með, ok rekr féit heim til Geirmundarstaða.
En Geirmundr var út genginn ór hvílu sinni um morguninn, ok sér hvar smalamaðrinn eltir féit ofan ór hvamminum; ok verðr honum ekki vel at skapi er féit hefir þar verit, ok snýr í móti smalamanninum, ok þekkir brátt, at hann hefir reyni-vǫndinn í hendi ok keyrir féit með. Ok hér verðr honum svá íllz-kallt við hvárt-tveggja samt, at hann hleypr at smalamanninum ok berr hann ákaflega mjǫk; ok bað hann aldregi gera þat optarr, at berja fé hans með þeim viði er í þeim hvammi er vaxinn, en þó einna sízt ór reyni-runninum. En Geirmundr mátti því auðvellega kenna viðinn at þar at eins var þá reyni-viðr vaxinn í hans landeign í þeim sama stað er nú stendr kirkja at Skarði, at því er vér hǫfum heyrt sannfróða menn frá segja. Geirmundr lét taka vǫndinn ok brenna hann í eldi, en búfé sitt lét hann reka í haga ok ónýta nyt undan á þeim degi.
Dóttir Geirmundar var Ýr, móðir Þórodds, fǫður Brodda, fǫður Hallberu er átti Bǫrkr son Þormóðar Þjóstarssonar.
Steinólfr inn lági, son Hrólfs hersis af Ǫgðum, nam land milli Búðardals-ár ok Tjaldaness, ok bjó í Fagradal; hans dóttir var Helga, móðir Hymings Ólafs, er átti Arndísi, dóttur Geirmundar Heljar-skinns; þeirra dóttir var Friðgerðr, móðir Sneris Þóroddssonar, fǫður Odda, fǫður Þorgils Oddasonar. Ǫnnur dóttir Steinólfs ins lága ór Fagradal var Arndís, móðir Þórðar, fǫður Þorgerðar, móður Hrafns, fǫður Snartar, fǫður Védísar, móður Hǫllu, móður Yngvildar, er átti Snorri lǫgsǫgu-maðr, faðir Narfa, fǫður Skarð-Snorra.
Ingólfr [Arnar] son hann staðfestisk fyrstr á Íslandi land-náms-manna, svá at menn kunni ættir sínar til at telja. Ingólfr var faðir Þorsteins, fǫður Þorkels mána lǫgsǫgu-manns; Þórhildr var dóttir Þorsteins Ingólfssonar, móðir Þorkels, fǫður Ketils, fǫður Hauks, fǫður Yngvildar, móður Snorra, fǫður Narfa, fǫður Skarð-Snorra.
Hrollaugr hét sonr Rǫgnvalds jarls á Mœri. Frá honum eru Síðu-menn komnir. Hans sonr var Ǫzurr, faðir Þórdísar, móður Halls á Síðu. Egill, sonr Halls, var faðir Þorgerðar, móður Jóans biskups. Yngvildr Hallsdóttir var móðir Þóreyjar móður Sæmundar ins Fróða. Þorvarðr Hallsson var faðir Þórdísar, móður Jóreiðar, móður Halls prests í Haukadal, Teitssonar. Þorsteinn Hallsson var faðir Magnúss, fǫður Einars, fǫður Magnúss biskups. Ljótr Hallsson var faðir Guðrúnar, móður Einars Arasonar, ok Steinunnar, móður Guðmundar ok Hallberu, móður Þorgils, fǫður Húnboga, fǫður Snorra, fǫður Narfa, fǫður Skarð-Snorra.
Móðir Skarð-Snorra var Guðrún Þórðar dóttir, Oddleifssonar, Þórðarsonar kráku-nefs. Þessi vóru systkin Skarð-Snorra: Þórðr, er átti Jóreiði Hallsdóttur; þeirra dóttir var Helga, er Sturla átti Þórðarson Lǫgmaðr. Þorbjǫrn var laun-getinn ok Halldís. Yngvildi, systur Snorra, átti Gunnsteinn Hallsson; hon var móðir Vígfúss ok þeirra systkina. Guðríðr, systir Snorra, var móðir Guðmundar prests Óláfssonar ok þeirra systkina. Hallgerði, systur Snorra, hana átti Þórðr undir Felli; hon var móðir Snorra ok Guðmundar ok Yngvildar, móður Pétrs í Skógarnesi, Snorra sonar.
Bjǫrn sonr Ketils Flatnefs var faðir Kjallaks, fǫður Þorgríms, fǫður Vermundar, fǫður Yngvildar, móður Þórðar, fǫður Yngvildar, móður Snorra Húnbogasonar.
Dálkr var bróðir Þorgils Hafliðasonar; hann var faðir Bersa, fǫður Dálks, fǫður Halldórs prests í Saurbœ, fǫður Þorsteins, er átti Ingigerði Philippusdóttur, Sæmundarsonar.