Grímr at Mosfelli var skírðr, þá er kristni var í lǫg leidd á Íslandi. Hann lét þar kirkju gera. En þat er sǫgn manna, at Þórdís hafi látit flytja Egil til kirkju, ok er þat til jarteigna, at síðan er kirkja var gǫr at Mosfelli, en ofan tekin at Hrísbrú sú kirkja, er Grímr hafði gera látit, þá var þar grafinn kirkjugarðr. En undir altarisstaðnum, þá fundusk mannabein. Þau váru miklu stǿrri en annarra manna bein. Þykkjask menn þat vita af sǫgn gamalla manna, at myndi verit hafa bein Egils.
Þar var þá Skafti prestr Þórarins son, vitr maðr. Hann tók upp hausinn Egils ok setti á kirkjugarðinn. Var haussinn undarliga mikill, en hitt þótti þó meirr frá glíkendum, hvé þungr var. Haussinn var allr báróttr útan svá sem hǫrpuskel. Þá vildi Skafti forvitnask um þykkleik haussins. Tók hann þá handøxi vel mikla ok reiddi annarri hendi sem harðast ok laust hamrinum á hausinn ok vildi brjóta, en þar sem á kom, hvítnaði hann, en ekki dalaði né sprakk, ok má af slíku marka, at haus sá mundi ekki auðskaddr fyrir hǫggum smámennis, meðan svǫrðr ok hold fylgði. Bein Egils váru lǫgð niðr í útanverðum kirkjugarði at Mosfelli.